1. Hem Sorvesporachem utor Jeremiasak pavlem:
2. Sorvespor, Israelacho Dev, oxem sangta: "Hanvem tuka sangleant tim sogllim utram eka pustokar boroun dovor.
3. Kiteak -uloita to Sorvespor!- Israelachi ani Judachi, Mhojê porjechi, atanchi gôt Hanv bodlunk vetam ani tankam tanchê adlê gotir portun haddtolom: osle dis ietat; ani tanchea purvozank Hanvem dil'lo dês tanchê svadhin korunk Hanv tankam portun haddtolom. " '
4. Israela ani Juda vixim Sorvespor uloilo tim utram him:
5. Sorvespor oxem mhonntta: Xanticho nhoi, punn bhiranticho ani akantacho avaz ami aikola.
6. Atam vicharat ani polleiat: dadlo monis bhurgeank zolma haddunk xokta? Punn dôr-eklo dadlo porsutt zaunk pavlolê bailê bhaxen aple hat penkttar dovrun asa mhonn Hanv dekhtam: tôr hem koxem? Dôr-ekleachem mukhamoll koxem mhonn dhovsar zalam?
7. Denvlem amcher noxtt! Ho dis khorench vhoddlo, hachê oslo anink na! Jakobak konixttaiecho kall ho, punn tantlo to sutt'tolo.
8. (Tea disa uloita to Sorvsoktivont Sorvespor! tanchê mani velem zunvachem addborem Hanv môddun uddoitolom ani tancheô sanklli tôddtolom; ani tim anink kednanch porkeanchim gulamam zaunchim nant,
9. punn Sorvespora aplea Devachi ani tanchê khatir Hanv upzoitolom tea tanchea raza Davidachi tim seva kortolim.)
10. Tôr, Jakoba, Mhojea sevoka, bhieum naka, -uloita to Sorvespor!- Israela, akantum naka! kiteak poixilea raxttrantlo Hanv tuka nivartolom, ani jea desant tujê sonstik koidi korun vhelea, tea desantli Hanv tika portun haddtolom. Jakob porot ietolo ani xantin jietolo, to surokxit astolo ani taka anink konn tras diuncho na.
11. Tujem taronn korunk tujê sangatim Hanv asam -uloita to Sorvespor!- Jea desam modem tuka Hanvem dhanvddail'lo, tea desank Hanv nattak kortolom, punn tuka mat nattak korcho na. Favo titlich tuka xist laitolom, punn khast dilea bogor Hanv tuka sôddcho na.
12. Hôi, Hanv Sorvespor oxem mhonnttam: tuzo ghavo pekpacho na, tujê piddek vokhod na.
13. Tujê khatir vinoti korunk konn na, tujea chovnank vokhdam nant, tuka novean sarko boro korunk upai nanch.
14. Soglle tuje mogi tuka visorleat, tuji khobor porian te ghenant. Dusman mar ghalta tosoch Hanvem tuka boroch mar dila, kiteak bhov vhôdd tuzo guneanv ani tujea patkancho hixôbuch na.
15. Tujea ghaveak lagun kiteak mhonn tum xinntai? Tujê dukhik vokhod na! Tuzo guneanv itlo vhôdd ani tujim patkam hixôb-naslolim dekhun, hi khast Hanvem tuka lailea.
16. Tori tuka girasun uddoilo tea soglleank Hanv girastolom; soglle tuje dusman, êk-ui bhairainastana, koidi zaun pordesant pavtole. Je tuji lutt marun gele, tech lutticho mhal zatole; ani zãnnim tuka nagoila, tankanch dusre nagoitole.
17. Te tuka mhonnttale 'Zati-bhailo lôk', 'konn porva-korinaslolem Sion-xar'; tôr Hanv tuji bholaiki tuka porti ditolom ani tuje ghave pekoitolom. Uloita to Sorvespor!
18. Sorvespor oxem mhonntta: Jakobache tombu Hanv novean tanntolom, tachea ravnneanchi doia kortolom: Sion-Xar apleach ghorttanacher bandon ietolem, razvaddo aslo teach zagear voir sortolo.
19. Tanchea tonddantlim bhair sortolim dhinvasnnechim gitam ani khuxalkaieche ul'las. Hanv tanchi sonkia vaddoitolom, tanchi sonkia anink denvchi na. Tankam man-adôr mello-so kortolom, tankam beman bhôgunk diuncho na.
20. Adlêch bhaxen tanchim bhurgim astolim, tancho somudai Mhojê hujir sodanch thir urtolo; tankam dhumallo ditat titleank-ui Hanv khast laitolom.
21. Tanchê modlo eklo tancho kunvôr zaunk pavtolo; tancheach loka modlo tancho fuddari upzotolo. Meklleponnim Mhojê-xim ieunk Hanv taka ditolom; na tôr Mhojê sorxim ieunk konnak mhonn dhir asot? Uloita to Sorvespor!
22. Tumi zatoleat Mhoji porza, ani Hanv zatolom tumcho Dev
23. Polleiat, Sorvesporachea krodhachem vadoll sutt'ta, bhirankull tufan uprasta, tem noxtteanchê tokler futt'ta.
24. Aplea monant Tannem ievjil'lem titlem-i pallun haddlea xivai, ani xarthi pavoilea bogor, Sorvesporacho krôdh tharcho na. Ietea disamnim hem tumkam tthavem zatolem.
