1. Tedna Sorvesporan mhaka mhollem: 'Moizes ani Samuel porian Mhojê mukhar ube ravun Mhaka vinoil'lo zalear, hê porjeche Hanv churchure dhôrcho naslom! Mhojea dolleam mukha-velim tankam dhanvddai! Vochum-di tankam!
2. Ani "khoim mhonn vechem ami?" oxem tim vichartit zalear, oxem sang tankam: "Sorvespor oxem sangta: Zorimori favo zal'lim, zorimorik sampoddtolim; zhuzak nemlolim zhuzant mortolim; dukollak nemlolim dukôll bhôgtolim; pordesachea gulamponnak nemlolim pordesant pavtolim!
3. "Char noxttam tancher Hanv dhaddtolom- uloita to Sorvespor! Zhuzant tim mortolim, sunnim tankam pois ôddun vhortolim, mollba velim suknnim tankam tonchun khatolim, ani urot titlem-i savzam girastolim.
4. Hezekiacho put Manasse hannem, Judacho raza aslo tedna, Jerusaleant kel'lea khotteponnank lagun, tankam polleun prithvechea sogllea porzank kanttallo bhogo-so kortolom."
5. [Sorvespor mhonntta:] 'Konn mhonn tuji doia kortolo, Jerusalea? Konn tujê pasot rudon kortolo? Konn mhonn vatter thambun tuji khobor-mat ghetolo?
6. Tunvem ki Mhaka sôddun dilai -uloita to Sorvespor!- tunvem ki Mhaka patt keleai; dekhun tujer Mhozo hat ubarun Hanvem tuzo nas kelo.
7. Tumchi doia korun-korun Mhaka puro zalem, dekhun desachea dôr eka nogrant Hanvem tumkam moddkull gheun asddun pola bhaxen varean ubonk dilim.Hanvem luttunk dilim, Mhojê porjecho Hanvem nas kelo, tori apleô khotteô vattô sôddun diunk tim kobul na zalim.
8. Tanchea vidvanchi sonkia doriachê renvê poros Hanvem vaddoili. Tornnê piraier porian tanchea zhuzariancher nas-korpiak dhaddun , tanchea avoiank Hanvem dukhant buddoileô. Ovchituch tancher Hanvem khônt ani akant haddlim.
9. Sat-ui put morun gele mhonnun tanchê avoik jhintt marta, ticho svas porian suttona. Ozun dis asa, tori ticho suria mavoll'lo, ti lojek sampoddlea, khontint buddlea. Urloleancho Hanv atam tanchea dusmananchea hatantlean zhuzant jiv kaddtolom. Uloita to Sorvespor!'
10. Agê mhojê mai, bhongom mhojem! Desant soglleam kodde zhogddim ani vad korunk tunvem mhaka zolm dilai. Hanv konnakuch poixe udar dina, nhoi mhonn konnakoddchech udar poixe ghena, tori sogllinch mhojer xirap ghaltat.
11. Sorvespora, khorea monan ani sogllea kallzan Tuji hanvem seva korunk na? Mhoje dusman sonkoxttak ani konixttaiek sampoddlole tedna, tanchê pasot vinoti korunk Tujê mukhar hanv ubo ravunk na?
12. Ut'torê thaun haddlolem ani tambean misoll'lolem lokhondd konnachean môddunk zata?'
13. [Sorvesporan mhaka sanglem:] 'Ak'khea desant tumi kel'lea tumchea sogllea patkank lagun tumchi dovlôt ani bhanddaram lutticho mhal korun sôddtolom. To anink tuka portun mellpacho na.
14. Tumi vollkhonant tea desant tumchea dusmananchim gulamam Hanv tumkam kortolom. Kiteak Mhojea krodhan uzo pettoila, tea ujean tumcho gobôr zatolo.'
15. [Tedna hanvem mhollem:] Sorvespora, Tum mhaka vollkhotai! Mhozo ugddas kôr, mhaka samball, mhaka dhumallo ditat tancho sudd ghe. Tujea ragan dhaddloli xikxa kitli-i togum, mhaka tanchea hatant morunk dium naka. Tujê khatir hanv ninda bhôgtam mhonn ugddas dhôr.
16. Tujim utram mhaka pavlim titlê-i pavtti hanvem tim gill'lim: Tujim utram mhojem dhadosponn, ani mhojea kallzacho sontôs; kiteak Sorvespora, Sorvsoktivont Deva, Hanv Tuzoch mhonn sogllim mhaka vollkhotat.
17. Moskoriô kortoleanchea vangdda hanv bosunk na, tanchea sangata hanvem mouza-i marunk na; Tuzo hat mhaka ghôtt dhôrtalo mhonnun hanv mugelo ekloch bosun ravlom, kiteak mhollear Tunvem mhaka tiddken bhôrloloi.
18. Mhaka sodanch dukh-khônt kiteak? Mhoje ghai kiteak pekonant? Vokhdancho kiteak mhonn tankam gunn poddona? Khorench, fosoitolea vhalla bhaxen, sukun vetolea udkam bhaxen, Tum mhaka zaunk sôddtai?
19. Tedna Sorvesporan oso zobab dilo: 'Tum portun iexi zalear, Hanv tuka portun Mhojê sevek laitolom ani tum Mhojê hujir astoloi. Ôrth naslolim utram ulounchê svater, tum zôr sarkem uloixi, tum novean Mhozo provadi zatoloi. Lôk tujê-xim portun ietolo, punn tum tanchê-xim portun vecho naim.
20. Hanv tuka hê porjê add êk pitullchi mozbut vonnôt kortolom; tim tujê add zhuztolim punn tujer zoit vhorchim nant, kiteak Tuka rakhunk ani nivarunk tujea sangata Hanv asam. Uloita to Sorvespor.
21. Khottea mon'xanchea chopkeantlo Hanv tuka nivartolom, ani zobordosti kortoleanchea tabeantlo Hanv tuka soddoitolom.'
