1. Sorvespor oxem mhonntta: Babiloniê add ani Kaldeikaram add êk nas-korpi varo sôddtolom.
2. Hanv Babilonient varo-divpiank dhaddtolom ani te tika asddun asddun ticho dês osadd kortole; ani tichea noxttachea disa te tika sobhonvtim veddho ghaltole.
3. Khoincheach dhonnuxiak aplo dhonu bagaunk dium nakat! Ddhal ghalun boddai dakhounkuch dium nakat! Tichea tornnatteank sôddum nakat! Tichi ak'khi fouz nattak korat!
4. Martat titleank-ui Kaldeikaranchea desant poddum-di, torvarin aspas tôploleank Babiloniechea rosteancher poddum-di!
5. Zori Israelachea Povitr Devacher kel'lea opradhamnim tancho dês bhòrlolo, tori Israelak ani Judak tanchea Devan, Sorvsoktivont Sorvesporan, sôddunk nant.
6. Babilonientlim pollun vochat, tumi sogllim ap-aplo jiv rakhat, To tika tichea kortubancho muxaro diunk veta; punn tichea guneanvak lagun tika poddta tê khastint tumcho-i nas zaunk dium nakat.
7. Sorvesporachea hatant Babiloniaek bhangarachem patr asli, tinnem ak'khea sonvsarak pieunk diun bebdo kelo, raxttram ticho dakancho soro pielim ani pixim zaunk laglim.
8. Babilonia ovchit xevtton poddli, ani tiche kuddkean-kuddke zale: tichê pasot rudon korat! tiche ghai pekounk molom haddunk vochat; tika ghoddiek gunn poddot!
9. Ami Babiloniek bori korunk upai ghetle, punn ti bori zaunkuch na. Tika sôddun diat atam, cholat, sogllim ami ap-aplea desant vochum-ia. Hôi, tichem xikxechem formonn mollba porian pavta, kupam porian voir choddta.
10. Sorvesporan amchem promannikponn uktem korun dakhoilem. Cholat, Sorvesporan, amchea Devan, kitem kelam tem Sionant porgôttum-ia.
11. Tumche bann pazun haddat, bannamnim bhate bhôrun haddat. Sorvesporan Mediekaranchea razank zagoile, kiteak Babiloniecho nas korunk To ievjita; hê bhaxen Sorvespor sudd ghetolo, Aplea Mondirachem ghorttann kelem mhonn farikponn ghetolo.
12. Babiloniechea kottam add bavtto ubarat! Rakhonndarancho pongôdd ghôtt zaum-di! Pahredarank aplea zagear dovrat! Doddeak ravat! Kiteak, jem Sorvesporan ievjil'lem ani Babilonient ravtoleank Apunn kortolo mhonn bhasail'lem, tem Tannem pall'llem.
13. Bhorpur udkam lagim tum ravtai, bhanddaramnim girest zaleai, punn atam tuzo xevôtt pavlo, tujê luttichem map bhòrlem.
14. Sorvsoktivont Sorvesporan Apleach Nanvan oso soput ghetlo: Tollamnim zal'lê porim Hanv tuka mon'xamnim bhôrtolom, ani te tujê virudh zoitacho sad ghaltole.
15. Tannem Aplê podven prithvi rochlea, Aplê zannvaien sonvsar thir kela, Aplê budhin ontrall vistarlam.
16. Tacho tallo goddgoddta tedna mollba velim udkam ghongetat; prithvechea ximam thaun To kupank voir choddo-xim korta, paus dhaddchea vellar zoglannim sôddta ani Aplea bhanddarantlo varo bhair kaddta.
17. Hem polleun sogllim mon'xam somjikai mellona zaun thottak zatat, dôr-êk xêtt apnnem kell'Ii murti polleun lojek sampoddta; tannem kel'leô murti lokak fottovpacheô vostu, tanchê bhitôr svasuch na.
18. Teô murti mhollear polkeponn, hanspacheô gozali, tankam xikxa diunchea vellar teô nanch zatat.
19. Zo Dev Jakobachem Daiz, To hanchê sarko nhoi, kiteak Tannench soglleô vostu keleat, ani Israel porza mhollear Tannem Apnnak vinchun kaddlolem daiz; Sorvsoktivont Sorvespor Tachem Nanv.
20. [Babiloniê,] tum aslii Mhozo tutio, Mhojem zhuzachem hatiar. Tuka dhôrun raxttranchi Hanvem pudd keli, tuka dhôrun rajeanchi Hanvem pudd keli,
21. tuka dhôrun ghoddeanchi toxem ghoddesvaranchi Hanvem pudd keli, tuka dhôrun rothanchi toxem roth cholovpianchi Hanvem pudd keli,
22. tuka dhôrun dadleanchi toxem bailanchi Hanvem pudd keli, tuka dhôrun zannteanchi toxem nennteanchi Hanvem pudd keli, tuka dhôrun tornneam cheddeanchi ani cheddvanchi Hanvem pudd keli,
23. tuka dhôrun gonvllianchi ani hinddanchi Hanvem pudd keli, tuka dhôrun zotkaranchi ani zotak bandloleanchi Hanvem pudd keli, tuka dhôrun razpalanchi ani odhikarianchi Hanvem pudd keli.
24. Jem sogllem vaitt Babilonien ani Kaldeikaramnim Sionak kelam,tachem farikponn tumcheach dolleam mukhar Hanv tanchê koddchem ghetolom. Uloita to Sorvespor!
25. Nas kortolea porvota, ak'khea jogacho nas korpi tum! Tôr tuka khast lavunk Hanv ietam uloita to Sorvespor! Tuka xikxa lavunk Hanv mhozo hat ubartolom, khoddpam voir thaun tuka sokla xevttun uddoitolom, lasun korpol'lea porvota sarko Hanv tuka kortolom.
