1. Damaska vixim bhakit: Polleiat, Damask anink xar koxem urchemna, tachi zatoli nisonttonachi ras.
2. Lôk tachim nogram sarkinch sôddun vetolo, hanchim zatolim hinddank chorovachim moidanam. Thoim te ravtole ani konnuch tankam dhanvddauncho na.
3. Efraimachem kott nanch zatolem, toxich Damaskachi razvôttki; Israelkaranchea voibhovachi zali toxich, zatoli Aramachea urlolea zomeachi gôt. Uloita to Sorvespor!
4. Tea disa Jakobachem voibhov denvtolem, motto aslo to zatolo barik;
5. Zoxem lunvnnê uprant êk monis urlolim konnsam kapun kovoll korta, vô zoxem Refaimachea falkeant lunvnnê uprant urlolim konnsam kaptat, toxench hanga-i zatolem:
6. fokot urlolim konnsam punzaitolim. Zoxem zoitunachem zhadd haloitat tedna zata, toxench hanga-i zatolem: don vô tin zoitunam unchlê khandiecher urtat, ani char ki panch zoitunam zhaddachea dusrea khandeancher - uloita to Sorvespor, Israelacho Dev!
7. Tea disa mon'xam aplea Rochnnara vatten portotolim; tim aple dolle Israelachea Povitr Deva thaim ubartolim.
8. Apnnench bandlolea vedim-xim tim portochim nant, apleanch bottamnim ghôddlolea Ashera-devichea khambeancher ani dhumpa-vedincher tim dolle ghalchim nant.
9. Israelachea putam-dhuvanchê vatter aslolea Amorkaranchea ani Hivkaranchea xaram-nogrank ghòddlolem toxench, to dis pavtôch, lôk tujim xaram-nogram sôddun vetolo: tanchem zatolem ek osadd poddlolem oronnem.
10. Kiteak tujea taronnachea Devak tum visorloi, ani tujea bollachea Khoddpak tunvem monant dhôrunk naim. Karonn Adonis devachea manak tum bagô laitai ani porkea devank bhettoil'lim zhaddanchim biam roitai;
11. jea disa tim roitai, teach disa tim kirlo-xim kortai, novo sokall uzvaddlo toso tunvem roil'lea zhaddank fulam zatat. Punn vaittachea ani ilaz-naslolê dukhichea disa tuji pikavôll nanch zatoli.
12. Arêrê! Vorixtt fouzancho gollbollo, goroztolea doriam sarko! Gollbolltolea raxttrancho gollbollo, goroztoleam udkanchea lotta sarko!
13. Goddgoddea udkanchea lotta bhaxen raxttram goddgoddtat. To tankam dhomkaita, ani tim pois-pois pollun vetat; dongrancher varean ubtolea pola bhaxen, vadolla mukhar dhullichea bhonvrea sarkim, tim nanch zatat!
14. Sanz zatôch, soglloch akant; sokall pavchê adim, tim nanch zatat. Amkam luttleant tanchem noxib hem! Amkam nagoileant tanchem nirmonn hem!
