1. Je konn onitiche nirnnoi ghetat ani zulmache kaide ghôddtat, tancher xirap!
2. Lhanank durbolleank te nit korun dinant, Mhojê porjentlea goribanche hok'k maddoitat; vidvank te lutt'tat ani onathank nagoitat.
3. Pois thaun tumcher jedna noxtt ietolem, tea Zhôddtechea Disa kitem kortoleat tumi? Konna-xim mhonn tumi dhanvun xeronna vetoleat? Tumchi dovlôt-girestkai khoim mhonn dovortoleat?
4. Koidiam modem ukoddeam bosunk ani loddaient marloleam modem poddun morunk, hi êkuch zatoli tumchi gôt. Tori punn Tacho rag thôndd zalo na, Tacho hat ozun ubarloloch asa.
5. Assiriechea razacher xirap! Mhojea ragachi betkatthi to, tachea hatant asa Mhojea krodhacho danddo!
6. Dev-dhôrm naslolea raxttra add Hanv taka dhaddtam; zai toxem luttunk ani nagounk, rosteanchea chikla bhaxen tika maddounk, Mhaka tiddoitolê porjê add Hanv taka odhikar ditam.
7. Punn tachi ievzônn oxi nasli, tachea monant oxem naslem. Na, fokot nas korunk, raxttra pattlean raxttr khaun uddounk, hem tachem sopon aslem.
8. To mhonnttalo: 'Mhoje soglle sordar raza nhoi kai?
9. Kalno-xar Karkemisha sarkem nhoi kai? Hamat-xar Arpada sarkem nhoi kai? Samaria-xar Damaska sarkem nhoi kai?
10. Murtink bhettoil'lim rajeam mhojea hatak sampoddlim; Jerusalea ani Samariê poros nokxil'lea murtimnim tim odik ut'tom aslim.
11. Zoxem hanvem Samariek ani tichea murtink kelem, toxench Jerusaleak ani tachea murtink korcho na kai?'
12. Jedna Pormespor Sion Dongrar ani Jerusaleant korchem asa tem sogllem Aplem kam' sadhun sompoitolo, tedna Assiriechea razak tachea kallzachea gorvak lagun ani tachea dolleanchê urmottaiek lagun To xikxa laitolo.
13. Kiteak to oxem mhonnttalo: 'Mhojeach bavlleachea bollan hanvem hem kelam, ani mhojêch budhin, kiteak hanv zannvaien bhòrlolo; raxttrancheô ximô hanvem kaddun uddoileô ani tanchim bhanddaram luttun ubarlim. Vira sarko hanvem thoim ravtolea lokank pãiam tolla mostile.
14. Ghontterant hat ghal'lê porim, mhojea hatan raxttranchi dhon-girestkai dhôrun ubarli. Sôddlolim tantim konn-ui ubarn vhorta toxem, sogllo sonvsar hanvem mhojea hatant ghetlo, tedna konnench êk paktto porian halounk na, konnachich chônch ukti zaun killbillunk na.'
15. Kuradd hatan dhôrun vavurta
16. tea mon'xa mukhar khud kuradd mijas korit kai? vô khorvont dhôrun katortolea chirpia mukhar khorvont apli boddai sangit kai? Hôi zalear, danddo ubartolea mon'xak khud danddo domaita, ani lankddacho nhoi taka betkatthi choloita, oxem mhonnchem poddlem. Dekhun Sorvsoktivont Sorvespor tachea bollvont zhuzariancher boll môddta tosli pidda dhaddtolo; tachea dobajea ponda zolltea ujea sarkem ek agttem pett'tolem.
17. Israelacho Uzvadd zatolo uzo, tancho Povitr Dev zatolo ek agttem; ekach disa bhitôr tancheô kanttiô ani sorantte To ulpaun girastolo.
18. Tachim matlolim ranam ani tache pikall molle To nas korun uddoitolo, kuddi-otmea soit taka nattak kortolo; virun veta toslea piddest mon'xa sarki tachi gôt zatoli.
19. Tachea ranantlim urtat tim zhaddam itlim thoddim zatolim ki eka bhurgeachean legun tim mezunk zatolim.
20. Tea disa, Israelacho urlolo zomo ani Jakobachea Ghoranneantlim ozun jivim urleant tim tankam mar ditolea mon'xacher anink patieunchim nant, punn Sorvesporacher, Israelachea Povitr Devacher, khoreponnim visvas dovortolim.
21. Êk urlolo zomo, Jakobacho urlolo zomo, Bollixtt Deva sorxim portun ietolo.
22. Israela, tuji porza vellechê renvê itli zait, tori fokot êk urlolo zomo portun ietolo. Nisonttonacho nirnnoi dil'lo asa; tantlem upzun ufallon ietolem promannikponn.
23. Hôi, Dhoni, Sorvsoktivont Dev, tharail'lem nisontton haddtolo to hadd toloch.
24. Dekhun Dhoni, Sorvsoktivont Dev, oxem mhonntta: 'Sionant jietolê Mhojê porjê, tuka betkatthien mar ghalta ani tujer danddo ubarta tê Assiriechem bhem dhôrum naka.
25. Thoddea vellan, bhov thoddea vellan, ragacho zall palovtolo ani Mhozo krôdh tancho nas kortolo.
26. Zoxem eka vellar Orebachea Khoddpa lagim Midianak Tannem mar ghalo, zoxem magam Tannem doriacher add Aplo danddo marlo ani Ejipta thaun ietolea rosteacher to ubarlo, toxench Sorvsoktivont Sorvespor chabuk gheun taka sottaitolo.
27. Tea disa, tannem tujer ghala to bhar tujea khanda velo poddtolo, tachem zum tujê manir anink urchem na, tem mòddtolem.
28. To Aiatak pavlo, Migronantlean chol'lo, Mikmasak tannem apli mustaiki dovorlea.
29. Te gholantlean cholun gele, Gebant pennem korun asat. Ramacho lôk thorthorta, Sauluchea Gibeiasacho lôk par kaddta.
30. Bat-Gal'limachea mon'xamnô, vhoddlean bobô-hueli marat! Laisha, kan di! Anatot, zap di!
31. Madmenacho lôk pollun gelo, Gebimcho lôk lipun ravla.
32. Aizuch to Nobak thambtolo. Ani Sion-Xarachea dongrak, Jerusaleachê dongrek, apli mutt dakhoitolo.
33. Ho polleiat Dhoni, Sorvsoktivont Dev, zhoddzhoddit khandiô marta! Unch rukhanchem mathench kapun uddoita, odik unch-gorvi te khala xevttita!
34. Ranantle rukh ani jhilkuttam To kuraddin katorta, ani tezvont Lebanon konsllon poddta
