1. (Zedekiah, Josiacho put, Judacho raza, hachê razvôttkechê survek hem Sorvesporachem utor Jeremiasak pavlem:)
2. Sorvesporan mhaka oxem sanglem: 'Tuka atam chamddeacheô vadiô ani zunvachem ek addbarem korun ghe ani tim tujê manir ghal.
3. Magir Edomachea razak, Moabachea razak, Ammonkaranchea razak, Tirachea razak ani Sidonchea razak, ho sondêx pattoi; Judachea raza Zedekiak Jerusaleant mellunk ail'lea tanchea razdutam vorvim to pattoi.
4. Tanchê udexim tanchea dhoniank ho nirôp pattoi: "Sorvsoktivont Sorvespor, Israelacho Dev, oxem sangta: tumchea dhoniank oxem sangat:
5. Hanvem Mhojê vhôdd podven ani Mhozo hat vistarun prithum ani prithumer aslolea mon'xank ani mon'zatink rochleant. Mhaka khuxi asa tankam tim ditam.
6. Sod'deak him sogllim raxttram Hanvem Nebukadnezzar Babiloniecho raza, Mhozo sevôk, hachê svadhin keleant; tachi seva korunk Hanvem taka ranantlim zonavoram porian dileant.
7. (Sogllim raxttram tachi seva kortolim, toxench tachea putachi ani tachea natvachi. Magir, tacheach desachi palli pavtôch, dusrea bollixtt raxttranchê ani thor razanchê sot'tê khal to astolo.)
8. Khoinchem-i raxttr vô raj Nebukadnezzar Babilonichea razachi chakri korina vô apli man Babiloniechea zunvak bagaunk raji zaina tôr, tea raxttrak Hanv zhuzan, bhuken ani piddê-xidden xikxa laitolom.
9. Mhonnttôch tumchê pallien tumchea provadianchem, parkhianchem, sopnekaranchem, jaduvaleanchem ani ghaddianchem tumi aikum nakat; te tumkam oxem sangtat: Babiloniechea razachim tumi gulamam zaunchim nant.
10. Te tumkam fottkirim bhakitam kortat ani tancho porinnam oso zatolo ki Hanv tumkam tumchea desa bhair ghaltolom, tumkam pois dhanvddaitolom ani tumcho nas kortolom.
11. Urfattim, jem raxttr Babiloniechea razachê sot'tek apli man bagait ani tachi seva korit, taka apleach desant dovortolom, tim aplim xetam kôstolim ani teach aplea desant xantin ravtolim. Uloita to Sorvespor! " '
12. Judachea razak, Zedekiak, hanvem tench sanglem. Hanvem taka mhollem: 'Tumcheô mani bagaiat ani Babiloniechea razachem zum gheiat; tachi ani tachê porjechi seva korat, ani oxim tumcho jiv rakhat.
13. (Tum ani tuji porza kiteak mhonn zhuzan, bhuken ani piddê-xidden morunk itlim axetat? Babiloniechea razachi seva korunk toiar na tea raxttrak oslea noxttamnim Apunn xikxa ditolo mhonn Sorvesporan dhomki dilea).
14. "Tumi Babiloniechea razachim gulamam zaunchim nant" - oxem tumkam sangtat tea provadiank tumi kan dinakat. Te tumkam fottkire sondêx ditat.
15. Hanvem tankam pattounk nant dekhun -uloita to Sorvespor!- te Mhojea nanvan tumkam fottkirim bhakitam kortat; hacho porinnam ho zatolo: Hanv tumkam tumchea desantlim bhair ghaltolom, tumcho nas zatolo ani toxench tumkam bhakitam kortat tea-i provadiancho nas zatolo.'
16. Hanv iadnikam-i kodde ani sogllea loka kodde oso uloilom: 'Sorvespor oxem sangta: "Tumchea provadianchim utram aikum nakat; te tumkam hê bhaxen bhakit kortat: 'Polleiat, vegim-vegim Babiloniê thaun Sorvesporachea Mondirachim aidonam portun haddchim asat.' Te tumkam fottkirim bhakitam kortat.
17. (Tanchem aikum nakat; Babiloniechea razachi seva korat ani oso tumcho jiv tumi samballtoleat. Kiteak mhonn hea Xarachem ghorttann zaunchem?)
18. Te osol-khore provadi zal'le zalear, Sorvesporachem utor khoreaninch tankam pavlolem zalear, Sorvesporachea Mondirant toxench Judasachea raznivasant ani Jerusaleant ozun urleant tim aidonam Babiloniek vechim nhoi mhonn Sorvsoktivont Sorvesporak tanchi vinoti zaunk favo asli.
19. tannem khambe, pitullcho Sagôr, asonam ani anink kãi Devmondirachim aidonam tannem Xarant dovorlolim. Hanchê vixim Sorvespor oxem mhonnta.
20. Jedna Nebukadnezzaran, Babiloniechea razan, Judachea razak, Jehoiakimachea puta Jekoniak ani Judachea ani Jerusantlea sogllea vhodda mon'xank Jerusalea thaun Babiloniechea pordesant vhelim tedna,
21. Khorench, jim aidonam Sorvesporachea Mondirant, Judachea raznivasant ani Jerusaleant ozun urlolim, tanchê vixim Sorvsoktivont Sorvespor, Israelacho Dev, oxem sangta:
22. Te him aidonam Babiloniek vhortolech. Hanv tanchi sudd ghei porian tim thoinch urtolim. Uloita to Sorvespor! (Magir Hanv thoim thaun tim porot haddtolom ani hea zagear novean dovortolom.)" '
