1. Efraimachea bebdeanchea gorvixtt pongddachem kottakotta! Sufoll-pikall falkea voir aslolea xarachem, gorvixtt sobaiechea atam bavlolea fulachem kottakotta! Sorean lal zaun poddloleanchem kottakotta!
2. Polleiat, Dhonian dhaddlolo, ghôtt ani podvedar konn-eklo asa; korveanchea pausa sarko, nas kortolea tufana sarko, ufalltolea udkanchea lotta sarko, aplea hatan to tankam zomnir xevttun uddoita.
3. Efraimachea bebdeancho gorvixtt pongôdd, pãiam tolla moston vetolo:
4. ani toxench sufoll-pikall falkea voir aslolem gorvixtt sobaiechem bavlolem ful. Zoxem gima adinch piklolem anjir konnak-ui dixtti poddlem zalear to tem hatan kaddta ani sottkorn gillta, toxench atam-i zatolem.
5. Tea disa, Sorvsoktivont Sorvespor Aplê porjechea urlolea zomeak êk mhoimevont mukutt zatolo, ek zhogzhogit taj.
6. Neainit korunk bostoleak To zatolo uzu neaiachi sfurti, ani dhadd ghalpiak lottun darvonttea bhair uddoitoleank vira-dhirachem boll.
7. He-i soro pieun ghunvolltat, lal korta toslea pivonnan lòktat. Iadnik ani provadi tikh-nibôr soro pieung hunvolltat, soro pieun pieun sunndde zaun geleat. Koddok fenni tankam girgiraita, dorxonam ghetana te fostat, nirnnoi ditana te dounddolltat.
8. Hôi, sogllim mezam tanchê onkin mhellim-burxim zaleant. Nitôll mhonnpacho êk konnso porian na!
9. Konnak mhonn to aplo updês diunk aila? Konnak mhonn aplo sondêx diunk sôdta? Dud tôddloleam ballkank kitem? Avoichea hodd'ddeantlim halinch mekllim kel'leank kai?
10. Aikat tôr tachem: "Sav lasav, sav lasav, kav lakav, kav lakav, zeer sham', zeer sham'! "
11. Hôi, khorench, luddbeun gageun ani êkê porkê bhaxen to hea raxttra lagim uloitolo.
12. Tannench tankam ekdam sanglolem: 'Visovacho zago ho: thokloleamnim ieun visôv gheuncho. Hanga khorench somadhan mellta.' Punn tim taka kan dina zalim.
13. Tea pasot Sorvespor atam oxem sangta: 'Sav lasav, sav lasav, Kav lasav, kav lasav, zeer sham', zeer sham'!' Oxem tim choltana adllun fattim poddtolim, bhòngtolim, fasak sampoddtolim, koidi zaun vetolim.
14. Dekhun tumi, khebaddam kortoleamnô, Jerusaleant ravtolê hê porjechea odhikariamnô,Sorvesporachem utor aikat.
15. Tumi mhonnttat: 'Mornna lagim ami korar kel'lo asa, Norka kodde amchi koblat zalea. Nisonttonachem xirantt ieta tedna, tem amkam lagchench na, kiteak mhollear fottincho ami asro bandla, ani lottikponna ponda ami lipun ravtanv.'
16. Hea pasot Pormespor Dev oxem mhonntta: 'Polleiat, Sionant Hanv êk fatôr ghalun dovortam, pakhônn fatôr, konnxa-sondhicho moladik fatôr, buniadicho okhôndd fatôr. Tacher visvas dovortat tim adllun poddchim nant.'
17. Mapchem sut zaunk Hanv Neainit sthaptolom, ani ollombo zaunk Promannikponnak ubem dovortolom. Punn fottincho asro korveanchea pausan zhaddun vetolo ani udkanchea lottan lipnnem buddun vetolem.
18. Mornna lagim kel'lo tumcho korar mòddtolo ani Norka kodde tumchi koblat rôd'd zatoli. Nisonttonachem xirantt ieta tedna, tem tumcho bhông kortolem;
19. Ieta titlê-i pavtti tem tumkam dhôrun vhortolem. Dôr sokallim tem ietolem, dôr-eka disa, dôr-êkê rati. Edo kampero tumcher ietolo ki tedna mat ho sondêx tumi somzunk pavtoleat!
20. Pãi sôddun add poddunk baz ekdom' mottvi, pangrunk chedor bhov oxir.'
21. Perazim' Dongrar utthlolo toso, Sorvespor utthunk veta; Gibeonachea Falkeant kel'lem toxem, To ragan fuddem sorta. Aplem kortutv, Aplem odbhut kortutv, Aplem kam,' Aplem vichitr kam', korunk To fuddem sorta.
22. Atam puro tumchim khebaddam, na tôr tumcheô beddiô odikuch ghott zatoleô; kiteak Dhonian, Sorvsoktivont Devan, ak'khea desa virudh ghetlolo nisonttonacho nirnnoi hanvem aikola.
23. Kan diat, mhojim utram aikat, hanv sangtam tem chit diun somzun gheiat.
24. Bim vompunk xet kôsta to xetkamti fokot tas ghalta, zomin ustita ani difllam fôddta kai?
25. Zomin sopatt kelea uprant, to boddixêp laita ani jirem pêrta, vollim-vollimnim gonv, bazri ani zôv vompta, ani degek nachnno ghalta: hôi ki na?
26. Hem xikxonn taka mell'lam, Tachea khud Devan tem taka dilam.
27. Boddixêp dharichea iontran mollunk favo na, ani jireacher gaddiechem chak ôddinant. Boddixêp boddiamnim ani jirem boddovnnean boddoitat.
28. Gonv môlltat tedna tachi chur zai-sôr konn to mollit ravona. Gaddiechem chak tacher ôddlea uprant, gonv môlltat punn tachi chur korinant.
29. Hem-i Sorvsoktivont Sorvespora koddchem ieta: Tachi budh sodanch ojapvont, Tachim kortutvam bhov xrextt.
