1. Zoxem barik zollovak uzo rokddoch pett'ta, zoxem udok ujeacher xizon ieta, toxench tem zatem: Tuje xotru Tujea Nanvacho protap dekhte, Tujea dorxonan raxttrancher ieto kampero!
2. Tum mat denvun ail'loi zalear, chintpa-bhailim ani konnench aikunk naslolim ojapam-vismitam kortai mhonn polleun, tujea dorxonan porvot kampon vete!
3. Tujer visvas dovortat tanchê khatir Tum kortai toxem, khoincheach dusrea devan kel'lem konnench aikunk na: konnacheach kanar tem poddunk na, konnench tem dolleamnim polleunk na!
4. Jim konn promannikponnan jieun sontostat ani Tuzo ugddas korun Tujeô vattô samballtat, tankam Tum bhett diunk ietai. Hôi, ami patok kel'lem ani Tum ragar zal'loi; punn atam Tujeôch vattô ami sodam samballtoleanv ani amkam taronn melltolem.
5. Mhellim-bhoxttovl'lim mon'xam ami somest zal'leanv, amcheô promannik kornniô bhannxiream sarkeô. Sogllim ami panam vori sukun poddtanv, ani amchea khotteam kortubank lagun varean ami ubun vetanv.
6. Tuka ulo martolo konnuch disona, konnuch utthun Tuka xeronna vochona. Kiteak mhollear Tunvem amkam patt keleai. ani amcheach khotteponnanchê adhin Tunvem amkam sôddun dileãi.
7. Toripunn, Sorvespora, Tum amcho Bap; ami mati ani Tum amcho kumbar, sogllim ami Tujeach hatanchem' kam!
8. Itlo chôdd amcher challvom naka, Sorvespora, sodam-sodanch amcho guneanv monant dhôrun ravum naka: polle, somest ami Tujich porza.
9. Punn atam Tujea povitr nogramnim lôk ravoch na; Sion zalam oronnem, Jerusalem osadd poddlolo zago.
10. Hem polle amchem povitr ani tezvont Devmondir! thoim amche purvoz Tuji stuti korit asle: atam tacho zala gobôr! Zacher aslem sogllem amchem dhadosponn, tachem zalam nisontton!
11. Sorvespora, hem sogllem polleun, Tujem kalliz mat-ui movallona kai? Ogoch ravun, amchean anink sosum nozo porian dolldirponnant amkam koxttait ravtoloi Ga?
