1. Tira vixim bhakit: Tarshisachea tarvamnô, killonchi marat, kiteak tumchea asreacho nas zalo. Kit'tim' ganva thaun ietana, vatter tankam hi khobor mell'lli.
2. Doriachê kinarer ravtoleamnô, Sidon'chea veapariamnô, thottak zaun ogech poddat! Tumchê tarvotti aplo mhal gheun somdirachea udkancher sogllê-kodden pavtale.
3. Xihoracho dhano-gotto, Nilachem utpon'n, hi tachi girestkai. Sorv raxttrank pavtalo to veapar.
4. Ê Sidona, lojen tokli pondak ghal kiteak oso uloita doria: 'Ballonterache vollvolle hanvem bhôgunk nant, konnak hanvem zolm diunk na, tornnattea cheddeank hanvem pôsunk nant, tornnattea cheddvank hanvem lhan-vhodd korunk nant.'
5. Tirachea noxibachi khobor Ejiptkarank pavtoli tedna, tim khontin vollvolltolim.
6. Doriachê kinarer ravtoleamnô,Tarshisak vochunk tarvar choddat, killonchi marat.
7. Hench kai tem, tumchem moujechem xar, bhov purvilea kallar bandlolem? aplea lokacheô vosnnukô desantorant sthapon korunk zachim panvlam taka pois-pois pavoitalim, hench gai tem xar?
8. Tir rajmukutt vantt'talem nhoi? tache veapari sordar asle nhoi? Ani tache savkar jogant vhodd-vhodd monis asle nhoi? Tôr konnem Tira add ho nirnnoi ghetlo?
9. Sogllea gorvixttanchi mijas chiklant rombunk ani jogantlea vhodd-vhodd mon'xank lojek ghalunk ho nirnnoi ghetlo Sorvsoktivont Sorvesporan.
10. Tarshisachea nagrikamnô, tumkam anink tarvam-bondir urunk na, tôr Nila-degechea pranta bhaxen, tumchi zomin kosunk portun ieiat atam.
11. Doria-degêvelim rajeam xevttun uddounchê khatir Tannem doriar Aplo hat vistarla; Kanaan'chea kottancho nas zauncho mhonn Sorvesporan nirnnoi ghetla.
12. Tannem mhollam: 'Agô bolatkar kel'lê Sidon'chê ankvar dhuvê, anink khuxali korum naka. Utth ani tarvar bosun Kit'timak voch; thoinsor-ui tuka visôv mellpacho na.'
13. Kaldeikaranchea desar nodor ghal: atam mol-naslolo lôk ho. Assiriekaramnim tankam savzanchea dantank sôddlim. Gopurancher choddunk tãnnim adde bandle; tanchim kottam môddun uddoilim, ani tanchem nisontton kelem.
14. Tarshisachea tarvamnô, killonchi marat, kiteak tumchea kottacho nas zala.
15. Tiracho ugddas ascho na. Punn hea sot'tôr vorsam uprant, Tir hea gitantlê xindôll bailê sarkem zatolem:
16. Agô tum, xindôll bailê, soglleamnim tuka sôddli; tuji kin'nori dhôr ani xarant bhonvunk voch atam, tankta titlê hikmotin vazoi, gitar git gavun dakhoi, ani oso tanchea monant tuzo ugddas zagoi..'
17. Sot'tôr vorsam bollanddlea uprant Sorvespor Tirak bhett ditolo. Aniêk pavtt tachê xidollkechi taka mozuri melltoli. Prithumechea sogllea rajeam kodde vochun tem apnnak bhaddeak ditolem.
18. Punn tachi zôdd ani mozuri Sorvesporak somorpil'li zatoli, ti bhanddarant urchi na, santthoun dovrunk mellchi na. Sorvespora mukhar jim konn jietat tankam subham' jevonn-posonn ani nazuk vostram gheupak tachi zôdd vetoli.
