1. Ethiopiechea nodim-poltoddchea, gunztolea zollarinchea desa, tujem kottakotta!
2. Loveanchea hoddeamnim udkam voir, doriantlean tum tuje razdut pattoitai! Vochat, suddsuddit dutamnô, lamb ani savllea loka-xim, sodam bhem dakhovpi raxttra-xim, bollixtt ani podvi choloitolê porjê-xim vochat. Nodimnim addvean-tiddvean vanttlolea desant ho lôk ravta.
3. Sonvsarant jietat tim tumi sogllim, prithum' bhôrtat tim tumi somest, ho polleiat, porvotancher bavtto ubarun dovorla! Aikat, tuturi vazta!
4. Karonn Sorvespor oso mhaka uloila: 'Disachea uneta sarko lunvnnê-somoiachê gorment dovachea mhurea bhaxen, Hanv xant ravtolom ani Mhojea sthana thaun barkaien polletolom.'
5. Karonn dakanchea pika adim, fulnni sompun dakô ieun pikunk lagtat tedna, bênddpachi koiti gheun kombriô katortat, ankddiô môddtat, kapun uddoitat.
6. Porvotam voilea mon'zati-khatolea suknneanchem ani prithumê velea savzanchem khann zaunk te soglle borabôr thoinsoruch sanddlole urtole. Mon'zati-khavpi suknnim gim'-bhôr tancher bostolim, ani prithumê velim sogllim savzam aplo hinvallo tancheruch kaddtolim.
7. Tê somoim, nodimnim addvean-tiddvean doxim kel'lea desant ravpi, unchaien lamb ani angan savllea loka-chea nanvan, sodam bhem dakhovpi raxttrachea nanvan, bollixtt ani podvi choloitolê porjechea nanvan, Sion Dongrar, Sorvsoktivont Sorvesporak bhettovnniô gheun ietolim. Thoim Sorvsoktivont Sorvesporachem Nanv vosti korun asa
