1. Denv sokla! Dhul'lint bos, Babilioniechê ankvar dhuvê! Zomnir bos, xinvason na tuka, Kaldeikaranchê dhuvê! Monzull ani modhur mhonnun konn tuka anink lêkhcho na.
2. Chol utth, atam dantear bosun tujem pitth dôll. Tuji ôl kadd, tujea ghagreak kas mar, tuje pãi ukte dovor, nodi utrunk lag!
3. Vinglli zaum-di tuji kudd, soglleank dixtti poddum-di tuji loz. Hanv sudd gheunk vetam, konnuch Mhaka addauncho na!
4. Amcho Tarôk mhollear Israel Povitr mhonn vondita To - Tachem Nanv Sorvsoktivont Sorvespor!
5. Ogich bos, kallokhant rigun rav, Kaldeikaranchê dhuvê! Kiteak fuddarak tuka konnuch rajeanchi dhoninn mhonnun lêkcho na.
6. Mhojê porjecher ragar zaun, Mhojem daiz Hanvem bhoxttavonk sôddlem, tujea tabeant Hanvem tankam poradhin kelim. Punn tunvem tankam doiamoia dakhounk naim, mhatareancher porian tunvem tujem zum bhov zodd keleim.
7. Tunvem oxem chintleim: 'Hanv sodanch ranni zaun astolim.' Hea ghòddnniancher tunvem lokx ghalunk naim, ani tancho xevôtt konn zait to tunvem chintunkuch naim.
8. Atam hem aik, kamchari ostoriê! Huskeavinn bosun, tujeach monant oxem chint'talii: 'Hanv eklinch, dusri anink na! Hanv kodinch vidva zaunchim na, bhurgeam-ballanchea dukhant hanv kednanch poddchim na.'
9. Toripunn okosmat, ekach disa bhitôr, him don-ui noxttam tujer xevtton poddtolim. Hôi, ovchituch,tujer xevtton poddtolim mel'leam bhurgeanchem dukh ani vidvaponn! Sogllim tujim ghaddiponnam ani tujim gunnadik montram-tontram kiteakuch upkarchim nant!
10. Tujea khotteponnacher patieun tunvem chintleim: 'Mhaka vicharunk konn na!' Tujea xanneponnan ani tujea gineanan tuka bhuloili. Tujeach monant tum mhonnttalii: 'Hanv eklinch! Dusri anink na!'
11. Dekhun tujer noxtt denvtolem, tujea montram-tontramnim pois korunk zaina toslem; tujean vattaunk zaina tosle hal tuka bhògche poddtole, kodinch chintunk naslolo kall ovchit tujer ietolo.
12. Jim montram-tontram ani ghaddiponnam tujê tornnê piraiê thaun xikunk tum thoklii, tim dhôrun rav atam. Ghoddiê tim tuka faideak poddtolim! Tanchê vorvim tum ghoddiê bhirant ghalunk pavtolii.
13. Budhvontanchem mot gheun-gheun Tuka puro zalem: noketram polleun-polleun fuddarak tuka kitem zatolem tem mhoineachea mhoineak tuka sangtat, tea jiotixiank ieum-di atam fuddem ani tuka soddoum-di.
14. Polle, te apunnuch tonnachea penddkula sarke: ujeant tancho bhosm zaun vetolo. Ujeachea zallantlo aplo jiv tanchean nivarunk zauncho na. Xêk gheunk ani dhogtto korun bosunk upkartat tosle inglle nhoi te!
15. Osle tuka zatole tuje ghaddi-montri: tujea tornnattponna thaun tanchi seva korun thoklii tum, tori atam te ek-eklo ap-aplê vatten vetole, tuka soddounk tanchê modlea konna kuch tank na.
