1. Ammonkaram vixim Sorvespor oxem sangta: Israelak put na kitem? Taka daiji na kai? Kiteak mhonn Milkom devak bhozpiank Gad prant tanchem daiz koxem mell'lem ani ho lôk Gadachea nogramnim ravunk aila?
2. Zhuz pettlem rê!', oxi bob Ammonkaranchea Rabba razdhani xarant Hanv aiko-xi kortolom: osle dis ietat. Uloita to Sorvespor! Tea desachem ghorttann zatolem ani tachim nogram ujean lason vetolim. Tedna aplea hatantlo luttun vhel'lo aplea daizacho dês Israel portun aplea tabeant ghetolo. Uloita to Sorvespor!
3. Heshbona, rudon kôr, kiteak Ar osadd poddlam. Rab'bachea dhuvamnô, killônch marat! Tumchem ang sakafottean pangrat, vilap korat, menddranchea oddpam modlean hevtten-tevtten dhanvat! Kiteak aplea sogllea puzariank ani kunvrank gheun Milkom dêv pordesant veta.
4. Mhojer kolpol'lê porjê, tujea bollachi kosli mhonn vhoddvik sangtalii tum! Tujê girestkaiecher patieun tum mhonnttalii: 'Mhaka virôdh korunk konn fuddem sorot?'
5. Punn sogllea vattamnim Hanv tujer kampero haddtolom. Uloita to Dhoni Sorvsoktivont Sorvespor !Tumam-somestanchi duspôtt zatoli, ek-eklo ap-aplê vatten dhanvun vetolo; pollun vetoleank novean ektthaim korunk konn ascho na.
6. (Punn uprant koidi kel'lea Ammonkarank Hanv portun haddtolom. Uloita to Sorvespor!)
7. Edoma vixim Sorvsoktivont Sorvespor oxem sangta: Temanant ili tori zannvai urunk na kai? Budhvontank atam anink il'li tori ok'kôl na kitem? Tanchi zannvai atam ubon geli?
8. Dedanant ravtoleamnô, pollun vochat! Dhanv marat! Khoinsôr tori vochun lipun ravat, kiteak Ezauk khast lavunk ietam tedna, Hanv tacher noxtt dhaddtolom.
9. Dakô-kaddpi tumchê-xim ail'le tôr, te apnna pattlean thoddeô tori dakô sôddche nasle kai? Ratchea vellar chor ail'le zalear, te apnnank zai titlench chorun vhorche nasle?
10. Punn Hanvem Ezauchim bhanddaram luttun vhelim, apli girestkai lipoun dovorche zage ugddun uddoile, ani atam tachean koxêch bhaxen lipunk zaina. Tachê kulliecho nas zalo, ani toxench tachea soireancho ani xezariancho: to anink nanch!
11. Tumchea onath bhurgeank sôddat: tanchea udorposonnachem Hanv polletolom, ani tumchea vidvank Mhojer visvas dovrum-di!
12. Kiteak Sorvespor oxem sangta: 'Polleiat, zankam khastichea patrantlem pieunk goroz aschi nasli, tankam porian tantlem pieunk poddtolem; mhonnttôch tukach kiteak khast poddchi na? Tuka khast poddonastana urcho naim, tuka pieunchem poddtolench.
13. Kiteak Mhojeach nanvan oso Hanvem soput ghetla uloita to Sorvespor! Bozras zaunk pavtolo lokak xirxiro haddta toslo zago; lôk tacheô kenddnniô kortolo ani tachem nanv gheun xirap ghaltolo; ani tachim sogllim nogram sorvkallak togpachem ghorttann zatolim.
14. Sorvespora koddsun hanvem êk sondêx ghetla, ani sogllea raxttrank eka niropiak pattoila: 'Zoma zaiat! Hea lokacher zhuz manddunk vochat! Loddai korunk toiar zaiat!'
15. Polle, Hanv tuka raxttram modem soglleam-vôn lhan kortolom, lokam modem konnuch tuka lêkhcho na.
16. Tuji nixtturai ani tujea kallzachi urmottai sogllim vollkhotat; hakach lagun tum fosovlai. Khoddpachea khanchimnim biradd kortai tum ani tujea unch dongranchê tonkxecher visvas dovrun asai? Zori tum ghonni bhaxen voir-voir tuzo gontther korxi, tori thoim thaun Hanv tuka sokla ôddun haddtolom. Uloita to Sorvespor!
17. Edom soglleank xirxiro haddta toslo zago zatolo; thoinchean ietea-veteank tacher nodor ghalina fuddem dhokko bostolo, ani taka poddleat te soglle ghave polleun tim fivnni ghaltolim. Uloita to Sorvespor!
18. Zoxem Sodomacho ani Gomorracho ani tanchea bhonvtonnchea nograncho bhosm zalo tedna ghòddlem, toxench hea fuddem anink konn thoim ravchona, konnuch monis thoim novean tthikann korcho na. Oxem mhonntta Sorvespor!
