1. Mhojê toklechi konn tori êk udkachi bãi korit ani mhojea dolleanchi êk zhôr korit? oxem mhojê porjechê dhuvechea marloleam khatir hanv dis-rat roddtolom.
2. Oronneant zôr mhaka vattsurachem biradd mell'llolem, kitlem borem zatem! Mhojê porjek soddun, tichê thaun koddsorun, pois-pois vetolom aslom! Kiteak tim sogllim Devak ovisvaxi, ghatkianchem penddem tanchem.
3. Dhonua bhaxen apleô jibô bagaitat; sot nhoi, punn fottingponn desant raj choloita. Tanchim khotteponnam choddot-vaddot vetat, punn Mhoji tankam vollokhna. Uloita to Sorvespor!
4. Ixtta-ixttinni lagim porian chotraien cholat, bhavak-bhoinnik legun patieum nakat, kiteak bhav zaum bhoinn zaum bhavak vô bhoinnik fottoun tancho faido kaddunk sôdtat, ixtt zaum ixttinn zaum ixtta-ixtinnicher lochanddam ghalit asat.
5. Ixttam-ixttinnink fosounkuch bhonvtat, Tanchea tonddant sot mhollear nanch; apleô jibô tãnnim lobaddiôch sangunk pazleat, Patkant romblolim, borea margar portun ieunk tankam khuxi nanch.
6. Khotteponna pattlean khotteponn, lobaddiê pattlean lobaddi! Mhaka vollkhun gheunk tankam mon na. Uloita to Sorvespor!
7. Hea pasot, Sorvsoktivont Sorvespor oxem sangta: Atam Hanv tankam agtteant ghalun tancho mhêll kaddun dakhoitolom ani tankam topasun kaddtolom: Mhojê porjek budh xikounk dusro anink upai na!
8. Tanchi jib êk pazlolo bann, Tanchea tonddantleô vhanvtat fokot lobaddiô. Xezariam lagim uloitana xanti gheun ietat mhonn dakhoitat, punn monant tankam manddtat fas.
9. Oslea kortubank lagun tankam Hanvem khast lavchi nhoi? Uloita to Sorvespor. Oslê porjecho Hanvem sudd gheuncho nhoi?
10. Porvotancher hanv rudon kortolom ani pinrgotolom, osadd poddlolea xetam-mollamnim vilapachem git gaitolom, kiteak tancho bhosm zala: konnuch atam tê vatten vochona, gorvam-menddrancho avaz thoim aikunkuch iena. Mollbavelim suknnim ani savzam, sogllim pollun gelim.
11. Jerusaleachem Hanv kortolom nisonttonn: thoim vostoleô fokot koleancheô dholi. Judachim nogram osadd poddlole ganv kortolom: thoim konnuch anink ravcho na.
12. Hem somzun gheunk konn tori xannim astit? Hachi somzonni dusreank diunk konna kodde tori Sorvepor uloila zait? Kiteak mhonn desacho nas zala? Kiteak mhonn oronnea vori to soglloch hulpola ani konnuch tê vatten anink vochona?
13. Sorvespor oxem mhonntta: 'Hem oxem zalam kiteak Hanvem tankam dil'li Somurt tãnnim sôddun dili ani Mhojea utrak tãnnim kan diunk na ani tem pallunk na;
14. portench zalear, apleach vadeachim tim zalim ani, tanchea purvozamnim tankam xikoilam toxem, tim Baalank bhozunk laglim.'
15. Hea pasot Sorvsoktivont Sorvespor, Israelacho Dev, oxem sangta: 'Atam Hanv hê porjek jevnnak ditolom koddu bhaji ani pieunk vikarem udok.
16. Tanchim purvozam vollkhonaslim ani tim apunnuch vollkhonant tea raxttram modem Hanv tankam ximpddaitolom; ani tancho nas kori-sôr tolvar gheun Hanv tanchea pallank lagtolom.'
17. Sorvsoktivont Sorvespor oxem mhonntta: 'Pretar roddnnem korunk bailank apoiat, hea dhondeant odik goll'lolea roddpinink apounk dhaddat!
18. Vegim-vegim ieun amchê voir vilapachem git korum-di! Amchea dolleantlim dukam gollom-di, amchea dolleanchea pateantlim dukam vhanvon vhanvom-di!
19. Sionant vilapachem git aikum-ieta: "Kedem mhonn amchem nisontonn! Kedi mhonn loz amkam! Kiteak amcho dês ami atam sôddcho poddlo, amchim ghoram-daram môddun uddoileant!"
20. Atam tumi, ostoriamnô, Sorvesporachea utrak kan diat . To sangta tea utrank chitan kan diat. Tumchea dhuvank vilapachim gitam xikoiat, Ekamekak hem vilapachem git xikoiat:
21. Moronn amchea zonelantlean bhitôr sorlem, Mornnan amchea razvaddeamnim provês kelo. Rostea velea bhurgeank marun uddoilim, toxench tinttear bhonvtolea tornnatteank.
22. Uloi! Uloita to Sorvespor! Zoxem uktea xetant xenn poddun urta, zoxem lunvpiam pattlean konnuch punzaunk na zaun penddiô urtat, toxim mon'xanchim pretam poddlolim asat.'
23. Sorvespor oxem mhonntta: Zannaramnim aplêch zannvaiek lagun boddai dakhoum noiê, bollixttamnim apleach bolla pasot boddai korum noiê, girestamnim aplê girestkaiê vixim boddai dakhoum noiê.
24. Punn boddai dakhounchi asa zalear, ti hantum dakhounchi: Mhaka vollkhunk ani Mhaka somzunk. Kiteak Hanv Sorvespor, Mhozo môg thir, sarkem tem ani niti pormannem asa tench prithver Hanv kortam; Hôi, hench Mhaka manta. Uloita to Sorvespor!
25. Polleiat- uloita to Sorvespor!- osle dis ietat ki sunôt kel'lea soglleank Hanv khast lavunk ietolom:
26. Ejipt, Juda, Edom', Amonache put, Moab, ani mathem tasun bhonvta to oronneantlo sogllo lôk hea somestank khast lavunk ietam. Kiteak hea sogllea raxttramnim, ani Israelachea-i ak'khea Ghorannean kallzachi sunôt korunk na.'
