1. Sorvesporan oxem mhollem: 'Judachea rajnivasant denvun voch
2. ani thoim ho sondêx di: "Davidachea xinvasonar atam bosun aslolea raza, tum, tujê subedar, ani hea darvontteantlean ieti-veti tuji porza, sogllim tumi aikat!
3. Sorvespor oxem mhonntta: Nitin ani promannikponnan cholat; onit bhôgtolea soglleank zulum' kortoleanchea hatantlim soddoiat; videxiank, onathank, vidvank pillum nakat vô tankam kãi vaitt korum nakat; hea povitr zagear niropradhi rogot varoinakat.
4. Hi Mhoji adnia tumi fikirin pallxat zalear, Davidachea xinvasonar bostole te raza rothancher ani ghoddeancher bosun hea rajvaddeachea darvontteantlean provês kortole; tech nhoi, punn tanche subedar-ui ani tanchi porza.
5. Punn tumi hea Mhojea utrank bhere kan korxat zalear, Mhojeach Nanvan Hanv soput ghetam, uloita to Sorvespor!- hea razvaddeachem nisontton zatolem.
6. "Khorench, Judachea razachea nivasa vixim Sorvespor oxem mhonntta: Tum Mhaka Gileadachea pranta sarko sobit, Lebanonachê êkê voibhovi tonkxê sarko; toripunn Hanv tujem ek oronnem kortolom, osadd poddlolem nogor kortolom.
7. Zonn-ekleachea hatant aplim hatiaram diun, tujem nisontton korunk Hanvem monis kuxin kaddun dovorleat; tuje odik rosroxit devdar te kapun uddoitole ani ujeant ghaltole.
8. "Zaitea porkea raxttrantlo lôk hea Xarantlean vetolo, tedna tim ekamekak mhonnttolim: 'Hea vortea Xarak Sorvesporan oxem kiteak mhonn kelem?'
9. Ani zobab zatolo oso: 'Kiteak tãnnim Sorvesporacho, aplea Devacho, korar sôddun dilo ani dusrea devank bhôzunk ani tanchi seva korunk laglim." '
10. Mel'lea mon'xa khatir roddum nakat, Tachê khatir vilap korum nakat. Dukh kortat zalear, dês sôddun gela tachê khatir dukh korat, kiteak mhollear to kodinch portun ieuncho na, aplo khaxa dês to anink kodinch polleunk pavchona.
11. Shal'lum, Judachea raza Josiacho put, aplea bapai Josiachea xinvasonar boslolo, punn taka ho dês soddun vechem poddlem; tachê vixim Sorvespor oxem mhonntta: 'To hangasôr kednanch portun ieuncho na,
12. punn zoim taka koidi korun vhela thoinch to mortolo; ani ho dês to anink kednanch polleunk pavchona.'
13. Jim konn aplem ghor promannikponnan bandinant, nitin mon'subi korinastana apleô malloiô bandtat, apnnam sarkelea mon'xank kel'lea vavrachi mozuri dinant punn tanchê koddcho vavr funkott kaddun ghetat, tanchem kottakotta!
14. Jim konn oxem mhonnttat: "Hanv mhaka êk vixal razmahal bandtolom, voir malloier vareak ukte ani rund zonelanche kudd bandtolom, devdar rukhachim follim gheun tankam kovddam kortolom ani tankam zhogzhokit tambddo rông kaddtolom", tanchem kottakotta!
15. Tum odik rosroxit devdar haddun tuzo nivas bandtai mhonnun, apunn odik vorto raza mhonn chint'tai kitem? Tuzo bapui borim-borim jevnnam korun dhadoxi naslo kai? Punn to nitin ani promannikponnan chol'lo, ani tachem sogllem borem chol'lem.
16. To goribank ani gorjevontank nit korun ditalo. Oslê chalik mat Mhoji khori vollokh mhonnchi.
17. Punn tum zalear, tuje dolle ani tujem mon fokot tujeach svarti adavacher lavun asai, tum niropradhianchem rogot varoitai, zulum' kortai ani piddapidd ditai.'
18. Hea pasot, Judachea raza Josiacho put Jehoiakim, hachê vixim Sorvespor oxem sangta: ' "Bhongom mhojea bhavachem, mhojea babddea bhavachem!..." Bhongom mhojê bhoinnichem, mhojê babddê bhoinnichem!' -oslea utramnim konnuch tachêvixim vilap korcho na. "Dhonia mhojea! Raia mhojea!"- oslea-i utramnim konnuch tachê vixim vilap korcho na.
19. Gaddvak purunk vhortat toxem taka purunk vhortolim oddit-oddit Jerusaleachea darvontteam bhair taka uddoitolim.'
20. Lebanonache ghatt choddun voch ani thoim killonch marun sang: 'Bashanant tuzo tallo ubar, Abarima thaun arôdd ghal, kiteak sogllea tumchea mogiancho nas zal'lo asa!
21. Tumchea sukha-sontosachea vellar Hanv tumchê lagim uloil'lom. Punn tumi mhollem: "Ami aikunchinch nanv!" Bhurgeponnar san oxench tumi korit aileant: Mhojem utor aikunk kodinch tumi kobul na zalim.
22. Varo tumchea sogllea fuddariank pois-pois dhanvddaitolo ani tumche mogi koidi zaun gulamponnak pavtole. Tumchem khotteponn monant haddun tumkanch kedi loz bhògtoli.
23. Lebanonak tumi tumchem tthikann kelem, devdar rukhancher tumi tumcho gontther kelo. Zoxi ballonterak pavloli êk bail pinrgota, toxim tumi, tumcher akant ietolo tedna pinrgot astoleat!
24. Mhojea jivachean - uloita to Sorvespor!- oso Hanv soput ghetam: Judachea raza Jehoiakimacho put Koniak Hanv sangtam: Mhojea uzvea hatachi xik'ko asloli mudi zal'loi zalear-ui, tori Hanv tuka ôddun kaddun bhair fêktolom aslom.
25. Tuzo jiv kaddlea xivai ravchech nant tanchê adhin, tum tharea bhietai tanchê adhin, Babiloniechea raza Nebukadnezzarachê adhin, Kaldeikaranchê adhin Hanv tuka kortolom.
26. Tuka ani tuka zolma haddlolê avoik Hanv dusrea desant nirvaxi zaunk uddoitolom; tea desant tumi zolmunk nasleat, punn tumi dogam-i thoim mortoleat.
27. Hea desant porot ieunk tumi otrekun otrektoleat, punn hanga tumi kodinch portun pavchim nant.'
28. Ho Konia mol-naslolea futtlolea aidona sarko monis, konnak naka toslem matiechem aidon! Taka ani tachê sonstik onvollkhi desant kiteak mhonn fekun dilim?
29. Ô prithvê! ô prithvê! ô prithvê! Sorvesporachem utor aik.
30. Sorvespor oxem mhonntta: 'Hea mon'xak bhurgem-ball naslolo mhonn lêkhat. Tachea jivitak ies mellunk na, kiteak tachê sonstintlo konnuch Davidachea xinvasonar bosunk pavcho na, vô Judachea prantant novean raj cholounchona!'
