1. Konn-ui aplê potinik sôddun diit ani ti aplea poti thaun koddsorun dusreachi potin zait zalear, taka novean tichê-xim portun vochunk hôkk asa? To ganv sarkoch bhoxttovl'lo zaunk na? Ani tunvem kitleanch mogiam kodde xindollki keleai, ani tori Mhojê-xim portun ieunk tuka hôkk asa?! Uloita to Sorvespor!
2. Dolle voir ubarun dongranchê tengxek te lai ani polle! Tunvem xindollki korunk naslolo êk tori zago urla zait? Oronneant êk Arbi doddon ravta toso, rosteanchê deger tum tujea mogiank ravtalii. Tujê xindollken ani khottea kortubamnim tunvem ho ganv bhoxttailai;
3. Hea pasot Hanvem paus bond dovorla ani toddvo paus ieunk na. 'Tori tum vesvechem tondd gheun bhonvleai ani lojechi bhidda porian tunvem dhôrli naim.
4. Tori astam "Mhojea Bapa! mhojea tornneponnachea Ixtta! Sodanch To mhojer rag dhôrun ravtolo? Xevôtt porian To ragabhorit astolo?" -oxem atam porian Mhaka ulo marun tum mhonnonaslii? Polle, tunch atam oxem uloileai, tori, apleach vadeachi zaun, tum vaitt korit asai.'
6. Josiah razachea disamnim Sorvesporan mhaka mhollem: 'Tê ovisvaxi Israel-porjen kitem kelem tachi tuka khobor asa? Dôr-eka unch dongrar choddun ani dôr-eka hirvea zhadda ponda vochun, tinnem xindollki kelea.
7. Hanvem chintlolem: "hem sogllem kelea uprant ti Mhojê-xim portun ietoli." Punn ti aili na. Judan, tichê ghatki bhoinnin, hem sogllem dekhlem.
8. Tea ovisvaxi Israelachea rajeantlê porjen itlê pavtti pordvar kelo dekhun, Hanvem logn-môddneachem potr diun tika sôddli: hem-i Judan, tichê ghatki bhoinnin, dekhlem; tori tinnem bilkul bhirant dhôrli na; ti-i vochun xindollki korunk lagli.
9. Tichim loz-naslolim kamchari kamam itlim vaddon gelim, ki tinnem ak'kho ganv bhoxttailo; tinnem fatram kodde ani lankddachea kuddkeam kodde pordvar kelo.
10. Hachê-vôn paxtt zalem tem hem: Juda, tichi ghatki bhoinn, Mhojê xim portoli khorem, punn dhongeponnan, sogllea aplea kallzan nhoi. Uloita to Sorvespor.'
11. Ani Sorvesporan mhaka mhollem: 'Ghatki Juda mukhar ovisvaxi Israel niropradhi.
12. Tôr voch ani Ut'tori koddchean bob marun porgôtt kôr: "Ovisvaxi Israela, portun ie! Uloita to Sorvespor. Hanv tujer anink rag dhôrcho na, kiteak Hanv doiall-movall kallzacho. Uloita to Sorvespor. Hanv sodankal rag dhôrun ravcho na.
13. Sorvespora tujea Devacher tum kolpolii ani dôr-eka hirvea zhadda ponda porkeam kodde bhoxttolii ani Mhojea utrak tunvem kan diunk naim: ho tuzo guneanv vollkhun ghe. Uloita to Sorvespor.'
14. "Portun ieiat, ovisvaxi bhurgeamnô, - uloita to Sorvespor- Hanv ekloch tumcho Dhoni. Dôr-nograntlea ekleak ani dôr-kullantlea dogank kaddun, Hanv tumkam Sionant pavoitolom.
15. Mhojea mona pormannem choltat tosle gonvlli Hanv tumkam ditolom: te tumkam zannvaien ani vivekan choroitole.
16. Tea disamnim uloita to Sorvespor tumi tea desant vaddon-choddon êk vhôdd porza zalea uprant, konnuch mhonncho na: 'Sorvesporachea Korarachi Arkpett khoim asa?' Ti tanchea monant porian ieunchi na, konn ticho ugddas-ui kaddcho na, tim ticho husko korchim nant, ani ti novean bandchim nant.
17. Tea kallar Jerusaleak Sorvesporachem xinvason mhonnttolim ani sogllim raxttram Sorvesporachea nanvan thoim zoma zatolim; hea fuddem tim aplea vaitt kallzachê darunnaiê pormannem cholchim nant.
18. "Tea disamnim Judachem Ghorannem Israelachea Ghoranneak ektthovtolem; tumchea purvozank tanchem daiz zaunk êk dês ditolom mhonn Hanvem bhasail'lem, tôr tea desant tim dogam-i Ut'torê thaun vangdda ietolim."
19. Hanv oxem chint'talom: Koxem mhonn Hanv tumkam Mhojeô put-dhuvô mhonnun lêkhtolom? Êk sukhacho dês tumkam ditolom, sogllea raxttram modem bhov sundor daiz tumkam ditolom. Mhozo Bap! mhonnun tumi Mhaka lêkhtoleat mhonn ani Mhozo pattlav kortoleat mhonn Hanv somzotalom.
20. Punn khorench mhollear, aplea potik visvas-ghatki bail sôddta. toxench, Israelachea Ghorannea, tunvem Mhaka visvas-ghat kelai.' Uloita to Sorvespor!
21. Unch dongrancher êk tallo aikum ailo, Israelachea bhurgeanchi pinrgonni ani vinovnni, kiteak tim vankddea margan chol'leant, ani Sorvesporak, aplea Devak, tim visorleant.
22. Ovisvaxi bhurgeamnô, portun ieiat, tumchea ovisvaxiponnantlim Hanv tumkam borim kortolom.' Him polle ami hanga asanv, Tujê-xim ami ietanv, kiteak Tum Sorvespor, amcho Dev.
23. Khorem mhollear, dongor êk fosovnni ani toxench porvotancho boball. Khoreponnim Sorvespora amchea Deva sovem asa Israelachem taronn.
24. Punn amchea tornnattponnar thaun amchea purvozamnim koxtt korun zomoil'lem titlem-i tea Ollxikonnean giraslem: tanche paddeanche ani menddream-bokddeanche hindd, toxench tanchea putank ani tanchea dhuvank.
25. Oxim lojen bhoron ami zomnir poddum-ia, bemanachem angavlem nhesum-ia, kiteak Sorvespora amchea Devacher ami pap kelam ami ani amchea purvozamnim, amchea tornneponnar thaun tem aiz porian ani Sorvespora amchea Devachem utor ami aikunk na.'