19. Polleiat, Jordanachea datt zongllantlo bhair sorun sodam pachvea chorva-moidanar vetolea eka xinva bhaxen, Hanv ietolom ani eka khinna bhitôr Edomitkarank dhanvddaitolom, ani Hanv venchun kaddin tea fuddariak thoim dovortolom. Kiteak Mhojê sarko konn? Mhaka neaisobhent konn ubo korit? Ani konn raza Mhaka virôdh korunk xokot?
20. Tôr atam Edoma add Sorvesporan kel'li ievzônn konn ti aikat, Temanant ravtoleam add Tannem kitem korunk chintlam tem zanno zaiat: Tanchea bhurgeank porian ubarun vhortole! Tancheach dolleam mukhar tanchea chorva moidanancher ietolo kampero ani xirxiro!
21. Tanchea nisonttonachea ghonnghonnan ak'khi prithvi kampta, Tambddea Doria porian to boball tthonntthonntta.
22. Polleiat, ghonni bhaxen konn-eklo voir choddun zhompoiô marta ani Bozrasa voir aple paktte vistarta.Tea disa Edomachea zhuzarianchem kalliz porsutt vennink pavlolê ostorêchea kallza sarkem zatolem.
23. Damaska vixim. Hamath ani Arpad him nogram lojek sampoddleant, kiteak tãnnim vaitt khobor aikolea. Xant korunk zaina toslea doria bhaxen tanchim kallzam ddubddubtat foddfoddtat.
24. Damask akantak sampddon pollunk laglo, Hea xaracher aila kampero. Porsutt-vennink pavlolê êkê ostorê bhaxen, tollmolleamim ani khontint to buddlo.
25. Kottakotta! Nanv vostem xar, moujechem xar, sarkench atam osadd poddlem!
26. Tea disa, tachea chovkamnim tache tornnatte khala xevtton poddtole ani tachea sogllea soinikancho nas zatolo. Uloita to Sorvsoktivont Sorvespor!
27. Damaskachea kottam bhitôr Hanv êk uzo pettoitolom ani tea ujean Ben-Hadadachea raznivasacho bhosm zatolo.
28. Nebukadnezzaran, Babiloniechea razan, aplea tabeant kel'lea Kedara vixim ani Hazorachea rajeam vixim Sorvespor oxem sangta: Utthat! Kedaracher akromonn korat! Udentichea lokancho nas korat!
29. Tanche tombu ani tanche hindd dhôrun vhorat, toxench tanchea tombunche podd'de ani tanchi soglli mustaiki; tanchim unttam-i gheun vochat, ani arddun sangat: Choikodde thorthoro!
30. Pollun vochat! Hazorant ravtoleamnô, zata titlê vegim vochat ani lipun ravat. uloita to Sorvespor! Kiteak Nebukadnezzaran, Babiloniechea razan, tumcher virudh êk ievzônn manddlea, to aplea monant tumcher add kãi chintnam gholloita.
31. Utthat! Svost asa ani surokxit jieta tea raxttracher akromonn korat! Uloita to Sorvespor! Tea raxttrak darvontte nant, addambe-i nant;tem pois-pois ek voddem asa!
32. Tanchea unttanchi lutt marunk tumkam melltolem, tanche hixpa bhaile hindd lutticho mhal zatolo. Tankam Hanv zollim-mollim ximpddaitolom, tea Boddkeank, ani sogllea vattamnim Hanv tanchem ghorttann kortolom. Uloita to Sorvespor!
33. Hazorant fokot kole astole, sorvkallak to osadd poddlolo ganv zatolo. Thoinsor konn anink ravunk vecho na, khoinchoch monis thoim novean tthikann korcho na.
34. Zedekiah Judachea razachê razvôttkechê survatek Elama virudh Sorvesporachem utor Jeremias provadiak pavlem. Tannem mhollem:
35. Sorvsoktivont Sorvespor oxem mhonntta: Elamacho bann Hanv môddun ghaltolom, tachea bollachem mukhel hatiar tem.
36. Elama virudh ontrallachea char-ui konnxeam thaun Hanv char-ui vare sôddtolom, ani tea vareanchea bollan tea sogllea lokak uboitolom: Elamantlo dhanvddail'lo lôk asro magunk pavunk na toslem ek-ui raxttr aschem na.
37. Elamkaranche dusman tancho jiv kaddunk ietat, tanchê mukhar Elamkarank koddkoddo-xe kortolom. Tancher Hanv noxtt dhaddtolom: Mhojea krodhacho uzo to! Uloita to Sorvespor! Tanchem nisontton kori porian torvar gheun tea soglleanchê pattik lagtolom.
38. Elamachea razancho ani sordarancho nas kortolom, ani thoim Mhojem xinvason ubartolom. Uloita to Sorvespor!
39. Punn xevottak Elamachea koidiank Hanv portun haddtolom. Uloita to Sorvespor!
