1. Utth, porzollit za: Udelo suria, ani tujê voir Sorvesporachi mhoima porzollta!
2. Zori prithumer ozun rat cholta ani porzancher kallôkh vistarla, tori Sorvespor tujer udeta, Devachi mhoima tujê voir fankta!
3. Raxttram iet asat tujea uzvaddak; tujea orunnak, fantea-porzollak, iet asat raza!
4. Dolle ubarun sobhonvtim polle: ektthaim zaun sogllim tujê-xim ietat: pois sottiam ietat soglle put tuje, an' tujea dhuvank anddier dhôr'n haddtat.
5. Hem sogllem polleun tujem mukhamoll loklokit zat'lem, dhadoxi kalliz hodd'ddeant uddtolem. Tôr tujê unttient sagra-doriachi vhanvtoli grestkai, raxttranchi dovlôt tuka pavtoli.
6. Tuzo ganv bhôrunk hinddam-hinddamnim ietolim unttam, Midianachim ani Efachim ispa-bhair koram; Bhangar dhumph addun Saba thaun sogllim zoma zaun iet'lim; Sorvesporachi vakhann'nni stuti gavun gaitolim.
7. Tuj' durgam bhitôr zomtole soglle Kedarache hindd, tuj' seva korunk Nebaiotache pavtole menddre. Oxe te zat'le Mhojê vedicher Mhaka man'pacheô vôploleô boliô. Mhojea mhoimevont Ghorachem voibhov Hanv vaddoitolom.
8. Konn zatit kai he, kupa bhaxen uddun vetat te? Pollelear distat aplea ghora vetem parveanchem birem.
9. Kinariô ani zunve Mhoji vatt polloit asat. Tarvam ektthaim zatat, soglleam-vôn fuddem Tarshisacheô patmariô. Tujea putam-dhuvank tanchea bhangara-rupea soit poixilea ganvam sakun portun haddunk vetat, Sorvespora tujea Devachea, Israel Povitr mhonn vondita Tachea Nanva khatir, kiteak To tuka mhoimevont korunk veta.
10. Porke monis tujim kottam novean bandtole ani tanche raza tuji seva kortole. Kiteak Mhojea krodhan Hanvem tuka khast lail'li khorem, punn konnvallaien Hanvem tuji doia kelea.
11. Tuje darvontte sodanch ukte astole: raxttranchi girestkai tuka haddun pavounchê khatir ani tanchea razank bhitôr ieunk diunchê khatir, zaum disache zaum ratche te kodinch dhamplole asche nant.
12. Karonn jem raxttr ani jem raj tuji seva korunk kobul na zatit, tim nattak zatolim, ani raxttrancho sarkoch nas zatolo.
13. Tujê-xim pavtoli Lebanonachi mhoima, mhonngê soru, devdar ani muttio, he soglle rukh; Mhojea Povitr-Sthanachea zageachi sundorai te vaddoitole, Hanv tthikann korun asam tê svatek odik vhôdd man haddtole.
14. Tuka pill'loleancheô put-dhuvô man bagaun tujê-xim ietoleô, tuka lekhinaslim tim sogllim tuka pãiam poddtolim, 'Sorvesporachem Xar', 'Israel Povitr mhonn vondita tea Devachem Sion', hea nanvamnim tim tuka lêkhtolim.
15. Adim soglleamnim tuka sôddun dil'li, sogllim tuka kanttalltalim ani tujê thaun pois ravtalim. Punn hea fuddem tuka Hanv kortolom omor obhimanacho prostav, pinddkechê pinddkent sukh-sontosachem karonn.
16. Avoichem dud pietolea ballkam bhaxen raxttranchem dud tum pietolii, razanchê dovlotin tum dhadoxi zatolii. Tedna Hanv, Sorvespor, tuzo Tarôk mhonn, Jakobacho Bollixtt Dev tuzo Soddvonnar mhonn tuka gomon ietolem.
17. Pitullchê svater Hanv bhangar haddtolom, lokhonddachê svater haddtolom rupem, lankddachê svater pitull, ani fatranchê bodlek lokhondd. Tuzo karbhar cholounk Xantik nemtolom, ani tujer razvôtt cholounk Doiallaiechem Nitivontponn sthapun dovortolom.
18. Tujea desant zobordostechi khoboruch aschi na, tujea ximam bhitôr desvatt aschi na, nhoi mhonn nisontton. Tujea kottank 'Taronn' ani tujea darvontteank 'Vakhann'nni' him nanvam ditolii.
19. Hea fuddem disacho anink tujer suria aplo prokas ghalcho na, ani chondrim' tuka aplo uzvadd diuncho na; punn khud Sorvespor sodankal tuzo uzvadd zatolo, tuzoch Dev zatolo tuzo Prokas!
20. Tuzo suria anink mavllun vecho na, ani tujem chandnem anink palvonchem na, kiteak Sorvespor tuzo onont Prokas zatolo ani tujea dukhache dis somptole.
21. Soglli tuji porza zatoli Devak manovlolea mon'xanchi ani dês sodankal tanchê adhin astolo. Mhaka mhoima diunchê khatir Hanvench roil'li kombri ti, Mhojeanch hatanchem kam' tem.
22. Tumchê modlim jim konn odik lhanasat, tanchê thaun upzotole hozar; soglleam-vôn osokt asat tanchê thaun nipzotolem bollvont raxttr. Iukt vêll pavlo mhonnttôch, Hanv, Sorvespor, vegim-vegim hem sogott ghoddun haddtolom.
