1. Doriachê kinarek aslolea oronnea vixim bhakit: Oronnea thaun, bhoikôr desa thaun, vadollacho varo Negebak zhaddun ieta.
2. Ek bhirankull dorxon mhaka dakhoilem: Ghatki ghat gheit veta, luttnnar luttit veta. 'Choddun vochat, Elamkaramnô, taka veddho ghalat, Mediakaramnô! Haskar-suskar soglle Hanv thamboitam.'
3. Teach pasot mhojem penkott foddfoddta; ballonterak pavlolê bailechea vollvolleam bhaxen hanv-ui dukhin vollvolltam. Itli vhôdd mhoji khônt ki mhaka aikunk iena. Hanv itlo bhielam ki mhaka kãich disona.
4. Mhojem kalliz vollvollta, bhirantin hanv koddkoddtam, axel'li mhoji tin'san zalea mhaka bhoikaronn.
5. Jevnnak mez toiar kortat, tacher ek tualo ghaltat; khata-pietat ... Utthat, sordaramnô! Dhalak tel laiat!
6. Karonn Sorvesporan mhaka oxem sanglam: 'Voch ani eka pahrekarak ubo kôr, ani apnnak dixtti poddta tem sangunk ieum-di.
7. Taka zôr ghoddesvori dixtti poddli, zodddiê-zoddien ghoddesvor, gaddvancher boslole sovar, unttancher boslole sovar, tannem chotrai dhôrchi, chotraien barik polleunchem.'
8. Polleupi oxi bob marta: 'Pahreachea gopurant, Dhonia, dis-bhôr hanv ubo asam, ani mhojea pahreachea zagear rat-bhôr pahro kortam.
9. Hi polle ieta ghoddesvori, zoddiê-zoddien ghoddesvor ietat. Mhojê lagim te uloile, tãnnim mhollem: 'Poddli rê poddli Babilonia! Ani tichea devancheô soglleô murti dhornir xevtton poddleô!'
10. Hanvench bhata vori môll'lolê ani asuddlolê porjê mhojê, Sorvsoktivont Sorvespora koddsun, Israelachea Deva koddsun, jem kitem hanv xiklam, tench hanv atam tuka sangtam.
11. Edoma vixim bhakit: Seir thaun konn mhaka vhoddlean ulo marta: 'Ê pahrekara, raticho khoincho par ho? Ê pahrekara, raticho khoinchopar ho?'
12. Pahrekar zobab korta: 'Sokall pavot ieta, magir portun rat zata. Tumkam zai zalear, vicharat, portun ieiat, novean hanga ieiat.'
13. Oronnea vixim bhakit: Dedan'karanchea sarthamnô, Arabiechea jhilkuttam modem tumi rat kaddtat.
14. Tanel'leank mellunk vochat, tankam udok haddun diat. Tema ganvant ravtoleamnô, pollun vetoleank mellunk vochat, tankam jevonn vhorun diat.
15. Karonn torvarim mukhar tim pollun vetat; pazlolea torvarim mukhar, bagail'lea dhonuam mukhar nixttur zhuza mukhar, tim pollun vetat.
16. Hôi, Dhonian mhaka oxem sanglem: 'Muxarekarachim vorsam mêztat toxem mezun, eka vorsa bhitôr Kedarachi soglli tezvont podvi moddon vetoli.
17. Dhonn-viam modlo, Kedarachea bollixtt putam modlo, konn tori urot? Karonn Sorvespor, Israelacho Dev, oso uloila.'
