1. Sorvespor oxem mhonntta: Sorg Mhojem xinvason ani prithum' Mhojea pãianchi monnoi; tôr koslem mhonn ghor tum Mhaka bandun dixi? Hanvem visôv ghevpak koslo mhonn zago Mhaka toiar korun dixi?
2. Heô soglleô vostu Hanvench keleat, ani teô soglleô Mhojeôch! mhonntta Sorvespor. Punn jim konn khaltea monachim ani khontibhorit kallzachim, jim Mhojea utrak bhiddeun kamptat, oslea mon'xanchê vatten Mhoje dolle oddon vetat.
3. Punn hea sogllea lokan ap-apnnak zai ti vatt dhôrlea; kanttallo haddpachea ritimnim tankam sukh bhògta: padde martat borem asa, punn mon'xancho-i jiv kaddtat; menddracho iôdn kortat hem-i borem asa, punn sunneachi gomtti pilltat; orovachim danam haddtat khorem, punn dukrachem rogot vôptat; somoronnacho dhump zolloitat, hem-i khorem, punn kuddea-i devank bhôztat.
4. Toxench tancher nirbhag haddun Mhaka sukh bhògtolem, jea kiteachem tankam odik bhem dista tench Hanv tancher dhaddtolom. Kiteak Hanvem ulo kelo ani konnench zap diunk na, Hanv uloilom ani konnench chit diunk na. Jem Mhojea dolleam mukhar vaitt, tem tãnnim kelam; jem Mhaka kanttallo haddta, tantum tankam sukh bhògta.
5. Jim tumi Sorvesporachea utrak bhiddeun kamptat, Tachea utrak atam kan diat. Tumcho dvês kortat ani Mhojea Nanva pasot tumchi beporva kortat tim tumchim bhavbhoinn oxem mhonnttat: 'Sorvesporan Apli mhoima dakhounchi, oso tumcho sontôs ami polleuncho!' Punn tankam soglleank Hanv lojek ghaltolom.
6. Aikat! Xarant gollbôll! Devmondirant-thaun êk tallo gazta! Sorvesporacho tallo to, Aplea dusmanank khast lavunk To ieta!
7. Ballonterak pavchê adinch tinnem zolm dilo. Ballonterache vollvolle suru zaunchê adinch tinnem eka bhurgeak zolma haddlem.
8. Osli gôxtt ghòddloli konnem tori aikolea zait? Konnem tori osli ghòddnni dekhlea zait? Eka disa bhitôr êk dês zolma iet mhonn asa? eka khinna bhitôr ek raxttr utpon'n korunk zait? Punn Sionacheô ballonteracheô dukhi ozun suru zaunk nant, tori tinnem aplea bhurgeam-ballank zolm dilo.
9. Hanv kitem kusvo ugôddtolom ani zolma haddcho na? oxem vicharta Sorvespor. Zolma haddta to Hanv, ani Hanvuch kusvo dhampun dovortolom kai? oxem mhonntta tuzo Dev.
10. Jim tumi sogllim Jerusaleacho môg kortat, tichê borabôr khuxal zaiat, tichê pasot sontosbhorit zaiat! Jim tumi somest tichem dukh korun asleat, tichê pasot khuxalkaien murgottat!
11. Buzvônn ditolea tichea hodd'ddeantlem dud pieun, tumi dhadoxi zaiat. Tichea bhòrlolea hodd'ddeantlem pieun pieun sukh-sontôs bhôgat!
12. Kiteak Sorvespor oxem sangta: 'Ticher Hanv nodi porim xanti vhanvo-xi korunk vetam, ani ghosghoxit vhanvtea vhalla vori raxttranchi mhoima. Tumkam ti aplem dud pieunk ditoli, aplê manddier ubarun vhortoli ani aplea dhomprancher khelloitoli.
13. Zoxi êk avoi aplea ballkak somadhan korta, toso Hanv tumkam somadhan kortolom, Jerusaleant tumchem somadhan zatolem.
14. Hem polleun tumchem kalliz anondan bhoron ietolem, tumchem ang tonna vori novean rosroxit zatolem, Aplea sevokam khatir Sorvespor Aplea hatachem boll dakhoitolo, punn Aplea dusmanank Aplo krôdh.
15. Polleiat, Sorvespor ujeachea rothar ieta, vadolla sarke Tache roth ghunvon ietat; lasun lasun, Aplea ragacho uzo onkun onkun, Apleam dhomkavnniank ujean pallo diunk To ieta.
16. Karonn Sorvespor ujean mon'subi korunk ieta, sogllea porzanchi tolvarin zhôddti korunk To ieta. Sorvesporan marun uddoil'leancho hixôb ascho na!
17. Bagê modem aslolea fuddariacho pattlav korchê khatir, jim konn bagent bhitôr sorunk apnnanchich povitravnni ani xud'dhi kortat ani dukrachem mas, ollxik mhêll ani undir khatat, tim sogllim aplea kortubam ani chintnam soit ekach farak nattak zatolim, - uloita to Sorvespor!
18. Sogllea raxttrank ani veg-veglleô bhasô uloitolea lokank Hanv zoma korunk ietam. Tim Mhoji Mhoima polleunk ietolim.
19. Hanv tankam êk khunna ditolom ani tanchê modem jivim urleant tantlea thoddeank Tarshish, Put, Lud, Meshekh, Tubal ani Javan, hea raxttram-xim dhaddtolom; hea poixilea kinarianchea ani zunveanchea lokamnim Mhoji khobor kednanch aikunk na ani Mhoji mhoima kodinch polleunk na. Tôr hea sorv raxttrank tim Mhoji mhoima porgôtt kortolim.
20. Zoxem Israelkaram nitoll aidonamnim aplim danam Sorvesporachea Ghorant gheun ietat, toxem tim - mhonntta Sorvespor - sogllea raxttrantlim somest tumchea bhavam-bhoinnink ghoddeancher, rothamnim, machilamnim, kochriancher ani unttan-cher bosoun, Sorvesporak ek dan koxem Jerusaleak, Mhojea povitr dongrar, haddtolim.
21. Tantlea kãi zannank Hanv iadnik ani Levit kortolom - mhonntta Sorvespor.
22. Karonn, zoxem Hanv rochunk vetam to novo sôrg ani novi prithum' Mhojê mukhar togtolim, toxem tuji sonsôt ani tujem nanv sodankal togtolim.
23. Êkê Amaxê thaun dusrê Amaxê porian, eka Son'vara thaun dusrea Son'vara porian, sogllem mon'xakull ietolem ani Mhojê mukhar saxttangim poddtolem, mhonntta Sorvespor.
24. Ani bhair sortana tim Mhojer kolpol'lea mon'xanchim moddim polletolim; kiteak tanche kidde kodinch morche nant, nhoi mhonn tancho uzo kednanch palvoncho na, ani tankam polleun sogllea mon'xank kanttallo ietolo.
