1. Tea disamnim Merodak-Baladan nanvachea Babiloniechea razan, Baladanachea putan, Hezekia piddest aslo ani piddentlo boro zalo mhonn aikun, taka ek potr ani ek dan pattoilim.
2. Hachê khatir Hezekia ekdom' khuxal zalo, ani razdutank tannem sogllem aplem bhanddar dakhoilem - sambar, rupem, bhangar, omolik telam, aplo darukhanno, ani aplea gudanvamnim aslem titlem-i. Aplea rajnivasant vô aplea ak'khea rajeant aslem tantlem Hezekian tankam dakhoinastana kãich dovrunk na.
3. Tedna Hezekia raza-xim ieun Izaias provadian tachê lagim vicharlem: 'Hea mon'xamnim kitem mhonn tuka sanglam, ani khoim thaun te tuka mellunk aileat?' Hezekian oso zobab dilo: 'Poixilea desantle, Babiloniê thaun, te aileat.'
4. Izaiasan mhollem: 'Tujea raznivasant tãnnim kitem dekhlem?' Hezekian zobab dilo: 'Mhojea gudanvamnim asa tantlem kãich hanvem tankam dakhoinastana dovrunk na.'
5. Tedna Izaiasan Hezekiak mhollem: 'Sorvsoktivont Sorvesporachea utrak kan di:
6. "Osle dis ieunche zale ki tujea rajnivasant asa tem sogllem, tujea purvozamnim ozun porian santthoun dovorlam tem sogott, Babiloniek ubarun vhortole. Kãich sôddche nant.' Sorvespor oxem sangta:
7. Tujê thaun upzol'lea putank, tunvem zolma haddlolea putank, Babiloniechea razachea raznivasant khoje zaunk ubarun vhortole."'
8. Hezekian Izaiasak mhollem: 'Tum mhaka porgôtt kortai tem Sorvesporachem utor dharzonnem haddtolem utor', kiteak to oxem chint'talo: 'Hanv jivo aso-sôr vostoli xanti ani surokxa.'
