1. Sorvespor novean mhojê lagim oso uloilo:
2. Oslea desant tunvem potin korun gheunchi nhoi ani tuka put ani dhuvô zolmunchim nhoi.
3. Kiteak hea desant zolmotolim tea putam ani dhuvam vixim, toxench hea desant tankam zolm ditolea avoiam vixim ani tankam zolma haddtolea bapaiam vixim Sorvespor oxem sangta:
4. "Mornnadik pidda-xidda poddun tim mortolim; tanchê khatir konnuch rudon korcho na, tankam purunk-ui konn ascho na; xenna vori tanchim pretam zomnir ximpoddtolim. Zhuzan ani bhuken-tanen tancho xevôtt zatolo, ani tanchim pretam zaunk pavtolim mollba velea suknneanchem ani prithvê voileam savzanchem khann-jevonn."
5. Hôi, Sorvespor oxem mhonntta: "Dukh kortat tea ghoramnim bhitôr sorum naka, vô tanchê borabôr rudon korunk vochum naka; tanchê vixim dukh korum naka; kiteak hê porjecher Mhojê xanticho axirvad anink ghalcho na, tika Mhozo visvaxi môg anink dakhouncho na, ani tichi anink doia korcho na. Uloita to Sorvespor!
6. Hea desant lhan tosoch unch kulliecho lôk êkêch toren mortolo, konn tankam purcho na, tanchê khatir konn roddcho-i na. Tankam lagun konn aplê kuddik ghave korcho na, vô aplem mathem konn tascho na.
7. Mel'leam khatir roddtoleank buzvônn diunk konnuch jevonn randun haddcho na. Roddtoleanchea bapai vô avoiê pasot konn buzvonnechem patr tankam diuncho na.
8. "Khuxali kortat tea-i ghoramnim bhitôr sorum naka, tanchea vangdda khaunk-pieunk bosum naka.
9. Kiteak Sorvsoktivont Sorvespor, Israelacho Dev, oxem sangta: Hea desant, tujea khaxa dolleam mukhar, tujeach jivitant, anondache ani khuxaliche soglle ul'las ani toxench hoklê-novreachea lognachim sontosachim gitam Hanv bond kortolom.
10. "Hem sogllem tum hea lokak sangtoloi tedna, tim vichartolim: Sorvesporan kiteak mhonn itlem mottem noxtt amcher dhaddunk nirnnoi ghetla? Tim vichartolim: Kitem vaitt kelam ami? Sorvesporacher add koslem mhonn ami patok kelam?
11. Tedna tankam oso zobab di: Tumchea purvozamnim Mhaka patt keli uloita to Sorvespor! ani tim dusrea devam pattlean gelim; tãnnim tankam bhôzle ani tanchi seva keli. Mhaka tãnnim sôddlo ani Mhoji Somurt pallunk na.
12. Ani tumi-i zalear, tumchea purvozam poros odik paxtt tem tumi kelam. Polleiat, tumcheach vadeachim tumi zaleant, tumchea khottea vondonvnnianchea margar tumi cholot asat ani Mhojem kãi aikonant.
13. Hea pasot hea desantlim tumkam umttun, tumi vollkhonant ani tumchim purvozam-i vollkhonaslim toslea desant tumkam Hanv dhaddtolom, ani thoim tumchean dis-rat dusrea devanchi seva korunk zata, kiteak Hanv tumkam anink upkar korcho na."
14. [Sorvesporan mhaka sanglem:] 'Aikat: "Israelkarank Sorvesporan Ejiptantlim bhair kaddun haddlim: tea Sorvesporachea jivachean!" -oslea utramnim lôk anink soput gheuncho na, osle dis ietat. Punn atam-, uloita to Sorvespor!- tumi mhonnttoleat: "Sorvesporan Israelkarank Ut'torê thaun ani Tannem tankam dhanvddail'lim tea sogllea desam thaun portun haddlim, tea Sorvesporachea jivachean!" Khorench, Hanv tankam tanchea khaxa desant, tanchea purvozank Hanvem dil'lea desant, portun haddtolom.'
16. [Sorvespor mhonntta:] 'Zaitea kharviank apoun haddtolom- uloita to Sorvespor!- ani te tankam rampônn marun dhôrtole; magir Hanv zaitea xikariank apoun haddtolom, ani te tankam dôr-eka porvota ani dongra voilim ani khoddpachea khanchintlim sôdun kaddun martole.
17. Kiteak tim kortat tem sogllem Mhojea dolleam mukhar asa; tanchem kãich Mhaka liplolem na; tanchim patkam Mhojê nodrek chukonant.
18. Ani Hanv tanchea khotteponnachem ani patkanchem dupêtt farikponn ghetolom, kiteak tãnnim moddeam sarke prann naslolea aplea kud'dea devamnim Mhozo dês bhoxttaila, ani aplê Ollxiken ho Mhozo vinchlolo dês bhôrla.'
19. Sorvespora, Tum mhaka rakhtai, Tunch mhaka dhir ditai. Akantachea vellar Tum mhozo asro! Prithvechea sogllea ximam thaun sogllim raxttram Tujê-xim ietolim ani mhonnttolim: 'Amchea purvozank mell'llem tem daiz fottkirem, ôrth-naslolem, kiteakuch upkaronaslolem.
20. Mon'xamnim aplech dèv korunk zata? Te dèvuch nhoi!'
21. [Sorvespor mhonntta:] 'Atam aikat, Hanv tankam dakhoitolom, Mhoji podvi ani Mhoji sokti atam Hanv tankam dakhoitolonch! Ani tedna Hanv Sorvespor mhonn tim vollkhun ghetolim.'
