1. Ho polle Sorvespor prithvechem nisontton korta, tika osadd korun sôddta, tika kurup korta; ticher jietoleank zollim-mollim ximpddaita,
2. iadnikank toxench sadhea lokak, dhoniank toxench gulamank, dhoninink toxench chakornink, viktoleank toxench viktem ghetoleank, uxnnem ditoleank toxench uxnnem ghetoleank, rinn ditoleank toxench rinn kaddtoleank.
3. Sorvesporan formailam toxem, prithvechem ghorttann zatolem tem zatolench, tichi luttnni zatoli ti zatolich.
4. Prithvi dukh korta, ti sukon veta, sonvsarantlo kullivont lôk bavon-soddon veta.
5. Ticher jietoleanchea pãiam tolla prithvi bhoxttolea, karonn tãnnim somurt maddoili, kaido tôddlo, sasnnik korar môddlo.
6. Dekhun xirap prithvek girasta ani ticher jietoleank tachi khast bhògchi poddta; hea pasot prithvechim mon'xam lason geleant ani bhov thoddim ozun urleant.
7. Novea soreak bolluch na, dak-vêl soddon veta, sontosbhorit aslim tim kallzam atam haskar-suskar sôddtat.
8. Dholkeancho khuxal avaz bond poddlo, mouz martoleancho sad thamblo, vinneacho khuxal nad bond zalo.
9. Atam soro pietana konn gitam gainant, bebdeank-sunnddeank porian fenni ani koddok soro koddu lagtat.
10. Luttlolea xaracho bhông zala, dôr-eka ghorachem dar bond asa, konnacheanuch bhitôr vochunk zaina.
11. Soro na mhonnun, bhair rosteancher vilap kortat; sontôs mhollear sarko nanch zala, anondak desantlo bhair ghalo.
12. Xarant fokot xenkaro, darvontteancho zala churo.
13. Zoxem zoitunam zhoddounchea vellar zata, ani zoxem dakanchea pika somoiar dakô kaddun zalea uprant ghòddta, toxench prithver raxttram modem zatolem.
14. Tim aplo tallo ubartat, anondan gaitat; Ostomtê thaun tim Sorvesporachi thorai vakhanntat:
15. Oxench Udentek tumi Sorvesporak mhoima diat, doriantlea zunveancher Israelachea Devachi, Sorvesporachea Nanvachi, kirti gazoiat.'
16. Prithvechea ximam thaun oslim gitam amkam aikunk ietat: 'Zo Dev doia korun nitivont, Taka mhoima!' Punn hanv mhonnttam: 'Kosle mhonn dogd-vollvolle! Kosle dogdvollvolle! Kitlo mhonn hanv dolldiro! Ghatki mon'xam ghat ghetat!' Koslem mhonn ghatkeponn hea ghatkianchem!
17. Prithvecher ravtoleamnô, tumkam fokot kampero, khondd ani fas:
18. Jim konn kampereachi killônch aikun pollun vetat, tim khonddant poddtolim; ani jim konn khonddantlim utthun bhair sortat, tim fasak sampoddtolim. Hôi, mollbacheô mannsô ugòddtoleô ani prithumechi buniaduch kamptoli.
19. Prithum' futtun, tiche zatole kuddkean'-kuddke, prithum' fanttun fallon vetoli. Prithum' koddkoddtoli ani kamptoli,
20. eka bebdea bhaxen prithum' lòktoli, êkê khompttê bhaxen ti haltoli; tichea opradhancho bhar itlo zôdd tika lagtolo, ki ti sokla poddtoli ani portun kodinch utthchi na.
21. Tea disa, Sorvespor khast laitolo: mollbar, mollbachea fouzank, prithver, prithvechea razank.
22. Tankam To zoma kortolo, ekê andharkhonnint koidi kortolo, bondkhonnint dhampun dovortolo ani, khub vorsam uprant, tankam xikxa laitolo.
23. Chondrim' lojen aplem tond ddhamptolo, suria-kui loz bhògtoli, kiteak Xionachea Dongrar ani Jerusaleant, Sorvsoktivont Sorvespor razvôtt choloitolo, ani tanchea malgoddeam mukhar Tachi mhoima porzolltoli.
