1. Utth, Siona! Utth! Bollachi nhesônn ghalun ie. Nazuk sundor vostram nhesun ie, Jerusalea, Povitr Xara! Karonn sunôt na-kel'lo vô oxud'dh konnuch hea fuddem tujê bhitôr anink panvl ghalcho na.
2. Utth, koidi Jerusalea, tuji dhul'l fapddun uddoi! Sionachê koidi dhuvê! tujê mani veleô sanklli kaddun uddoi!
3. Kiteak oxem mhonntta Sorvespor: 'Tuka funkea vikun dil'li; funkea tuka mukti melltoli.'
4. Kiteak Sorvespor Dev oxem sangta: 'Magam Mhoji porza Ejiptant denvun geli ani porki porza koxi thoim ravli; magir Assirien karonna virêt tancher zulum' choloilo.
5. Mhonnttôch kitem korchem atam?'- uloita to Sorvespor! - 'Mhojê porjek funkea ubarn vheli dekhun, tanche dhoni apunn jikhle mhonn aroddtat,' - uloita to Sorvespor! - 'ani dôr-disa, thambonastana, Mhojea Nanvachi ninda korit asat.
6. Dekhun atam Mhoji porza Mhojem Nanv vollkhunk pavtoli ani heach pasot, to dis pavtôch, Zo tika oxem mhonntta: Ho polle, Hanv hanga asam! To Hanvuch mhonn tika gomun ietolem.'
7. Kitlim mhonn sobit panvlam tim dongra voilean cholun ieta tachim! Xubh sondêx to gheun ieta, diunk ieta xantichi khobor, soddvônn porgôtt korta! Sionak to oxem mhonntta: 'Tuzo Dev razvôtt choloita!'
8. Aik: tujea pahrekarancho tallo! Te aplo tallo borabôr ubartat, vhoddlean aplo anond gaitat, kiteak Sorvepor Sionak portun ieta to apleach dolleamnim te polletat.
9. Ghorttann zal'lea Jerusalea, zoizôi arddun gav, ak'khea xarant gazum-di tujea anondache ul'las Karonn Sorvespor Aplê porjek ghottai dita, Jerusaleak soddoita.
10. Sogllea raxttranchea dolleam mukhar, Sorvespor Aplo povitr bavllo zhuzak toiar korta ani prithvechea ximam porian somest mon'xam amchea Devachi soddvônn polletolim.
11. Cholat! Cholat! Thoinsorlim bhair sorat! Koslêch mhellê vostuk hat lavum nakat! Thoinsorlim bhair sorat! Sorvesporachim aidonam vahitoleamnô, nitoll zaun ieiat!
12. Punn tumi dhanvun-dhanvun vechim nant, par kaddun bhair sorchim nant. Kiteak Sorvespor tumchê fuddem vetolo ani tumchê pattlean astolo Israelacho Dev!
13. Polleiat, Mhojea sevokak ies melltolem, to vorto ani xrêxtt zatolo, bhov unch pavtolo.
14. Mon'xachem rupuch taka naslem! Nodrek to itlo sôb-naslolo zal'lo ki taka polleun lôk sarkoch thottaklo!
15. Toxench atam zaitim raxttram thottak zatolim, ani tachê mukhar raza zap nastana urtole, kiteak kodinch sangunk nasloli ghòddnni te polletole, ani kedanch aikunk nasloli vôst te dekhtole.
