1. Jehoiakim, Josiacho put, Judacho raza aslo tedna, Hem Sorvesporachem utor Jeremiasak pavlem:
2. Rekabitanchea kulla-xim voch ani tanchê lagim uloi; tankam Sorvesporachea Mondirantlea eka kuddant hadd ani tankam dakancho soro pieunk di.'
3. Mhonnttôch hanvem Jazaniak, dusrea eka Jeremiasacheach nanvachea putak, Habaziniachea natuak, tachea sogllea bhavank ani tachea sogllea putank, ak'khea Rekabitanchea kullak, ghetle
4. ani Sorvesporachea Mondirant vhele; Igdalia nanvacho Devacho êk bhôkt aslo, taka Hanan nanvacho put aslo; tôr Hananachea putank Devachea Mondirant aslolea kuddant hanvem tankam soglleank vhele. Ho kudd fuddarianchea kudda lagim aslo, Shallumachea puta Maseiachea kudda voir; ho Maseia Darvontteacho Rakhonndar aslo.
5. Magir hanvem Rekabitanchea kullachea mon'xam mukhar dakam-sorean bhòrlole kollxe ani kãi patram dovorlim, ani tankam hanvem mhollem: 'Soreacho gôntt gheiat.'
6. Punn tãnnim oso zobab dilo: 'Ami soro chakich nanv, kiteak amchea sthapnnara Jonadaban, Rekabachea putan, amkam hi adnia dilea: "Tumi, nhoi mhonn tumchea putamnim, kodinch soro chakcho nhoi;
7. tumi ghoram bandchim nhoi, zomin kamais korchi nhoi, dakam-molle lavche nhoi; oslem tumkam kãich aschem nhoi. Punn tumi jivitbhôr tombumnim ravchem, ani hê porim tumi porkim koxim ravtat tea desant lamb auk jieunk pavtoleat!"
8. Hea amchea sthapnnara Jonadabacheô, Rekabachea putacheô, adnia ami pall'leat, tantli êk-ui ami moddunk na: ami kodinch soro chakinanv, na mhonn amcheô bailô, amche put vô amcheô dhuvô-i soro chakinant.
9. Ravunk ami ghoram bandinanv, amkam dakam-molle nant, xetam nant, koslench bim-i na; ami tombumnim jietanv.
10. Amchea sthapnnara Jonadabacheô adnia ami sodanch pallit aileanv, tantli êk porian ami môddunk na.
11. Punn jedna Nebukadnezzaran, Babiloniechea razan, hea desak dhadd ghali, tedna ami oso nirnnoi ghetlo: "Hangasorlim bhair sorun ami vochum-ia! Kaldeikaranchea ani Siriekaranchea fouzanchea chopkeantlim sutton ami Jerusaleak ia." Heach pasot ami Jerusaleant ravtanv.
12. Tedna hem Sorvesporachem utor Jeremiasak pavlem:
13. Sorvsoktivont Sorvespor, Israelacho Dev, oxem mhonntta: "Voch, ani Judachê porjek ani Jerusaleant ravtoleank oxem sang: Tumi kednanch xikxonn gheunchim nant kai, ani Mhojea utrank kan diunchinch nant kitem? Uloita to Sorvespor.
14. Jonadaban, Rekabachea putan, aplea pattlavdarank soro chakunk addvarlolo ti adnia tãnnim samball'lea; aplea sthapnnarachi adnia pallun tim aiz porian soro piech nant. Punn Mhojem zalear, zori Hanv itlea nettan, dis uzvaddtanch suru korun ani kosloch thar ghenastana, tumchê kodde uloilom, tori tumi aikunkuch na.
15. Dis uzvaddtanch suru korun ani thar ghenastana Hanvem sogllea Mhojea sevokam provadiank tumchê-xim dhaddleat oxem sangunk: Tumi ek-eklean ap-apli khotti vatt sôddchi ani tumcheô kornniô nitt korcheô, porkea devancho pattlav korun tanchi seva tumi korchi nhoi; ani oxim Hanvem tumkam ani tumchea purvozank dil'lea desant tumi jietoleat. Punn tumi Mhaka chit diunk na, Mhojem aikunkuch na.
16. Rekabachea puta Jonadabachea pattlavdaramnim aplea sthapnnaran dil'li adnia pall'li, punn hê porjen Mhojem kanar gheunkuch na.
17. Tea pasot Sorvsoktivont Sorvespor, Israelacho Dev, oxem sangta: Polleiat, Judacher ani Jerusaleachea sogllea lokacher hem noxtt dhaddtolom mhonn Hanvem tharail'lem, tôr tem dhaddtolonch, kiteak Hanv tanchê kodde uloilom punn Mhojem aikunk tim kobul zalinch nant, Hanvem tankam ulo kelo, punn tãnnim Mhaka zap dili na." '
18. Uprant Jeremiasan Rekabitanchea kullak oxem mhollem: 'Sorvsoktivont Sorvespor, Israelacho Dev, oxem sangta: "Tumchea sthapnnara Jonadabachi adnia tumi pall'leat, ani tache soglle nem' tumi samball'leat ani tannem dil'lea sogllea hukumank tumi pallo dila;
19. dekhun Sorvsoktivont Sorvespor, Israelacho Dev, oxem mhonntta: Jonadabak, Rekabachea putak, Mhojê hujir ubo ravunk pul'ling sonsôt sodanch astoli." '
