1. Jim konn asro magunk Ejiptant denvun vetat, ghoddeancher aplo visvas tthevtat, puskoll rothancher ani bollvont ghoddesvorancher patietat, punn Israelachea Povitr Devacher kosloch visvas dovrinant ani Sorvesporachi budh maginant, tanchem kottakotta!
2. Toripunn To-i vaitt-vign dhaddunk bhov hikmoticho, ani dil'lem utor To pattim ghena; noxtteanchea ghoranneacher add ani khottea mon'xank asro ditat tancher add To utthun ietolo.
3. Ejiptkar fokot monis, te dev nhoi, tanche ghodde haddam-masache, atmo nhoi; Sorvespor Aplo hat vistarta tedna, asro ditat tim adllun poddtolim; asro ghetat tim-i oxinch poddtolim ani soglleancho borabôr nas zatolo.
4. Khorench, Sorvesporan oxem mhaka sanglam: 'Zoso êk xinv vô xinvacho petto apli xikari dhôrun goroz ghalta, ani rakhnneanchi êk urpônz legun tacher add ektthaim zali zalear-ui, to tanchea gollbollak bhiena ani tanchea boballan akantna, tosoch Sorvsoktivont Sorvespor Sion Dongrar ani tachê tenkxer loddai korunk denvtolo.
5. Varear uddun rakhônn kortat toslea sovnneam vori, Sorvsoktivont Sorvespor Jerusaleak rakhtolo; hôi, To taka rakhun nivartolo, ani taka vattaun soddoitolo.
6. Israelachea putam-dhuvamnô, tumi kolpon Zaka patt kel'li, Tachê-xim portun ieiat.
7. Hôi, tea disa, tumcheach patki hatamnim kel'leô rupeacheô ani bhangaracheô murti tumi sogllim bhair uddoitoleat.
8. Assiria torvarin poddtoli, punn mon'xachê torvarin nhoi; mon'xachi nhoi-asloli torvar tika girastoli, torvari mukhar ti pollun vetoli, ani tiche tornne zhuzari gulam zaunk pavtole.
9. Bhieun kampun Assiriekar pollun vetole, tanche sordar thorthorun aplo zhuzacho bavtto sanddun vetole. Zacho uzo Sionant pettlolo asa, Zachem agttem Jerusaleant zollta, toch Sorvespor oxem sangta.
