1. Israelachea Ghorannea! Sorvespor tuka sangta tea utrak kan di. Sorvespor oxem mhonntta:
2. Raxttrancheô vattô xikum naka, ontralla veleô khunna polleun raxttram bhielear bhieum-di, punn tum tankam bhieum naka. Kiteak porzancheô chali-riti sarkeôch polkeô:
3. Ranantlem katrun haddlolem fokot lankudd tem, kolakaran hatiar gheun kel'lem kam tem,
4. magir rupean ani bhangaran nettoil'lem, uprant tem halona zaunk tutio ani khille gheun ghôtt kel'lem.
5. Porsant lail'lea chibddam modem ubo kel'lea toddgea sarke, hea tanchea kud'dea devank zap na, tanchean cholunk zaina dekhun tankam uklun vhorunk zai. Tankam bhieum nakat: tanchean tumkam vaitt kãi korunk zaina; tanchean borem-i korunk zaina.'
6. Sorvespora, Tujê sarko konn? Tum thôr-vorto, ani thòr-vortem Tujem bollixtt Nanv!
7. Raxttranchea Raza, Tujem bhem dhôrina toslo konn asot? Hôi. Tuka favo tosli gozal ti. Raxttrantlea sogllea zannaram modem ani tanchea sogllea rajeamnim, Tujê sarko anink konn asa?
8. Te soglle nennar ani sarke botte: lankddacho kuddko kitem mhonn tankam xikoitolo?
9. Tarshisa thaun haddlolem rupem, ani Ofira thaun haddlolem bhangar; kolakarachem ani xettichem kam tem: Tankam zambllea ani kirmiji-lal lugttan nhesoitat. Hem sogllem kolakaramnim hikmotin kel'lo vavr.
10. Punn Sorvespor ekloch khoro Dev.To jivont Dev ani Sasnnik Raza. Tachea krodhan bhuim kampta, ani raxttram kodde Tacho krôdh tollunk zaina.
11. Sorvespor mhonntta: 'Tum tankam oxem sang: "Mollob ani prithum' rochlim nant te dèv prithver ani mollba ponddak nanch zatole." '
12. Aplê podven Tannem prithvi rochlea, Aplê zannvaien Tannem sonvsar thir kelo, ani Aplê budhin Tannem ontrall vistarlem.
13. Tacho tallo goddgoddta tedna ontrallar udkam ghongetat; To kupam prithvechea ximam thaun voir choddo-xim korta, To paus dhaddchea vellar zhoglannim dhaddta, ani Aplea bhanddarantlo varo sôddta.
14. Hem polleun sogllo lôk kãich somzonastana thottak zata; apnnench kel'lea murtim mukhar dôr-êk xêtt lojek poddta, kiteak tannench kel'leô protima soglleô fottkireô ani prann-nasloleô.
15. Teô soglleô mol-nasloleô, beporva favo asloleô; khastichea disa tancho nas zatolo.
16. Jakobacho Dev hanchê sarko nhoi: sogllem Tannench rochun haddlam, ani Israelachem kull Tannem Apnnak vinchun kaddlolem daiz. Tachem Nanv Sorvsoktivont Sorvespor.
17. Tumkam veddho ghal'lo asa: tumchi khattli-pottli bandat.
18. Kiteak Sorvespor oxem mhonntta: 'Hê pavtti hea desant ravtolea soglleank Hanv bhair ghalunk vetanch; ani tãnnim Mhaka sôdun kaddcho mhonn, tancher Hanv konixttai dhaddtolom!'
19. Jerusaleacho lôk oxi bob marunk laglo: Ai Saiba! Kitlim mhonn ami ghaiall zaleanv! Amchea ghaveank ilaz na! Punn ami chintlolem: 'Itlench zalear, amchean ozun sosunk zata!'
20. Punn atam amche tombu bhòngle, Tancheô soglleô doriô tuttun geleô;amchim bhurgim-ballam sogllim amkam sôddun gelim ani atam konn na. Amche tombu novean tannunk ani amche podd'dde lavunk konnuch na.
21. Pixe te amche fuddari, Sorvesporachi budh gheunk te Taka sôdunk vochunk na. Ani tanchea sogllea lokachi duspôtt zalea.
22. Aikat! Bhirankull khobor! Ut'torechea desa thaun êk vorixtt boball ieta! Tanchi fouz Judachim nogram atam osadd korun sôddtoli ani thoim fokot kole ravtole.
23. Sorvespora, mon'xancheô vattô tanchea hatant nant, aplim panvlam nitt vatter ghalunk tanchê adhin na mhonn ami zannonv.
24. Amkam xikxa lai, Sorvespora, punn chôdd khoraien lainaka. Tujea krodhan nhoi, na zalear Tum amkam pudd korun sôddtoloi.
25. Tuka vollkhonant tea raxttrancher ani Tujem Nanv ghenant tea kullancher Tuzo krôdh rokhoi. Kiteak Jakobak tãnnim giraslo, Tãnnim amchem sarkem nisontton kelem, ani amchea desachem ghorttann kelem.
