1. Babiloniê virudh, Kaldeikaranchea desa add, Jeremias provadia udexim Sorvespor uloilo tem utor hem:
2. Raxttram modem hi khobor porgôtt korat! jahir korat! bavtto ubarat ani porgôtt korat! Kãich lipoun dovrum nakat, porgôtt korat: Babiloniek jikhun ghetli! Bel devak lojek ghalo! Marduk devache kuddke-kuddke kele! Tichea kud'dea devank lojek ghale, tichea ollxikechea devancho bhông kelo!
3. Kiteak Ut'torê thaun ticher loddai korunk ek raxttr ieta, tem ticho dês padd kortolo, tantum konn anink ravcho na; mon'xam ani zonavoram pollun vetolim.
4. Tea disamnim ani tea kallar Israelachi porza portun ietoli, (ti ani Judachi porza). Roddot roddot Sorvesporak, aplea Devak, tim sôdunk ietolim.
5. Sionachi vatt tim vichartolim ani tevxilean vattek lagun mhonnttolim: 'Chol ia, kednanch visrum nozo ani sodam togta toslo korar korun Sorvesporak chikttun ravum-ia!'
6. Mhoji porza sanddlolea xelliamsarki zalea, tichea gonvlliamnimtika vankddea margan vhorunkoddsoraili; dongramnim tikafosoili, aplench oddop visrun timeka dongra thaun dusrea dongrarvochun firtalim.
7. Zankam tim sampoddlim, tãnnim tankam giraslim; tanchea dusmanamnim mhollem: 'Ho amcho guneanv nhoi, kiteak tãnnim Sorvesporacher patok kelem; ho Sorvespor Nitivontponnachem Sthan, ho Sorvespor tanchea purvozancho Bhorvanso.
8. Babilonientlim pollun vochat, Kaldeikarancho dês sôddat. Xelliam-menddram fuddem choltolea bokddeam bhaxen tumi soglleam fuddem cholat!
9. Polleiat, Ut'torechea desa thaun bollixtt raxttrancho êk sông upzoitolom ani Babiloniecher akromonn korunk dhaddtolom. Tim ticher loddai korunk harin ravtolim; tim tika jikhun ghetolim. Tanche bann onnbhov aslolea zhuzariachea bannam sarke, tir chukoun kednanch portun ienant.
10. Tim Kaldeiacho dês lutt'tolim; tiche soglle luttmare dhadoxi zatole, Uloita to Sorvespor!
11. Tumi Mhojem daiz luttun vhelam mum? Khuxalbhorit zaiat! Tumchea zoita pasot zoizoikar korat! Chorvak sôddlolea paddkulea bhaxen uddiô marat! Andell ghoddeam bhaxen khonkallat!
12. Punn tumchi avoi lojen bhòrlea, tumkam zolma haddlim ti ostori beman bhôgta; sogllea raxttram modem atam ti konixtt zalea; ti atam zaunk pavlea ek oronnem, suki-korddi zomin, padd ganv.
13. Sorvesporachea krodhak lagun tea desant konn anink ravcho na, to dês sarkoch osadd poddtolo. Babilonientlean ietat-vetat tim sogllim ticher dolle ghalina fuddem thottak zatolim ani tika mar poddla to polleun moskoriamnim xillonni ghalun vetolim.
14. Dhonu bagaitoleamnô, Babiloniecher loddai korunk harin ravat, tika veddho ghalat. Ticher tumche bann sôddat! Êk-ui bann sôddinastana dovrum nakat, kiteak tinnem Sorvesporacher patok kelam!
15. Zhuza-nare sôddun sogllea vattamnim ticher akromonn korat! Tinnem hat ubarle, polleiat! Tiche burinj konsllon poddtat! Tichim kottam moddon xevttotat! Sorvesporacho sudd ho! Ticho sudd gheiat. Dusreank tinnem dilam teach mapan tika farik korat.
16. Roitat tankam Babilonientlim bhair kaddat, lunvnnechea vellar xetak koiti laitat tankam-i pelean kaddat. Desvatt kortolê torvari thaun koddsorat, zonn-eklean aplea khaxa desant pollun vechem!
17. Israel mhollear êk zollim-mollim ximpoddlolo hindd, tachê pattik lagun xinvamnim taka duspottaila. Poilo Assiriechea razan taka giraslo; magir Nebukadnezzaran, Babiloniechea razan, tachea haddancho churo kelo.
18. Tea pasot Sorvsoktivont Sorvespor, Israelacho Dev, oxem mhonntta: Polleiat, zoxi Assiriechea razak Hanvem khast laili, toxich atam Babiloniechea razak ani tachea desak Hanv khast laitolom.
19. Hanv Israelak tachea khaxa desant portun haddtolom, ani Karmel Dongrar ani Bashan vattarant utpon zata tem, toxench Efraimachea ani Gileadachea Dongrancher pikta tem, pott-bhôr khaun to dhadoxi zatolo.
20. Tea disamnim ani tea kallar uloita to Sorvespor! Israelacho guneanv sôdxat zalear, to thoim aschoch na; Judasachim patkam sôdxat zalear, tim tumkam gavchim nant; kiteak Hanv vattaun dovortam tea urlolea zomeak Hanv bhogsonnem ditolom.
21. Merathaimachea prantacher akromonn kôr, tacher ani Pekodachea lokacher loddai korunk fuddem sor, tankam marun uddoi, ani tancho soglleancho sarko nas kôr! Uloita to Sorvespor! Hanv sangtam titlem kôr tum!
