1. [ Sorvespor mhonntta:] 'Lokhonddachê likhnnen Judachem patok boroil'lem asa, vozrachea tonkan tanchea kallzachê follier ani tanchea vedinchea xingancher tem kantoil'lem asa.
2. Ani atam unch dongrancher, dôr-eka hirvea zhadda kuxik tãnnim ubarlolea tanchea vedincho ani Ashera devichea khambeancho tanchim bhurgim ugddas kortat.
3. Toxench sogllea tujea desant tunvem kel'lea patkam pasot Mhojea porvotar ani uktea moidanar tujea dusmanank tuji girestkai ani tujim sogllim bhanddaram luttunk ditolom.
4. Hanvem tuka dil'lea tujea daizacho dês tunvem sôddun diuncho poddtolo, ani tum vollkhonaim tea desant tujea dusmananchi chakri korunk Hanv tuka dhaddtolom; kiteak tunvench pettoil'lo Mhozo zollto krôdh sodankal zollot astolo.
5. Sorvespor oxem mhonntta: 'Jim konn mon'xancher visvas dovortat, jim konn kuddichea bollar patietat, ani zanchem kalliz Sorvespora thaun pois veta, tancher xirap poddum!
6. Oronneantlea jhilkutta sarkim tim: kitem borem iet tôr, tem tankam bhôgunk mellchem na; oronneantlea korddeam soddeancher, kharea, lôk ravonaslolea ganvant, tankam tthikann korunk poddtolem.
7. Sorvesporacher patieun ravtat tim subhagi. Tancho visvas Sorvesporacher.
8. Udkachê dhodder lail'lea rukha sarkim tim; tanchim pallam udkam-xim porian pavtat, ani gormi poddta tedna tankam koslich bhirant na, kiteak tanchim panam pachvinch urtat; dukollachea vorsa tankam husko na; tim follam diit astolim.
9. Kalliz soglleam-vôn ghatki, itlem vaitt ki taka anink ilaz na: tache gutt konnak tthave?
10. Hanv, Sorvespor, kallzancho tthav ghetam, monam topasun kaddtam, zonn-ekleachea kornniam pormannem mon'xank mozuri ditam.
11. Konkari apnnem ghalunk naslolea tantiancher rovannek bosta. Khottea upaiamnim girestkai punzaitat tim mon'xam toslinch: modlê piraieruch astana ti tankam sôddun vetoli ani tim sarkinch pixim mhonn gomon ietolem.'
12. Survek thaun Unch Dongrar ek mhoimevont xinvason manddlolem asa: tem mhollear amchem Povitr Sthan.
13. Sorvespora, Israelachea Bhorvanxea, Tuka sôddun vetat titlim-i lojek poddtolim; Tuka patt kortat tim dhullicher boroil'lea nanvam vori nanch zatolim, kiteak Sorvesporak, Jivea Udkachê Zhorik, tãnnim patt kelea.
14. Mhaka boro kôr, Sorvespora, ani hanv boro zatolom; mhaka taronn di ani mhojem taronn zatolem, kiteak Tujich hanv stuti kortam.
15. Polle, tim mhaka mhonnttat: 'Sorvesporachem utor khoim pavlem atam? Tem Tannem pallchem ani dakhounchem.'
16. Punn vaitt-vign tancher dhaddunk hanvem kodinch Tujê lagim magunk na; sonkoxttachea disak hanv otrekun ravunk na: hem Tum borem zannoi. Mhojea magnneant hanvem kitem sanglam tem Tuka tthavem.
17. Tum mhojer akant haddta toslo Dev zaum naka; vignachea disa Tum mhozo asro.
18. Mhaka dhumallo ditoleank lojek ghal, punn mhaka mat ghalum naka. Tancher zalear kampero dhadd, mhojer nhoi. Nisonttonacho dis tancher dhadd; tanchi pudd kôr, don pavtti tanchi pudd kôr!
19. Sorvesporan oxem mhaka sanglem: '[Jeremias,] Judache raza Porjechea Fuddarianchea Darvontteantlean ietat-vetat: voch ani thoim ubo rav; magir Jerusaleachea sogllea darvontteancher-ui tosoch ubo rav.
20. Tankam sang: "Judachea razamnô, Judachea mon'xamnô, ani hea darvontteantlean bhair-bhitôr sortat tim tumi sogllim Jerusaleant ravtoleamnô, hanv sangtam taka chitan kan diat.
21. Sorvespor mhonntta: Tumchea jivak tumi mol ditat zalear, Son'vara disa koslench ojem vhorum nakat, nhoi mhonn Jerusaleachea darvontteantlean tem bhitôr kaddum nakat.
22. Son'vara disa tumchea ghorantlem koslench ojem bhair kaddum nakat vô kosloch vavr korum nakat. Hanvem tumchea purvozank adnia ghal'li toxich, tumi-i Son'var povitr dis koso samballat.
23. Tori tãnnim tedna Mhojem aikolem na, Mhaka kan diunkuch na: portench zalear, apleach vadeachim zaun, tim Mhaka chit dina zalim, Mhojem utor manun gheunk kobul zalim nant.
24. Punn atam chotraien Mhojem aikat mhonn tankam sang -uloita to Sorvespor! Son'vara disa hea Xarachea darvontteantlean koslench ojem bhitôr kaddum nakat, ani Son'var povitr dis koso samballun vavr-dhondo korum nakat.
25. Oxem cholxat zalear, tumche raza ani kunvor hea Xarachea darvontteantlean provês kortole ani Davidachea xinvasonar bostole. Rothancher ani ghoddeancher te bosun ietole tech nhoi, punn tanche fuddari, Judacho lôk ani Jerusaleant ravtat tim sogllim. Ani hea Xarant sodankal lôk astolo.
26. Judasachea nogram thaun, Jerusalea bhonvtim asloleam gramam thaun ho lôk ietolo; to Benjaminachea pranta thaun, doria-degechê soklattechea vattarantlo ani dongri vattarantlo ietolo, ani Negeba thaun-ui ietolo. Sorvesporachea Mondirant hôm' ani bolidanam, dhanneacheô bhettovnniô ani dhump vopunk ietolo, dhinvasnnechim bolidanam bhettounk ietolo.
27. Punn tumi Mhojem aikunk zai: Son'var povitr dis koso samballat, ani Son'vara disa Jerusaleachea darvontteantlean ojim gheun bhitôr sorum nakat; na zalear, Hanv tachea darvontteank uzo laitolom: ho uzo Jerusaleachim ravullam girastolo ani to kodinch palovcho na." '
