1. Bhurgeank zolm diunk naslolê vanzttê ostoriê, anondache ul'las sôdd! Ballonteracheô vennô kednanch bhôgunk naslolê, sontosache ul'las sôdd! Kiteak soddun dil'lê bailechim bhurgim logn-zal'lê potinichea bhurgeam-vôn choddam: oxem mhonntta Sorvespor.
2. Tuzo tombu rund kôr, tujê podd'dde sodoll sôdd, tujea tombuchim doram lamb kôr, tujeô danddiô ghôtt kôr;
3. kiteak uzvean ani davean tum vistaron vetolii, tuji sonsôt raxttrank aplea tabeant kortoli ani padd zal'lea xaramnim novean vosti kortoli.
4. Bhieum naka, tum novean lojek sampoddchi naim; husko dhôrum naka, hea fuddem tuzo man anink bhongcho na. Logn zaunk pavli naim mhonn anink tuka loz bhògchi na, ani tujea vidveponnachea bemanacho tuka anink ugddas ieuncho na.
5. Kiteak tuzo Rochnnar tuzo Poti: Tachem Nanv Sorvsoktivont Sorvespor. Zo Israelacho Povitr Dev toch tuzo Soddvonnar, ak'khê prithumecho Dev mhonnttat To.
6. Khonti-dukhint buddlolê êkê soddun dil'lê ostoriê bhaxen, Sorvespor tuka portun apoita. Aplea tornnattponnachê potinik konn tori sôddun dita zait? Oxem mhonntta tuzo Dev.
7. Êk ghoddi-bhôr Hanvem tuka sôddun dil'li khorem, punn vhoddê konnvallaien Hanv tuka portun vengent ghetolom.
8. Kinv ailo tedna, ilo vêll Hanvem Mhojem tondd tujê thaun lipoilem, khorem. Punn sasnnik mogan Hanvem tuji doia keli: oxem mhonntta Sorvespor, tuzo Soddvonnar.
9. Noahchea kallar kel'lem toxem, Hanv atam-i kortam: udkam novean sonvsarar buddti haddchim nant mhonn Hanvem Noahk soput dil'lo, tosoch atam-i soput gheun sangtam: anink kednanch Hanv tujer ragar zauncho na ani kednanch tuka novean dhomkauncho na.
10. Porvot koddsorun khoinchê-khoinch poddtit, dongor halon-dolon gollgolltit, punn tujê thaun Mhozo visvaxi môg kodinch koddsorun vecho na, ani Mhozo xanticho korar kodinch halcho-dolcho na! Oxem uloita Sorvespor, tuji doia korta To!
11. Nirbhagiê Mhojê, vadollan boddoil'lê, buzvônn naslolê, polle atam: tujê bandavolliche chire gomedancher bosoitolom. ani tujeô buniadi rajnilancher ghaltolom
12. Tuje durga-pare lal mannkamnim bandtolom, tuje darvontte suriakantache ani soglleô tujeô vonnti omolik rotnancheô.
13. Sogllea tujea bhurgeank khud Sorvespor xikxonn ditolo. Tujea bhurgeank bhôgunk melltoli xantichi bhorti.
14. Doiallaiechea nitivontponnachê buniadicher tuka thir korun dovortolom. Konn tuka dhumallo diuncho na: mat-ui bhieum naka, karonn tujer kosloch akant ieuncho na.
15. Mhojea hukuman tuka konnuch dhadd ghalcho na. ani konn-ui tôr tujea angar ailo, tujê mukhar to khala poddtolo.
16. Sall pettounk lohar kollxeancher funk marta, ani tantlim kaddun aplea vavrachim autam toiar korta: taka rochla to Hanvuch; punn tim moddun ghaltoleak-ui rochla to-i Hanvuch.
17. Tujê add ghôddlolea koslea-i hatiarak kednanch ies mellchem na. Tujer arôp korunk nitixallent konnem-i zôr aplo tallo ubarlo, tum taka ogo kortolii. Sorvesporachea sevokanchem daiz hem, doiallaiechea nitivontponnachem hem zoit tankam dita to Hanvuch! - uloita to Sorvespor!
