1. (a) Dorxonachea Falkea add bhakit:
2. (a) Ê boballtolea, ghoddghoddtolea nogra, mouz martolea xara! (1b) Kiteak mhonn sogllim borabôr ghoranchea pattasancher choddtat tumi? (2b) Tujê bhitôr marloleank torvarin marunk nant, Tujê bhitôr meleant tim zhuzant poddun morunk nant.
3. Soglle tujê sordar pollun gele, dhonu soddchê adinch tankam koidi korun vhele; je konn pois-pois pollun gel'le, tankam-i ekach farak sampddaile.
4. Dekhun hanv tumkam sangtam: 'Mhojê vele tumche dolle kaddat, mhaka dukamnim roddum-di; mhojê porjechê dhuvecho nas kelo mhonnun mhaka buzoum nakat.'
5. Kampereacho, uchambollaiecho ani ghorttannacho dis ho: Dhonian, Sorvsoktivont Devan, to ghoddun haddla. Dorxonachea Falkeant kottachem ek durig konsllaun uddoilem, adar magun lokacheô bobô porvotam porian pavtat.
6. Elam' aplo bhato dhôrta, Aram' aplea ghoddear bosta ani Kir aplo dhal bhair kaddta.
7. Tujim bhov sobit falkim rothamnim bhòrleant ani ghoddesvar vollim-vollimnim darvontteam-xim ube ravleat.
8. Hê bhaxen bhongli Judachi rakhônn. Tea disa tunvem Ranantlea Ghorachea darukhannea vatten dolle lailei.
9. Davidachea Xarachea Kottak kitlê-kodde khavttem poddlam tem tumi dekhlam. Sokoilê tollientlim udkam tumi zomoilim.
10. Jerusaleachim ghoram tumi mezun kaddlim ani kottachem durig mozbut korunk ghoram tumi moddun uddoilim.
11. Modem, adlê tolliechea udkam pasot don vonntim modem tumi êk santthvônn bandli. Punn Zannem hem sogllem kelam, Taka tumi chit diunkuch na. Purvim thaun hem sogott akarlam Tacher tumi dolle lavunkuch nant.
12. Tea disa, Dhoni, Sorvsoktivont Dev, rudon korunk ani vilapunk, tokli tasunk ani penkttak sakafottem bandunk tumkam apoitalo;
13. punn polleunk gelear, tumi kortat khuxali ani mouz, boil martat ani menddram katortat, mas khatat ani soro pietat: 'Khaum-ia, pieum-ia, kiteak faleam ami mortoleanv.'
14. Sorvsoktivont Sorvesporan mhojea kanant hem utor ghalem: 'Dubava virêt tumi moro-sôr hea patkachem farikponn tumkam mellchem na' - oxem sangta Sorvespor, Sorvsoktivont Dev .
15. Oxem sangta Dhoni, Sorvsoktivont Dev: Shebna odhikariak, rajnivasachea karbhariak, mellunk voch.
16. To apnnak unch zagear êk somadhi toiar korta, khoddop katrun to apnnak êk zago toiar korta. Taka vichar: 'Hangasôr tujem kitem asa? Tuka hea zagearêk somadhi toiar korunk konnem tuka hôk'k dila?'
17. Polle, Sorvespor tuka xevttun uddoita, ekach faran tuka sokla apttita; magir To tuka ghôtt Aplea chopkeant dhôrta,
18. ani tuka kovllun-revddun tuji êk guttli korta ani eka lamb-rund moidanar tuka xevttita. Hôi. Tum mortoloi, ani thoinsoruch poddtole tujê vhoddvikeche roth. Arê tum, tujea dhoniachea rajnivasachi loz tum!'
19. Tujê zuttiê velo Hanv tuka kaddun uddoitam, tujea zagea velo Hanv tuka nikllaitam,
20. ani teach disa Mhojea sevokak, Hilkiachea puta Eliakimak, Hanv apoitam.
21. Tujem anglem taka ghaltam, tuzo komorbond tachea penkttak bandtam, tuzo odhikar tachea hatant ditam; ani Jerusaleakarank ani Judachea Ghoranneak to êk bapui zatolo.
22. Davidachea rajnivasachi chavi tachea khandar Hanv dovortam: to ugddit tôr, dusro konn dhampcho na, to dhampit tôr, dusro konn ugôddcho na.
23. Ghôtt zagear eka khillea bhaxen, Hanv taka rombun dovortolom, aplea bapaichea ghoranneak to êk mhoimevont xinvason zatolo.
24. Tachea Ghoranneachi soglli mhoima tacher umkollon astoli: pinddka ani sonsôt, pivonn-patram ani bornniam soit sogllim lhan-lhan aidonam.
25. Tea disa - uloita to Sorvsoktivont Sorvespor! - ghôtt zagear rombun dovorlolo khillo ddogun poddtolo. To tovkean bhair sortolo ani sokla poddtolo. Ani tacher lambtalem tem sogllem bharadik vozon xevtton bhòngtolem, kiteak Sorvesporan oxem sangun dovorlam.'
