1. Punn jim utram Jeremias sogllea lokak sangtalo, tim Shefatia, Mattanacho put, Gedalia, Pashuracho put, Jukal, Shelemiacho put, ani Pashur,Malkiacho put, hãnnim aikolim; to oxem mhonnttalo:
2. Sorvespor oxem sangta: "Hea xarant ravtit titlim zhuzant, bhuken vô zorimorin mortolim; punn hem Xar sôddun apnnankuch Kaldeikaranchê svadhin kortit, tim vanchtolim, aplo jiv tori samballtolim.
3. Sorvespor oxem sangta: Hem Xar dubava virêt Babiloniechea razachê foujechea tabeant poddtolem, ani to hem Xar jikhun ghetolo. " '
4. Tedna mukheliamnim razak sanglem: 'Hea mon'xak tunvem jivexim marunk lavunk zai, kiteak oso uloun Xarant urlolea soinikanchi ani sogllea lokanchi-i dubava virêt to humêd môddta. Porjechem boreponn taka nakach, punn tichem fokot vaitt zai.'
5. Zedekiah razan oso zobab dilo: 'Polleiat, to tumchea hatant asa, tumchê khuxecher add raza kitench korunk fuddem sorcho na.'
6. Mhonnttôch tãnnim Jeremiasak dhôrlo ani Rakhonndaranchea Angnnant aslolê Malkias odhikariachê khonnint doramnim taka denvoun thoim taka dovorlo. Tê khonnint udok naslem, fokot chikôl, ani tea chiklant Jeremias romblo.
7. Punn Kushitkar Ebed-Melek,razvaddeantlo êk izddo, hannem Jeremiasak khonnint ghala mhonn aikolem. Tedna raza Benjaminachea Darvonttea-xim boslolo aslo.
8. Razvaddeantlo bhair sorun Ebed-Melek raza kodde oso uloilo:
9. Mhojea dhonia, mhojea raza, tea mon'xamnim Jeremiasak oxem korun ekdom vaitt kelem; tãnnim taka khonnint uddoilo. Thoim to bhuken mortolo, kiteak Xarant anink jevonn-khann na.'
10. Hem aikun razan Edeb-Melekak, Kushitkarak, oso hukum' ghalo: 'Hangasorlea tis mon'xank tujê borabôr ghe ani Jeremias provadiak to morchê adim khonnintlo bhair kadd.'
11. Ebed-Melekan apnna borabôr tea mon'xank ghetle ani razvaddeantlê kopddeanchê almarint vochun, tantlim tannem pinzlolim, zhòrlolim bontram kaddlim ani tim doramnim tê khonnint denvoilim ani Jeremiasak pavoilim.
12. Magir Kushitkar Ebed-Melekan Jeremiasak sanglem: 'Him pinzlolim zhòrlolim bontram tujea khankamnim doram pondak ghal.' Jeremiasan toxem kelem.
13. Magir tãnnim Jeremiasak doram ghalun voir ukôl'lo ani taka khonnintlo bhair kaddlo. Ani Jeremias Rakhonndaranchea Angnnant ravlo.
14. Zedekiah razan Jeremias provadiak apnnak mellunk Sorvesporachea Mondirachea tisrea Darvonttea-xim apoun haddlo. Razan Jeremiasak mhollem: 'Hanv tujê lagim ek vicharunk sôdtam: tum mhaka kãich lipoinaka.'
15. Jeremiasan Zedekiak zobab dilo: 'Hanv tuka sot tem sangin zalear, tum mhozo prann kaddtoloi; hanv tuka budh diin zalear, tum ti kanar gheuncho naim.'
16. Tedna Zedekiah razan Jeremiasak guptim oso soput dilo: 'Jivea Sorvesporachean, amkam jivprann dita tea Devachean, hanv tuzo prann kaddcho na, nhoi mhonn tuzo prann kaddunk sôdtoleanchê adhin tuka korcho na.'
17. Jeremiasan tedna Zedekiak mhollem: 'Sorvespor, Sorvsoktivont Dev, Israelacho Dev, oxem sangta: "Tum bhair sorxi ani tukach Babiloniechea razachea senapotinchê adhin korxi zalear, tuzo jiv surokxit urtolo, ani hea Xaracho ujean bhosm zaunk pavcho na. Tum ani tujem ghorannem jivim urtoleat.
18. Punn tum bhair vochona zaxi ani Babiloniechea razachea senapotinchê adhin tukach korina zaxi zalear, hem Xar Kaldeikaranchea tabeant poddtolem ani te hem Xar lasun uddoitole, ani tum tanchea chopkeantlo suttchoch naim." '
19. Magir Zedekia razan Jeremiasak sanglem: 'Kaldeikaranchê vatten gele tea Judeikaranchi mhaka bhirant dista: te ghoddiê mhaka tanchê adhin kortole ani he mhaka vollvollaitole.'
20. Jeremiasan portipall kelo:' Te tuka tanchê adhin korche nant. Hanvem tuka kolloilam tea Sorvesporachea utrak pallo mat di mhonn magtam, ani tujem sogllem borem zatolem ani tuzo jiv surokxit urtolo.
21. Punn tum tuka tanchê adhin korunk kobul na zaxi zalear, Sorvesporan mhaka dorxonan dakhoilam tem hem:
22. Judachea razachea nivasant jeô soglleô ostoriô urleat tankam soglleank Babiloniechea razachea senapotim-xim vhortole ani teô oxem gaitoleô: "Tujeach ixttamnim tuka bhuloun fottoilo, tuka tãnnim jikhun ghetlo! atam tujê pãi chiklant romble, ani tuka sôddun apunn pollun gele."
23. Hôi, tumchea sogllea bailank ani bhurgeam-ballank Kaldeikaram-xim vhortole ani tum porian tanchea hatantlo suttcho naim, punn Babiloniechea razachea chopkeant poddtoloi. Ani hem Xar zalear te lasun uddoitole!'
24. Magir Zedekian Jeremiasak oxem sanglem: 'Him utram anink konnacheach kanar poddunk dium naka; na zalear tum mortoloi.
25. Hanv tujê lagim uloilam mhonn mukheli aikotit, ani te tujê-xim ieun tuka mhonnttit: "Razak tunvem kitem sanglãi ani razan tuka kitem sanglem, tem sogllem amkam kolloi; kãich lipoinaka; na zalear ami tuzo jiv kaddtoleanv." Oxem zalear,
26. tum tankam oso zobab di: "Jonathanachea ghora vochun morunk tannem mhaka thoim porot dhaddcho nhoi mhonn razak hanvem magnni kelea." '
27. Ani khorench mhollear, soglle mukheli Jeremiasa-xim aile ani tachê lagim vichar korunk lagle. Jim utram razan sangunk adnia ghal'li, teanch utramnim tannem tankam zobab dilo. Tedna te oge ravle ani gele, kiteak tanchem ulovp konnakuch kollonk pavunk naslem.
28. Ani Jerusalem dusmananchea tabeant poddlem to dis porian Jeremias Rakhonndaranchea Angnnant ravlo. Ani Jerusalem tanchea tabeant poddlem tedna, to thoinch aslo.
