1. Mhojê porjek dhir diat, tika ghottai diat:' oxem mhonntta tumcho Dev.
2. Jerusaleachea kallzak uloiat ani tika ulo korun sangat: tiche gulam'ponnache dis somple, tichea patkanchem farikponn diun zalem, sogllea tichea khotteponnank favo asli ti Sorvesporachea hatantli dupêtt khast tinnem bhôgli.'
3. Êk tallo oso arddota: 'Sorvesporak oronneant êk vatt toiar korat. Sukea-korddea mollantlean amchea Devak êk nitt rajmarôg toiar korun dovrat.
4. Sogllim falkim bhôrun gheiat, dôr-êk porvôt ani dongôr kapun sopatt bhuim korun gheiat, dongurleô asat titleô-i êk sopatti zaum-di, ani soglle kodde ek moll.
5. Tedna Sorvesporachi mhoima porgôtt zatoli ani ak'khem mon'xakull ti polletoli. Kiteak Sorvesporachea tonddantlo ho sondêx bhair sorla.'
6. Êk tallo oso uloilo: 'Arddun sang!' Ani hanvem portipall kelo: 'Kitem arddun sangum?' 'Ak'khem mon'xakull mhollear tonn ani tachi sobitai xetantlea fula itli.
7. Sorvesporacho svas tancher poddta tedna tonn sukta, ful bavta. (Hôi, tonn mhollear hi porza.)
8. Tonn sukta, ful bavta, punn amchea Devachem utor togta sodam-sorvodam!'
9. Sionak xubh sondêx haddtolea sondexkara, unch porvotar choddun voch. Jerusaleak xubh sondêx haddtolea sondexkara, zata titli vhoddlean bob mar, bhiranti vinnem tuzo tallo ubar, Judachea nogrank sang: 'Ho polle tumcho Dev!'
10. Ho polle to ieta, Soktivont Pormespor Dev, Aplea bavllean To sogttacher odhikar choloita, Aplea zoitachem inam' To gheun ieta, Tachea zoitacheô soglleô tosripô Tachê fuddem vetat.
11. Menddram-rakhnno koso To Aplea hinddak choroita, Aplea hatamnim menddurleank vengoita, tankam Aplê khankek marun vhorta ani poram kaddlolea xelliank visovachea zagear pavoita.
12. Konnem tori somdirachem udok aplea hatan mapun kaddlam zait? Konnem punn mollbachi lambai-rundai vetin mezun kaddlea kai? Prithumechi soglli mati paili gheun konnem maplea bi? Porvotanchem vozon konnem mhonn kaddun ghetlam, ani tagdden dongor konnem zokhleat zait?
13. Sorvesporachea gineanak konnem tori adar dila mhonn asa? Khoinchea tori budhvontan Taka xikoila kai?
14. Aple nirnnoi gheunk, nitichi vatt Apnnak dakhounk, Aplem ginean uzvaddaunk ani kitem korchem na'korchem tem somzun gheunk konnachi tori Tannem budh ghetlea zait?
15. Polleiat, raxttram mhollear tostant udkacho êkuch thembo, tagddent tanchem vozon dhul'lichi êkuch konni. Polleiat, kinarianchem ani zunveanchem vozon barik dhul'li itlench.
16. Lebanon agttem zollounk porian pavona, ani thoim firtat tim zonavoram hôm' korunk puronant.
17. Tachea dolleam mukhar sogllim raxttram kãich nhoi, Tachê nodrek tankam mol-bixat na!
18. Konna lagim Devak tumi sôr korxat? Konna sarkem Tachem rup mhonn sangxat?
19. Êk xilpi murti korta, magir xêtt taka bhangar kaddta ani tika chandicheô sorpolliô korta.
20. Konn-eklo, iodnacho khôrch korunk apunn ekdom' gorib mhonnun, kuscho na toslo lankddacho êk kuddko vinchun kaddta, ani magir halona tosli murti ghôddchê pasot eka vhôdd hikmotichea xilpiak sôdun kaddta.
21. Hem tumi nokllo asleat? Aikunk naslem tumi? Survatek thaun tem tumkam sangunk naslem? Prithum' aplê buniadicher koxi thiraili, hem tumi somzunk nant?
22. Zo prithvechê monddolli voir xinvasonar boslolo asa, Tachê mukhar prithver asa to lôk tollam sarko. Tannem akash podd'ddea sarko posorla, ravpak tannlolea tombu vori to vistarla.
23. Kunvranchi podvi To nattak korta, sonvsarachea odhikariank To kãich nhoi korta.
24. Zhaddam sarke te: zomnint laitat thoinch asat, zomnint pallam futt'tat thoinch asat, To tancher varo sôddta ani te suktat, ani vadollan te pola vori ubun vetat.
25. Zo Povitr Dev, To oxem mhonntta: 'Tumi Mhaka konnak mhonn sôr korxat? Vô Mhojê sarko anink konn asa?'
26. Dolle voir ubarun polleiat: him noketram konnem rochleant? Zo tankam borê bhaxen manddloli fouz koxi utpon'n korta ani ek-ekak ap-aplem nanv dita, Tannench tim rochleant! Itli vhôdd Tachi podvi, itli bollixtt Tachi xokti, ki Taka zobab diunk ek-ui chukona!
27. Sorvesporak mhoji vatt tthavi na, mhojea hok'kanchi mhozo Dev porva korich na' - oxem tujean koxem mhonnunk zait, Jakoba? koso tum hê bhaxen ulounk pavtai, Israela?
28. Hachi tuka khobor na kitem? Hem tuka konnench sangunk na kai? Sorvespor sasnnacho Dev, prithvecheô ximô Tannench rochleat. To thokona, Taka kednanch puro zaina, Tachea gineanacho konnachean tthav gheum nozo.
29. Thokloleak To xokti dita, boll-nasloleak Toch dita ghottai.
30. Tornnatte thoktat, ani harpit zatat, danddge gollgolltat ani poddtat.
31. Punn Sorvesporacher visvas tthevtat tim novea bollan bhoron ietolim, ghonnim porim tankam pakhtte futt'tole. Tim dhanvtit khorem punn thokchim nant, tim cholot ravtit punn kodinch harpit zaunchim nant.