22. Loddaiecho boball sogllea desant aikum ieta: kedem vhoddlem nisontton!
23. Polleiat! Ak'khea jogacho to tutio aslo, punn atam tache sarkech kuddke-kuddke zale! Sogllea raxttram modem Babilonia xar kitlem bhesurvannem zaunk pavlem!
24. Babiloniê, tuka Hanvem fas manddlo, hachi tuka khoboruch nasli, ani tea fasant tum poddlii. Tum sampoddlii ani tuka dhôrli, kiteak tum Sorvesporacher kolpolii.
25. Sorvesporan Apli zhuza hatiaranchi kotthi ugôddli ani tantlim Aplea krodhachim hatiaram bhair kaddlim. Kiteak Kaldeikaranchea desant Dhonia Sorvsoktivont Sorvesporak kam korchem asa.
26. Sogllea vattamnim tachea angar poddat, tiche orovache kodde fôddat, dhannea bhaxen tichê luttichea mhalacheô raxi korat, ticher xirap ghalat, tichem sarkem nisontton korat, kãich uronk dium nakat!
27. Padde zal'lê porim, tichea zhuzariank marun uddoiat, tankam soglleank sojint marunk vhorat. Bhonglem noxib tanchem! Tancho dis pavlo, tankam khast lavpacho vêll to!
28. Aikat! Babiloniechea desantlim sutton ail'lim, pollun ail'lim, Sionant pavtat ani porgôtt kortat: Sorvespor amcho Dev sudd gheta, Aplea Mondira khatir To sudd gheta!
29. Babiloniecher akromonn korunk dhonnuxiank zoma korat! Dhonu bagaitat te tumi soglle, sogllea vattamnim tika ghuri ghalat, tankam bhair pollun vochunk koxench dium nakat! Tichea kortubam pormannem tika farik korat; dusreank tinnem dilam teach mapan tika diat, kiteak Sorvesporacher, Israelachea Povitr Devacher, ti urmottaien uprasli!
30. Ani oxem tea disa, tichea chovkam-nim tiche soglle tornnatte xevtton poddtole, ani tiche soglle zhuzari morun vetole. Uloita to Sorvespor!
31. Urmôtt Babiloniê, tujê add Mhozo khottlo, - uloita to Sorvespor! - tuzo dis ailo, Hanvem tuka khast lavcho vêll pavlo.
32. Urmottai aptton poddtoli, tika konnuch ukôlcho na: tichea nogrank Hanv uzo laitolom, ani sobhonvtim to uzo soglleacho gobôr kortolo.
33. Sorvsoktivont Sorvespor oxem sangta: Israelachê porjecher toxench Judachê porjecher zulum cholta. Tankam dhôrun vheleant tim tankam ghôtt dhôrun asat, koxêch bhaxen tankam sôddpak nant.
34. Punn tancho Muktidar bollixtt: Sorvsoktivont Sorvespor Tachem Nanv. To tanchê vatten astolo, oxem To amchea desak sovostai ditolo, punn Babiloniechea lokak thorthoro haddtolo.
35. Marun uddoiat Kaldeikarank -uloita to Sorvespor! - toxench Babilonient ravtoleank ani tichea fuddariank ani budhvontank!
36. Marun uddoiat tichea parkhiank: tanchi môt uddlea! Marun uddoiat tichea zhuzariank: te akantun koddkoddtat!
37. Marun uddoiat tichea ghoddeank ani môddun uddoiat tiche roth! Marun uddoiat tinnem ektthaim kel'lea sogllea bhaddeak haddlolea soinikank: te soglle bailam bhaxen osokt-bhivkudde! Foddun uddoiat tichim bhanddaram: sogllem lutt marun vhorat!
38. Dhadd poddum tichea udkancher: tim sukun vochum! Kiteak ho dês kud'dea devancho, hea bhoinkor devanchem tankam pixem laglam.
39. Hea fuddem thoim ravtolim ranmazram ani kole, toxench natkam thoinsôr aplem pennem kortolim. Thoim konn monis anink kednanch ravcho na, punn pinddkechê pinddkent to dês padd urtolo.
40. Zoso Sodomacho ani Gomorracho ani tachea xezarea nograncho Devan sotianas kelo uloita to Sorvespor! toxem hea desant hea fuddem konnuch anink ravcho na, hea fuddem konn monis thoim ghor-dar korcho na.
41. Polleiat, Ut'torê thaun ieta êk porza, ek bollixtt raxttr; prithumechea poixilea ximam thaun zaite raza zhuzak toiar zaun ietat.
42. Te dhonu ani bhale hatan dhôrun ietat, te ekdom krur ani doia naslole; Ghongetolea doria sarko tancho boball; te ghoddeancher bosun ietat, êkuch monis zal'lê porim tujer, Babiloniê, loddai korunk ietat!
43. Babiloniechea razachea kanar hi khobor poddli, tache hat gollgoll'le, porsutt-vennink pavlolê êkê ostorê bhaxen tacher akant suttlo.
44. Polleiat, Jordanachea datt ranantlo êk xinv koso sodam-pachvea chorva-moidanar to choddun ieta! Eka khinna bhitôr Hanv tankam dhanvddaitolom, ani Mhaka zai taka fuddari nemtolom. Mhojê sarko anink konn? Konn mhaka vicharunk ubo ravot? Mhaka virôdh korunk konn raza asa?
45. Tea pasot Babiloniê virudh Sorvesporachi ievzônn, Kaldeikaranchea desa add Aplea monant koslo tharav Tannem ghetla to aikun gheiat: tanchea bhurgeam-ballank legun oddun vhortole! Tanche ganv tancheanch dolleam mukhar luttun uddoitole!
46. Babilonia poddli mhonn aikun prithvi kampta, ani ho avaz raxttram modem gazta.
