1. Jakoba, Hanvem tuka rochla; Israela, Hanvem tuka akarun haddla; tôr atam Hanvuch, Sorvespor, oxem sangtam: Bhieum naka, kiteak Hanvem tuka soddoila; tujem nanv gheun Hanvem tuka apoila, tum Mhozoch.
2. Udkantlean vexi, tujea sangata Hanv astolom; nodintlean vexi, teô tuka girascheô nant. Ujeantlean cholxi, tum lascho naim, ani dhogan tum ulpocho naim.
3. Karonn Hanv Sorvespor, tuzo Dev, Israel Povitr mhonn vondita To, tuzo Tarôk. Tuka soddounk Hanvem Ejiptak sôddun dilo, Tuka zôddun gheunk Kush ani Sheba Mhaka naka zalim.
4. Mhojea dolleam mukhar tum omolik dekhun, Hanv tuka man ditam ani tuzo môg korta mmhonnun, tuka zôddun gheunk khoinchea-i lokak sôddun ditam, tuzo jiv vanchounk raxttram legun poro ghaltam.
5. Bhieum naka, kiteak tujea sangata Hanv asam. Udenti thaun Hanv Tujea putam-dhuvank haddtolom, Ostomtê thaun tumkam zoma kortolom.
6. Ut'torek mhonnttolom: 'Tankam sôdd.' Dokhinnek mhonnttolom: 'Tankam addaum naka!' Pois thaun Mhojea putank portun haddat, ani prithvechea ximam thaun Mhojea dhuvank gheun ieiat,
7. karonn tankam soglleank Mhojem Nanv dil'lem asa, Mhojê mhoimê pasot Hanvem tankam rochleant, tankam Hanvench akarun kaddleant, tim Mhojea hatanchi rochnna.
8. Dolle asun-ui kudd'ddim, kan asun-ui bherim, Oslea lokak fuddem haddat.
9. Sogllea raxttrank ektthaim zaum-di, somest lokank hanga zomum-di! Tanchê-modlea konnem hem adim-fuddench porgôtt kelam? ani konnem mhonn adlea kallacheô ghòddnniô amkam ugddapeô keleat zait? Aplem mhonnop khorem mhonn gomunk tãnnim aplea sakxidarank ubim korchim, ani heramnim aikunchem ani 'Hôi, hem khorem!', oxem mhonnchem.
10. Soglleamnim Mhaka vollkhun Mhojer bhavarth dovorcho ani Hanvuch To mhonn somzun gheunchem mhonnun, Mhojim sakxidaram tuminch ani Hanvem venchum kaddlolo sevôk - uloita to Sorvespor! Mhojê adim konn dêv naslo, Mhojê uprant-ui dusro dêv ascho na!
11. Hanv, hôi Hanv to Sorvespor, Mhojê bhair anink Tarôk na.
12. Ghòddchem aslem tem Hanvench ugddapem kelem, Hanvench khaxa tumkam soddoilim, ani Hanvench Mhojem taronn porgôtt kelem. Khoincheach porkea devan hem korunk na. Tuminch Mhojim sakxidaram - uloita to Sorvespor! Hanv Dev,
13. hôi, sasnnak thaun Hanv asam. Konnacheanuch konnakuch Mhojea hatantlo soddounk zaina; Hanv kitem-i korin zalear, konnachean tem fiskottaunk zait?
14. Oxem mhonntta Sorvespor, tumcho Tarôk, Israel Povitr mhonn vondita To: Tumkam soddounk Hanvem Babiloniek fouz dhaddli. Bondkhonninche soglle addambe Hanv môddun uddoitolom, ani Kaldeikaranchim zoitachim gitam bodlun Hanv kortolom roddnnem-vilap.
15. Hanv Sorvespor, tumi Povitr mhonn vonditat To, Israelacho Rochnnar, tumcho Raza.
16. Zannem doriantlean vatt korun dili, bhirankull udkantlean marôg ugddun dilo, To Sorvespor oso uloita:
17. Tannem roth, ghodde ani bollvont soinikanchi fouz zhuzak bhair kaddlim, punn he soglle anink utthona toxe poddle, tancho nas zalo, doxirê bhaxen palvon gele.
18. Adlea ghodditancho anink ugddas korum nakat, purvilea kallacheô ghòddniô monant haddum nakat.
19. Polleiat, ek novem kortutv Hanv korunk vetam: tem ghoddon ieta, disona tumkam? Hôi, oronneant Hanv êk rosto kortam, poddong zomnintlean nodi vhanvo-xi kortam.
20. Hanvem venchun kaddlolê Mhojê porjek oronneant Hanv udok pieunk ditolom mhonnun ani poddong zomnintlean nodi vhanvo-xi kortolom dekhun, Mhaka man-mhoima ditolim savzam, kole ani xamrig.
21. Mhojêch khatir Hanvem rochun haddlea ti porza Mhoji vakhann'nni gazoit astoli.
22. Punn, Jakoba, aikun ghe, tunvem Mhaka ulo marunk naim, Israela, tuka Mhoji vaz ailea.
23. Hôm' korunk tunvem Mhaka tuje menddre haddunk naim, iodn korun tunvem Mhaka man-mhoima diunk naim. Dhano-gotto gheun somorponnam korcho bhar tujer Hanvem ghalunk na, dhump bhettouncho mhonnun tuka Hanvem tras diunk na.
24. Mhaka love haddun diunk tunvem khôrch korunk naim, tujea iodnanchi chorob haddun tunvem Mhaka dhadoxi korunk naim. Urfattim tujea patkancho bhar tunvem Mhojer ghalai, tujea khotteponnamnim tunvem Mhojea jivak kanttallo haddlai.
25. Tuje guneanv dhuun-pusun kaddtam to Hanvuch: Mhojea Nanvachea moga khatir oxem Hanv kortam; tujim patkam anink monant dhôrcho na.
26. Matso Mhaka ugddas kôr, ektthaim bosun hem sogott topasun kaddum-ia. Tujem kitem sangchem asa tem sang ani tuka guneanv na mhonn dakhoi.
27. Tujea mullpuruxan patok kelem, tuje fuddari Mhojer kolpole.
28. Dekhunuch povitr mondirachea odhikariank Hanvem kuxin kaddle, Jakobak Hanvem nisonttonak sôddlo ani Israel kenddnniancho mhal zaunk Hanvem nirmilem.
