1. Teach disamnim Hezekia piddent poddun mornnachê tonnir pavlo. Izaias provadi, Amozacho put, oxem taka sangunk ailo:' Sorvespor oxem sangta: "Tujea ghoracheô rattavolli tharear ghal, kiteak tum atam morunk pavlai, anink jivourcho naim."'
2. Hezekian aplem tondd vonnti vatten portilem ani Sorvesporak oxem magnnem kelem:
3. Sorvespora, Tujê kodde poratun magtam: Tujê mukhar hanv visvaxiponnan ani promannik kallzan chol'lom ani Tuka borem dista tem hanvem kelam mhonn ugddas kôr.' Ani Hezekia dukamnim roddlo.
4. Tedna Sorvespor Izaiasa kodde oso uloilo:
5. Voch ani Hezekiak oxem sang: "Sorvespor, tujea purvoza Davidacho Dev, oxem sangta: Hanvem tujem magnnem aikolam ani tujim dukam Hanvem polleleant. Hanv tuka boro korunk vetam-. Tujea jivitak Hanv anink pondra vorsam choddoitolom.
6. Tuka ani hea xarak Hanv Assiriechea razachea chopkeantlim soddoitolom; Mhojê khatir ani Mhojea sevoka Davida khatir Hanv hem xar rakhtolom. "'
7. Izaiasan zobab dilo: 'Apnnem sanglam tem Apunn kortolo mhonn dakhounk khud Sorvespor hik hunna dita:
8. Polle, Ahazachea voilea kuddachea panvddeancher poddlea ti denvtea suriachi savlli Hanv atam dha panvlam pattim ghetam.' Ani dha panvlam fuddem pavloli suriachi savlli dha panvlam pattim geli.
9. Piddentlo boro zaun Hezekia razan ghôddlolem git hem:
10. Hanv oxem chint'talom: Mhojê tornnê piraier sonvsar sanddun vochunk zai; urlolim vorsam Norkant hanvem atam sarunk zai.
11. Hanv oxem chint'talom: Jivea mon'xanchea desant Sorvesporak dekhcho na, prithver jietoleantlea ekleak porian dekhcho na.
12. Gonvlliachea tombu vori mhozo tombu kann fenktai. Vinnpia vori jinn mhoji kovllun kuxin dovortai. Chokra-suta sarki ti toddun katrun uddoitai. Fantea thaun rati porian jiv mhozo khait asai.
13. Sokall porian vatt polleun, hai-hui korun rat kaddtam. Mhojim haddam To sogllim xinva bhaxen môdd'n môddta.
14. Xerka bhaxen hanv roddtam, kovddea vori pinrgotam. Dolle thokle voir polleun: Chèplam,Saiba: pav mhaka!
15. Koso mhonnun uloum hanv? Kitem mhonn Taka sangum? Zata titlem Toch korta! Mhojem vaitt kaddlãi dekhun, jivit-bhôr Tuka mhoima!
16. Sorvespor Apleank rakhta, tanchê modem hanv asam. Mhaka boro kor'n Tannem novi jivxokti dilea.
17. Khônt geli, aili xanti. Mornna-Norka khorintlo Tunvench rakhloi jiv mhozo. Sogllem mhojem pap Tunvem nodrê velem bhair marleim.
18. Norôk Tuka kirtina, Moronn Tuka vornnina. Khorint vetat tim sogllim Tujea utrak ravonant.
19. Jivim asat tinch Tuka mhojê bhaxen kirtitat. Bapui bhurgeank kolloitat Tuji ochôl bhasavnni.
20. Sorvespora, mhaka pav. Kin'noriô dhôr'n jivit-bhôr Tujea orchit Mondirant Tuka gitam gaitoleanv.
21. Izaiasan mhollem: 'Anjirachem molom' korun haddat ani tachea chovnak laiat, ani to boro zatolo.'
22. Hezekian mhollem: 'Hanv Sorvesporachea Mondirant choddun vetolom mhonn kosli khunna tum mhaka ditai?'
