1. Na! Soddvônn diunk Sorvesporacho hat mottvo zalo na, nhoi mhonn Tache kan aikunk bere zale nant.
2. Punn tumchea opradhamnim tumkam ani tumchea Devak doxim kortolem ek patall rochun haddlam. Tumchea patkank lagun To tumkam Aplem dorxon dina ani tumchim prarthonam aikona.
3. Karonn rogot vikraun tumche hat zaleat mhelle ani tumchea bottank tumchem noxtteponn chikttol'lem asa. Tumchea onttantleô bhair sortat fotti-lobaddiô ani khotteponn posrunk sursurtat tumcheô jibô.
4. Neainit rakhun konnuch neaisobhent apli firiad manddina, konnuch sota pormannem aplo khottlo choloina. Polkea utrancher patieun lottikponnam uchartat sogllim, peleak koxem vaitt korchem, oslea ievzonneancho gôrbh samballtat ani magir kornniamnim tem vaitt zolma haddtat.
5. Furxeachea tantiancher rovannek bostat ani mavlechem zall vinnun kaddtat. Tantlem ek tan tim khaxi, meloi tum; ek chirddun fôddxi, bhair sorta furxem!
6. Tãnnim vinnlolea mavlechea sutan nhesônn korum nozo, tanchea hatamnim kel'le kopdde ang pangrunk upkaronant. Tanchim kortubam mhollear fokot khotteponn, tanche hat kortat titlem-i zobordosti
7. Vaitt korunk tanche pãi suddsuddit dhanvtat, niropradhi rogot vikraunk kitli mhonn takit tankam! Tancheô ievzonneô soglleôch vaitt korpacheô, vetat thoinsor fokot desvatt ani nisontton.
8. Xantichea margachi tankam khoboruch na, tanchê vatter neainit nanch, tãnninch aple roste vankdde keleat, tea rosteancher panvl ghaltoleank kednanch xanti gavona.
9. Dekhun neainit amchê thaun pois-pois gelea ani promannikponn amkam lagim na. Uzvaddachi vatt polleit asanv, punn sogllêch kodden kallôkh; prokasachi axa monant, punn choltanv kallokhant.
10. Kudd'ddeam vori vonnôt sanspun-sanspun ami choltanv, dolle nasloleam bhaxen ami pattim fuddem sortanv. Tin 'sanam zal'lê porim donparchea vellar adllun poddtanv, mel'lea mon'xam bhaxen kallokhant amchem tthikann.
11. Asvelam vori ami sogllim goroztanv, parveam porim ami pinrgot asanv. Neaiachi vatt pollet asanv, punn tacho pot'toch na; soddvonnechi axa ballgun ravtanv, punn ti-i zalear pois geli.
12. Kitlê pavtti mhonn ami Tujer kolpoleanv! Amchim patkam amcher add sakxi ditat. Amche guneanv amchea dolleam mukhar asat, amchea opradhanchi amkam khobor asa:
13. Sorvesporacher ami kolpoleanv, Taka sanddun geleanv, amchea Devak ami patt keli, amchem ulovp mhollear zobordosti ani fituri, amchea kallzant gholloitanv fokot fottkirim utram, - hinch tim amchim patkam.
14. Devachê nitik ami dhanvddaili, Tachem doiallaiechem nitivontponn amchê thaun pois pavlem. Nakear sot adllun poddta, Promannikponnak somazant zago na.
15. Sot mhollear nanch, jim vaitt korunk kobul nant tinch zobordosti bhôgtat. Sorvesporan hem dekhlem, promannikponn na mhonnun Taka vaitt dislem.
16. Konnuch na mhonn Tannem pollelem, kitem-i tori korunk konnuch fuddem sorona mhonn Taka ojap dislem. Mhonnun Apleach bavlleachem Tannem boll ghetlem Ani, Aplench doiallaiechem nitivontponn dhôrun, To fuddem sorlo.
17. Hodd'ddear Tannem doiallaiechea nitivontponnacho ddhal korun ghalo ani Aplea mathear taronnacho tôp. Sudd gheupachim vostram ghalun Tannem Premaxechem avoronn bhuzancher uddoilem.
18. Ek-ekleak favo tem To farik korunk veta: Aplea xotrunk To Aplo krôdh bhôgunk ditolo, Aplea dusmanancho sudd ghetolo.
19. Ostomtechea lokak Sorvesporachea Nanvachem bhem distolem, ani Udentechea lokak Tachê mhoimechi bhirant, kiteak sanvrun dovorlolea, ani atam Sorvesporachea svasan lôttlolea, vhalla sarko To ietolo.
20. Punn aplim patkam sôddun ditat tea Jakobachea Ghoranneantleank soddounchê khatir, Sionant êk Soddvonnar ietolo - uloita to Sorvespor!
21. Sorvespor oxem sangta: 'Tanchê lagim Hanv oso korar kortam: tujer Hanvem pattoila to Mhozo Atmo ani tujea tonddant Hanvem ghaleant tim Mhojim utram atam thaun sodankal togtolim tujea tonddant, ani toxench tujea putam-dhuvanchea tonddant, ani tujea putam-dhuvanchê pinddkechea tonddant' - uloita to Sorvespor!
