1. Jeremiasan sogllea lokak Sorvespora tanchea Devachim sogllim utram sangun sompoilim. Him utram voir dileant tim utram tankam kollounk teach Sorvespora tanchea Devan taka pattoil'lo.
2. Uprant Azarian, Hoshaiachea putan, ani Johananan, Kareiachea putan, ani sogllea tea urmott mon'xamnim Jeremiasak mhollem: 'Tum fôtt sangtai. "Ejiptak vochum nakat, thoim ravum nakat," oxem amkam sangunk Sorvesporan tuka dhaddunk na.
3. Kaldeikaranchea hatant ami poddchim mhonnun ani oxem tãnnim amcho prann kaddcho vô amkam dhôrun pordesant Babiloniek vhorchim mhonnun, Baruk, Neriacho put, ho ki tuka amcher challoita.
4. Oxem astam, Johananan, nhoi mhonn senapotimnim, nhoi mhonn sogllê porjen, Judachea desant ravun Sorvesporachem utor aikunk na.
5. Portench zalear, Johananan, Kareiachea putan, ani sogllea senapotimnim Judachea ak'khea urlolea zomeak, jea raxttramnim tankam dhanvddail'lim tea sorv raxttram thaun Judachea desant ravunk portun ail'leank, Ejiptak vhelim:
6. dadleank, bailank, bhurgeank, ani razkunvornnink. Nebuzaradanan, rakhonndaranchea sordaran, Gedalia, Ahikamacho put, Shafanacho natu, hachê khal dovorlolea somestank tãnnim vhelim, hanchê modem Jeremias provadiak-ui ani Barukak, Neriachea putak.
7. Ani oxem Sorvesporachea utrak bhere kan korun, tim Ejiptak gelim ani Tapanes nogrant pavlim.
8. Tapanes nogrant hem Sorvesporachem utor Jeremiasak pavlem:
9. Kãi lobddam ghe ani Judachea lokachê nodrê mukhar Tapanes nogrant, Faroahchea raznivasa fuddeant aslolê chire-bondicher dovorlolea chuneant tim purun dovor.
10. Magir tankam oxem sang: "Sorvsoktivont Sorvespor, Israelacho Dev, oxem mhonntta: Polleiat, Hanv Babiloniechea razak, Nebukadnezzar Mhojea sevokak, apoun haddtolom ani Hanvem purun dovorleant tea lobddancher to aplem xinvason dovortolo, ani tacher aplo mattôv ubartolo.
11. To ietolo ani Ejiptak haroitolo: Zorimorik nemlolim zorimorik sampoddtolim; pordesachea gulamponnak nemlolim pordesant pavtolim; zhuzak nemlolim zhuzant mortolim!
12. "Ejiptachea devachea mondirank to uzo laitolo; tea devank lasun uddoitolo vô koidi korun vhortolo.
13. Zoso êk gonvlli apnna bhonvtim ek avoronn ghalta, to Ejiptak apnna bhonvtim revoddtolo, ani uprant, konnench tacher hat ghalinastana, to aplo bhair sorun vetolo. To Ejiptant Suriachea mondirache minar môddtolo ani Ejiptachea devanchim mondiram lasun uddoitolo." '
