1. Sorvesporacho Atmo mhojer asa, kiteak Sorvesporan mhaka obhixêk kela. Goribank bori khobor diunk, khontibhorit kallzacheank buzvônn diunk, koidiank suttka porgôttunk, bondkhonnint asloleank soddounk, Tannem mhaka dhaddla.
2. Sorvesporachê kurpechem voros ani amchea Devacho sudd gheuncho dis porgôtt korunk Tannem mhaka pattoila. Rudon kortoleank buzvônn diunk,
3. Sionant rudon kortoleank gobrachê svater êk mukutt, dukhachea vostram bodlek anondachem tel, niraxiponnachê svater utsovachi nhesônn diunk Tannem mhaka dhaddla. Apnnak mhoima zôddchê khatir Sorvesporan lail'le 'doiallaiechea nitivontponnache sindur', oxem mhonnun lôk tankam lêkhtolo.
4. Adim ghorttann zal'lim xaram tim novean bandtolim, adlea kallar padd zal'lim ghoram, tim novean ubartolim, desvatt zal'lim nogram, xenkddeamnim osadd poddlolim, tim novean bandun kaddtolim.
5. Porkim mon'xam tumche hindd chorounk ietolim, tumchim xetam nangrunk ani tumchêo dakô lavunk pordexi vavraddi astole.
6. Punn tumkam zalear 'Sorvesporache iadnik', 'amchea Devache sevok' mhonn tumkam pachartolim. Raxttranchi girestkai zatoli tumchem posonn, tanchê dovlotin tumi upott dhadoxi zatoleat.
7. Tankam hinnponn bhògchem poddlem dekhun, atam dupett mapan tankam man melltolo; beman sôscho poddlo mhonnun, atam tim anondan ul'lastolim; hôi, aplea desant sogllem tankam dupett mapan melltolem, ani tancho sontôs sodankal togtolo.
8. Kiteak Hanv, Sorvespor, neainiticho môg kortam, nagovnn ani khotteponn Mhaka kanttallo haddtat. Visvaxiponnan Hanv tankam favo tem inam' ditolom ani tanchê lagim sasnnak togta toslo êk korar kortolom.
9. Kirtivont zatolem tanchem kull sogllea raxttram modem, ani tanchi sonsôt sogllea lokam modem. Sorvesporan hê porjek Aplo axirvad dila, oxem tankam polletat titlim-i vollkhun ghetolim.
10. Sorvespora sovem hanv anondan murgott'tam, mhojea Deva sovem mhozo otmo sontosta. Fulanchea jhelean nettoil'lea eka novrea porim, rotnam-olonkaramnim xringarlolê êkê hoklê bhaxen, taronnachea vostramnim Tannem mhaka nhesoili ani doiallaiechea nitivontponnachea xelean mhaka guttlaili.
11. Zoxem zomnintleô kombri ôutpon'n zatat ani bagent biam kirlun voir sortat, toxench Sorvespor Dev sogllea raxttranchê nodrê mukhar doiallaiechem nitivontponn ani vakhann'nni kirlun voir soro-xim kortolo.
