1. Jerusaleant thaun ani Juda thaun Babiloniek nirvasun vhortale tea koidiam borabôr Jeremiasak-ui beddiô ghal'leô; oso astana Nebuzaradanak, rakhonndaranchea sordarak, to mell'llo. Thoim thaun tannem Jeremiasak soddoilea uprant Sorvesporachem utor taka pavlem.
2. Rakhonndaranchea sordaran Jeremiasak kuxin vhelo ani taka sanglem: 'Sorvesporan, tujea Devan, hea desacher orixtt dhaddtolo mhonn adim-fuddem sangun dovorlolem,
3. ani atam Tannem tem dhaddlem. Apunn kortolo mhonn Tannem dhomki dil'li ti Tannem pall'li, kiteak Sorvesporacher tumi patok kelam ani Tachem utor aikunk tumi raji nasleat; dekhun hem sogllem atam tumcher ailam.
4. Polle, aiz hanv tujea hatantleô beddiô kaddtam. Mhojê borabôr Babiloniek ieunk tuka borem dista zalear, ie; hanv tuzo borê bhaxen poramôs kortolom. Punn Babiloniek ieunk tuka borem disona zait zalear, hangach rav. Polle, sogllo dês tujê mukhar asa; tuka borem lagta ani sarkem dista thoim voch.'
5. Ani Jeremias koddsorun vechê adim, tannem fuddem sanglem: 'Gedaliak, Ahikamachea putak, Shafanachea natuak, Babiloniechea razan Judachea nograncho razpal nemla; tuka zai zalear tujean tachê-xim vochum ieta ani tachê borabôr loka modem ravum-ieta, vô zoim tuka odik borem dista thoim tujean vochum ieta.' Oxem uloun rakhonndaranchea sordaran taka vatter khavpa-jevpak goroz tem dilem, ani tea bhair ek dan, ani itlem korun tacho nirôp ghetlo.
6. Jeremias Mizpa ganvant. Gedalia, Ahikamacho put, hachê-xim gelo ani tachea sangata desant ozun urlolea loka modem ravlo.
7. Judeikaranchê foujeche thodde fuddari aplea mon'xank gheun ozun kheddea-ganvamnim zhuztale; tãnnim Babiloniechea razan Gedaliak, Ahikamachea putak, desacho razpal nemla mhonn ani sogllea dadleanchi, bailanchi ani bhurgeanchi ani Babiloniek nirvasunk naslolea desantlea gorib lokachi zobabdari taka dilea mhonn aikolem.
8. Tedna te soglle Mizpa ganvant Gedalia-xim aile; te he: Ishmael, Nethaniacho put, Johanan ani Jonathan, Kareiache put, Sheraia, Tanumetacho put, Netofaskar Efaiche put, Jezania, Maakatkaracho put, ani tanche monis.
9. Tankam ani tanchea mon'xank Gedalian, Ahikamachea putan,Shafanasachea natuan, soput gheun sanglem: 'Kaldeikaranchi chakri korunk bhieum nakat; hea desant ravat ani Babiloniechea razachi chakri korat ani tumchem sogllem borem zatolem.
10. Mhojê pallien hanv hanga Mizpa ganvant ravtolom ani, Kaldeikaramchê-xim ietat tedna, tanchê mukhar tumcho protinidhi zatolom; punn tumi zalear dakô kaddat, xetanchi lunvnni-môllnni korat, zoitunanchem tel bhôrat, ani hem sogllem utpon dhobeamnim ghalun koddeamnim samballat; ani tumi jikhun ghetleant tea nogramnim ravat.'
11. Têch bhaxen, jedna Moabant, Ammonkaram modem, Edomant ani dusrê kodden jietolea Judeikaramnim Babiloniechea razan Judantlea urlolea lokak desant ravunk dilem mhonn ani Gedaliak, Ahikamachea putak, Shafanachea natuak, tancho razpal nemlo mhonn aikolem,
12. tedna jea-jea ganvamnim tankam dhanvddail'lim, tea ganvam thaun tim Judeikaram Judachea desant portun ailim. Tim Mizpa ganvant Gedaliak mellunk ailim, ani soreachem, xetanchê lunvnnê-môllnnechem khub utpon tãnnim ektthaim kelem.
13. Johanan, Kareiacho put, ani kheddeamnim ozun zhuztale te soglle soinikanche fuddari Mizpa ganvant Gedaliak vochun bhettle.
14. Tãnnim taka mhollem: 'Baalis, Am'monkarancho raza, hannem Ishmaelak, Nethaniachea putak, tuka jivexim marunk pattoila mhonn khobor na tuka?' Punn Gedalian, Ahikamachea putan, tanchem sotman'lem na.
15. Tedna Johananan Kareiachea putan, Mizpa ganvant Gedaliak guptim oxem sanglem: 'Mhaka vochum-di ani Ishmaelak, Nethaniachea putak, jivexim marum-di, ani khobor konnakuch gomchi na. Kiteak mhonn to tuzo jiv kaddtolo ani tujê bhonvtim ektthaim zal'lim Judeikaram zollim-mollin ximpddon vetolim? Kiteak mhonn Judachea urlolea zomeacho nas zaunk pavcho?'
16. Punn Gedalian, Ahikamachea putan, Johananak, Kareiachea putak, oso portipall kelo: 'Tum oxem korum naka, kiteak jem tum Ishmaela vixim sangtai, tem sogllem êk fôtt.'
