1. Devak manovlolim mon'xam mortat, punn konn tanchi porva korina. Bhoktivont mon'xank ubarun vhortat, punn Devak manovlolea mon'xank vaittantlim nivarunk tankam ubarn vhelim mhonn konnuch somzona.
2. Tankam xanti bhôgunk melltoli; jim konn nitt margan choltat tankam mornnant visôv melltolo.
3. Punn tumi, ghaddinnichea bhurgeamnô, ieiat fuddem! Pordvarachi ani xindollkechi sonsôt tumi!
4. Konnacheô moskoriô kortat tumi? tondd ugddun konnak mhonn jib bhair kaddun dakhoitat? Patkachim bhurgim-ballam nhoi kai tumi, fottkiri zat nhoi tumchi?
5. Sindur rukham tolla ani khoinchea-I pachvea-hirvea zhadda pondak kamchar kortat tinch nhoi kai tumi? ani vhallamnim, khoddpanchea khanchimnim, tumcheanch bhurgeam-ballanchem bolidan kortat nhoi tumi?
6. Tôr vhallantle gullgullit fator zatole tuzo vantto, hôi, tech zatole tujem daiz. Tankam tunvem pinneachim orponnam kelim, tankam dhanneacheô-i bhettovnniô keleô: hãnnim Hanv proson'n zatolom kitem?
7. Eka bhov unch porvotar choddun tunvem tujem antrunn sôddun ghaleim. Tujim bolidanam bhettounk thoinsor-ui tum choddun gelii.
8. Dara pattlean ani darachea khambeam pattlean tuji khunnau barun dovorlii, Hôi, Mhaka patt korun, tunvem tuji kudd vinglli kelii, ani bichannem rund sôddun, tacher tum add poddlii. Zanchê kodde add poddunk tuka avoddta, tanchê lagim tunvem faideachi koblat kelii; tanchem vinglleponn dolleamnim bhôgun, portun-portun tanchê lagim xindollki kelii.
9. Angak tel ani domdomit pormôll lavun, tum Moleka-xim gelii; tujea dutank tunvem pois-pois dhaddlei, khôl-khôl patalla porian tum denvun gelii.
10. Pois-pois poinnam korun tum thoklii, tori 'kosloch faido na!' oxem tunvem kodinch mhonnunk naim. Tuka novean jiv bhòrlo mhonn polleun, tuji adli chal tunvem soddunk naim.
11. Konnachi tuka bhirant disli? Konnem tuka bhenkddaili? Na tôr, kiteak mhonn Mhaka sôddun diloi? kiteak mhonn Mhozo ugddas korunk naim? Tujea monantlo kiteak Mhaka sarkoch bhair ghaloi? Khub vêll Hanv ogoch ravlom dekhun, tunvem Mhojem bhem dhôrunk naim kitem?
12. Punn atam hem tujem promannikponn koslem tem ugddapem korun ditam; tunvem kelãi titlem kiteakuch upkarchem na.
13. Tum adar magun ulo martai tedna, tujê bhonvtim ektthaim kel'leô tujeô murti tuka soddounk ieum. Varean teô ubun vetoleô, êk funk tankam ubarn vhortoli. Punn jim konn Mhojer visvas tthevtat, tim ho dês aplem daiz mhonn zôddun ghetolim, Mhozo povitr dongôr apnnanchê adhin kortolim.
14. Bhôrun haddat, bhôrun haddat, vatt meklli korun diat, Mhojê porjechê vattê veleô soglleô addkholli kaddun uddoiat!: oxem To mhonnttolo.
15. Kiteak Zo sasnnak jivo asa ani Zachem Nanv Povitr, toch Vorto ani Xrêxtt Pormespor oxem uloita: 'Unchlea ani povitr zagear Mhojem tthikann, punn khontibhorit ani khala poddloleam-i mon'xam sovem Hanv asam; khala poddloleank Hanv ubartam, khontovloleank Hanv novea jivan bhôrtam.
16. Kiteak sodam-sodam guneanv korit ravunk Mhaka mon na, sodankal rag dhôrun ravchi Mhaka khuxi na: na tôr, Mhojê fuddem mon'xachem mon moddon poddpachem, Hanvench rochlolo jiv virun vochpacho.
17. Tanchea khotteponnak ani svarthak lagun Hanv tiddlom, ragan Hanvem Mhojem tondd portilem ani tankam xikxa dili. Toripunn, nibôr manichim zaun, apnnank zai tich vatt tãnnim dhôrli.
18. Tanchi chal Hanvem dekhlea, punn Hanv tankam borim kortolom, tankam Hanv borea margar vhortolom, tankam ani tanchê pasot dukh kortoleank Mhoji bhorpur buzvônn ditolom,
19. ani oxi tanchea onttantli vakhann'nni upzoitolom. Xanti, poixileank-lagxileank xanti, mhonntta Sorvespor, Hôi, Hanv tankam borim kortolom.'
20. Punn khottim mon'xam uchambôll zal'lea ani thôndd ravunk xokona toslea doria sarkim: tachim udkam xevttun uddoitat fokot chikôl ani mhêll.
21. Khottea mon'xank xanti na,' mhonntta mhozo Dev.
