1. Jeremias ozun Rakhonddaranchea Chovkant koidi astana, dusrê pavtti Sorvesporachem utor taka pavlem. Tannem mhollem:
2. Zannem prithvi rochli, tika akar dilo ani ti thir korun dovorli Tachem Nanv Sorvespor Toch Sorvespor oxem mhonntta :
3. "Mhaka ulo mar ani Hanv tuka zap ditolom, ani zanchi tuka kãi mhaitina te vhoddle gutt Hanv tuka ukte kortolom.
4. Hea Xarant asat tea ghoram vixim ani Judachea razanchea nivasam vixim Sorvespor, Israelacho Dev, oxem mhonntta: tanchem nisontton zaunchem asa. Kaldeikaranchea matiechea bandancher ani torvaricher add loddhai korunk sôdtat tanchea pretamnim Xar bhoron ietolem; Mhojea zolltea krodhan tancho Hanv jiv kaddcho asam ani tanchea khotteponnak lagun hea Xara thaun Mhojem mukhamoll Hanv lipoun dovortolom.
6. Tôr atam, polleiat, tankam Hanv vokhod gheun ietam, tanche ghai pekhounk ietam; tankam bholaiki diun, xanti ani surokxa bhôgunk dita tosli êk novi manddavôll Hanv tankam dokhôl kortolom.
7. Hanv Judachea ani Israelachea koidi zal'leank portun haddtolom ani tankam adlea bhesar pavoun ghôtt kortolom.
8. Tãnnim Mhojer add kel'lea sogllea opmanantlim Hanv tankam nitôll kortolom; tãnnim Mhojer guneanv keleat ani Mhojer tim uprasleant, him sogllim tanchim khottim kortubam Hanv bhôgxitolom.
9. Ani prithumechea sogllea raxttram mukhar Jerusalem Mhaka anond, vakhann'nni ani obhiman haddta toslem nanv zatolem. Jea Xarachi Hanv uddhargôt kortolom tachi khobor aikun, ani ji xanti taka favo kortolom ti polleun, tim raxttram tharea bhietolim ani kamptolim.
10. Sorvespor oxem mhonntta: "Monis vô zonavor porian naslolem nisontton zaunk pavlam oxem tumi hea Xara vixim mhonnttat; ani 'Judachea nogramnim ani Jerusaleachea padd zal'lea rosteancher monis nhoi mhonn zonavor ravona', oxem tumi tanchê vixim mhonnttat; tôr heach Xarant ani heach nogramnim ani heach rosteancher novean aikum ietole
11. anondache ani khuxaliche ul'las, hoklê-novreachea lognachim sontosachim gitam, ani Sorvesporachea Mondirant dhinvasnneche iodn gheun ietat tanchim gitam-gaionam. Tim oxem gavun ietolim: 'Sorvsoktivont Sorvesporak dhinvasat, kiteak Sorvespor khorench boro, Tacho visvaxi môg sasnnak togta!' Kiteak hea desantlea koidiank tanchem gulamponn sompoun tanchea adlea bhesar Hanv portun haddtolom. Uloita to Sorvespor!"
12. Sorvsoktivont Sorvespor oxem sangta: Hea padd Desant, monis nhoi mhonn zonavor naslolea Xarant, ani sogllea tachea nogramnim, aplea hinddank visôv diunk menddram-rakhnneank chorvachim moidanam anink ekdam astolim.
13. Dongri vattarantlea, doria-degechê soklattichea vattarantlea ani Negebachea nogramnim, ani Benjaminachea prantant, Jerusaleachê bhonvtonnchea gramamnim, Judachea nogramnim, novean menddranche hindd tankam mezun kaddta tea gonvlliachea hata khal ietolim vetolim. Uloita to Sorvespor!
14. "Polleiat - uloita to Sorvespor!- Israelachea Ghoranneak ani Judachea Ghoranneak ji Hanvem sukhachi bhasavnni kel'li, ti pallon ieunche dis lagim pavtat:
15. Tea disamnim ani tea kallar Davidak ek promannikponnacho Fantto Hanv upzoitolom. To desant Somurt samballtolo ani neainit rakhtolo.
16. Tea disamnim Judak zoit melltolem ani Jerusalem surokxit jietolem. Ani hea Xarak hem nanv poddtolem: Sorvesporamchem Doiallaiechem-Nitivontponn."
17. Kiteak Sorvespor oxem sangta: "Israelachea Ghoranneachea xinvasonar bosunk pul'ling sonsôt sodanch astoli,
18. toxench Mhojê huzram ubo ravun hom' orpunk, dhanneacheô bhettovnniô lasunk ani dôr-disa iodn vopunk Levitachea kullantlea iadnikank sodanch pul'ling sonsôt astoli. " '
19. Hem Sorvesporachem utor Jeremiasak pavlem:
20. Sorvespor oxem sangta: "Disa kodde ani rati, kodde Hanvem korar kel'lo asa ani oxem dis ani rat ap-aplea nemlolea vellar ietat, ani ho Mhozo korar konnachean môddunk zaina.
21. Toxench Mhojea sevoka Davida-i kodde Hanvem kel'lo korar konnachean moddum nozo, ani hê porim tachea xinvasonar razvôtt cholounk sonsôt astoli, ani toxench Mhojê sevek dovorlolea Levichea kullantlea iadnikam-i kodde Hanvem kelo korar moddunkuch zaina.
22. Zoxem mollbachim noketram mezunkuch zainant, ani doriachê renvecho hixôb korum nozo, toxench Mhojea sevoka Davidachi sonsôt ani Mhoji seva kortolea Levitank Hanv vaddoitolonch. " '
23. Hem Sorvesporachem utor Jeremiasak pavlem:
24. Ho lôk kitem mhonntta tem tunvem aikunk na? Tim oxem mhonnttat: "Sorvesporan venchun kaddlolim don Ghorannim Tannem atam sôddun dilim kitem?" Mhonnttôch tim Mhojê porjechi beporva kortat, ani ti ekuch raxttr mhonn lekhinant.
25. "Disa kodde ani rati kodde Hanvem korar korunk na zalear ani mollbak ani prithvek Hanvem nem tharaun diunk nant zalear,
26. Jakobachê ani Mhojea sevoka Davidachê sonstik Hanv sôddun ditolom, ani Abraham, Izak ani Jakob hanchea daijiancher raj cholounk tachê sonstitle raza Hanv anink venchun kaddcho na! Hanv tanchea koidiank portun haddtolom ani tanchi doia kortolom." '
