1. Josiacho put Jehoiakim, Judacho raza, hachê razvôttkechê survatek, hem Sorvesporachem utor Jeremiasak pavlem:
2. Sorvespor oxem mhonntta: "Sorvesporachea Mondirachea angnnant ubo rav. Hanvem tuka sangunk formaileant titlim-i utram, ek punn okxor sôddinastana, Judachea nogram thaun Sorvesporachea Mondirant bhozunk ietolea sogllea lokak sang.
3. Ghoddiek tim aikotolim ani sogllim ap-aplê vatten apli khotti chal sôddun ditolim: oxem zalear, Hanv tanchi doia kortolom ani tanchea vankddea kortubank lagun Hanvem noxtt dhaddchem kel'lem tem dhaddcho na."
4. Tankam tum sang: "Sorvespor oxem sangta: Tumi Mhojem aikunk kobul nant zalear ani Hanvem tumkam dilea ti Mhoji Somurt tumi pallinam zaxat tôr,
5. ani thar ghenastana Hanvem tumchê-xim pattoil'lea Mhojea sevokam provadiachea utrank tumi kan dina zaxat zalear, khorem mhollear tumi tankam kan diunkuch na
6. Shiloa vixim Hanvem kelem tench hea Mondira vixim Hanv kortolom, ani hem Xar Hanvem xiraplolem Xar mhonn prithvechea sogllea raxttrank dakhoitolom. " '
7. Sorvesporachea Mondirant Jeremias him utram sangtalo tedna, tim iadnikamnim, provadiamnim ani sogllea lokan aikolim.
8. Sorvesporan sogllea lokak sangunk laillem titlem-i Jeremiasan sangun zatôch, iadnikamnim ani provadiamnim ani sogllea lokan taka dhôrlo ani mhollem: 'Tunvem sanglãi tachê pasot tum morunkuch zai!
9. "Hem Dev-mondir Shiloa sarkem zatolem ani hem Xar konn ravona toslem ghorttan zatolem', oslem bhakit Sorvesporachea nanvan kiteak mhonn kelãi tunvem?" Ani Sorvesporachea Mondirant sogllo lôk Jeremiasak veddho ghalun ravlo.
10. Hem aikun, Judache odhikari rajnivasantle bhair sorun Sorvesporachea Mondirant choddun gele, ani Sorvesporachea Mondirachea Novea Darvonttea-xim vochun thoim bosle.
11. Iadnikamnim ani provadiamnim odhikariank ani sogllea lokak mhollem: 'Hea mon'xak mornnachem formonn favoch, kiteak tannem amchea Xara virudh bhakit kelam tem tumcheach kanamnim tumi aikolam.'
12. Toripunn Jeremiasan sogllea odhikariank ani sogllea lokak oso zobab dilo: 'Hea Dev-mondira ani hea Xara add jem sogllem tumi aikolam, tem sangunk khud Sorvesporan mhaka dhaddla.
13. Mhonnttôch atam tumchi vagnnuk ani chal nittaier ghalat, Sorvespora tumchea Devacho tallo aikat; oxem tumi korxat zalear, To tumchi doia kortolo, ani jem noxtt Apunn tumcher dhaddtolo mhonn Tannem tharail'lem, tem To dhaddcho na.
14. Hanv zalear, tumchea hatant poddloloch asam mhonn tumi dekhtat. Tumkam zai toxem, vô tumkam borem dista toxem mhojê sorim tumi korat.
15. Punn ek mat zanno zaiat: tumi mhaka jivexim marxat zalear, niropradhi rogot tumkanch, hea Xarak ani tachea nagrikank buztolem, kiteak him sogllim utram tumchea kananr sadounk khud Sorvesporan mhaka tumchê-xim dhaddla.'
16. Tedna odhikariamnim ani sogllea lokan iadnikank ani provadiank mhollem: 'Hea mon'xak moronn favo nhoi. To Sorvespora amchea Devachea nanvan amchê kodde uloila.'
17. Hem aikun desantle kãi malgodde ektthaim zallea lokak ulovop korunk utthle.
18. Tãnnim mhollem: 'Hezekiah Judachea razachea disamnim Moreshet ganvcho Mika provadi aslo. Tannem ak'khê Judachê porjek oxem sanglem: "Sorvsoktivont Sorvespor oxem mhonntta: Sion kospachi zomin zatoli, Jerusalem-Xar êk xenkareanchi ras zatolem, ani Devmondiracho Dongôr ek ran zatolo."
19. Oxem tannem sanglem dekhun Hezekiah Judachea razan ani Judachê ak'khê porjen Mika jivexim marlo zait? Portench zalear, Sorvesporachi bhirant dhôrun, apli doia kôr ani apnnacher noxtt dhaddtolo mhonn Tannem nirnnoi ghetlolo to pois kôr mhonn tachê lagim vinoti keli na? Oso vhôdd khun korun ami atam amchea ontoskornnacher ho bhar gheuncho mum?'
20. Sorvesporachea nanvan tosoch anink eklo monis osoch bhakit kortalo. Tachem nanv Urias, Shemaiacho put, Kiriath-Jearim hea ganvcho. Tannem-i hea Xara ani hea desa virudh Jeremiasan kelam toslench bhakit kel'lem.
21. Jedna Jehoiakim raza aplea soglleam odhikariam ani vhodd-vhodd mon'xam borabôr tannem sanglem titlem aikolem, tedna razan taka-i jivexim marunk ievjil'lem. Hi khobor tachea kanar poddtôch Urias tharea bhielo ani Ejiptak pollun gelo.
22. Punn Jehoiakim razan Elnathan, Akboracho put, haka dusrea kãi zonnam borabôr Ejiptak dhaddlo.
23. Tãnnim Uriasak Ejipta thaun porot haddlo ani Jehoiakim raza fuddeant ubo kelo; hannem taka torvarin jivexim marlo ani tachem pret eka bhovxik nikhipinneachea moidanar uddoilem.
24. Punn Ahikam, Shafancho put, Jeremiasak rakhtalo ani tenko ditalo dekhun, taka jivexim marunk lokachea hatant ghalunk na ani tacho jiv kaddunk na.