26. Êk porian konnxea-sondhicho fatôr, nhoi mhonn êk buniadicho fatôr, tujê koddsun konnuch anink kaddcho na. Kiteak sorv kallak tum ek oronnem zatoloi. Uloita to Sorvespor!
27. Ak'khea jogant zhuzak bavtto ubarat, raxttram modem tuturi vazoiat! Babiloniê add zhuz korunk raxttrank toiar korat, Ararat, Min'ni ani Ashkenaz hea raxttrank apoiat; tichea dusmanank foujent bhitôr kaddun, ekleak senapoti nemat. Zoxem tollanchem birem toddkean ieta, toxench ghoddeanchi svari fêr marun ieum-di.
28. Tichê add zhuz korunk raxttranchi toiari korat: Mediechea razank, tanchea senapotink ani sogllea tanchea odhikariank ani tanchê sot'tê khal aslolea ak'khea desak zhuzak apoiat.
29. Tedna prithvi kampli ani dukhin tollmoll'li, kiteak Babiloniê add Sorvesporachi ievzônn pallon ieta: Babiloniecho dês bodlun tachem ek lôk-naslolem oronnem korchem, hi Tachi ievzonn.
30. Babiloniechea zhuzariamnim loddai bond keli; te aplea kil'leamnim hat kovllun bosleat; tanchem boll virgholun gelem, tanchi gôt atam bailam sarki zalea.Tichea ghorank uzo pettla, tichea darvontteanche addambe moddon poddle.
31. Sondexkara pattlean sondexkar, niropia pattlean niropi, Babiloniechea razak khobor diunk ietat: tachem akhem xar jikhun ghetlem,
32. nodintlean pãiamnim par kaddpacheô vattô dusmananchea tabeant poddleô, tiche kil'le lasun uddoile, ani tiche zhuzari tharea akantak sampoddle [hi soglli khobor razak haddtat].
33. Kiteak Sorvsoktivont Sorvespor,Israelacho Dev, oxem mhonntta: Babiloniechem xar eka môllnnechea kholla sarkem zalam; thoddoch vêll urla ani rokddoch tika lunvun kaddcho vêll pavtolo.
34. Nebukadnezzaran, Babiloniechea razan, mhaka girasli, mhoji sarki pudd keli, tannem mhaka rikamem aidon korun dovorlam; Ara bhaxen tannem mhaka ak'khi gill'li, mhojea svadik masan aplem pott bhôrlem, ani onkun mhaka bhair uddoili.
35. Sionachi porza oxem mhonntta: Mhaka Babilonien ghai keleat te ticheruch poddum! Jerusaleantlo lôk mhonntta: Kaldeikarancher mhojem rogot buzum!
36. Hea pasot Sorvespor oxem mhonntta: Polle, tujê votin sudd gheunchê khatir tujê vatten Hanv loddai kortolom. Hanv tichi nôd sukoitolom, ticheô zhori-i suko-xeô kortolom.
37. Ani Babilonia zatoli êk fatranchi ras, êk koleanchi dhôl, lokank xirxiro haddta toslo êk zago ani kenddnniancho mhal; tea ganvant konn anink ravcho na.
38. Xinva bhaxen te borabôr gorôz ghaltat, xinvanchea petteam bhaxen gurgurtat.
39. Zoran foddfoddtat te? Hanv tankam ek pivonn toiar kortolom, te lal zai-sôr tem tankam pieunk ditolom, ani sorvkallak te nhidunuch urtole, nhidentle anink kednanch utthche nant. Uloita to Sorvespor!
40. Menddram bhaxen, bokddeam ani bokddiam bhaxen, Hanv tankam ôddun sojint marunk vhortolom.
41. Kitem sangchem?! Ak'kho sonvsar Babiloniechi tokhnnai kortalo, tika atam jikhun ghetli, ti dusmananchea tabeant poddli! Sogllea raxttram modem koslo mhonn xirxiro haddpacho zago Babilonia zaunk pavlea!
42. Somdir Babiloniecher choddla,tachea ghongetolea lharam pondak ti buddlea.
43. Tichim nogram osadd poddleant, sukem-korddem oronnem zaleant; thoim atam konn ravona, thoinsorlean ietim-vetim atam konn na.
44. Hanv Babilonient Bel devak khastlaitolom ani tannem gill'lam titlem-i tachea tonddantlean bhair kaddtolom. Hea fuddem raxttram taka bhôzunk anink vechim nant. Babiloniechim kottam porian moddon poddtolim.
45. Porjê mhojê, thoinsorlim bhair sorun vochat; Sorvesporachea zolltea krodhak sampoddna zaunk tumcho jiv rakhat, zonn-eklean ap-aplo jiv rakhcho.
46. Bhezudd zaum nakat! Desant ddag poddleat te aikun ghabrum nakat: êk ddag hea vorsa poddta, dusrea vorsa veglloch posorta; prithver zobordosti vosta, ani eka zulumdara pattlean dusro zulumdar ieta.
47. Polleiat, Babiloniechea kud'dea devank Hanvem xikxa divpache dis pavot ietat. Tedna prann kaddloleanchim pretam ganvant ximpoddlolim astolim, tedna ak'kho dês lojek poddtolo.
48. Magir ontrall ani prithvi ani tanchê bhitôr asa titlem-i Babiloniê pasot anondan zoikarache nare sôddtolim, kiteak ticho nas korunk vetat te Ut'torê thaun ietole. Uloita to Sorvespor!
49. Babilonien akhea sonvsarant khub khub zannank jivexim marun uddoilim, toxench atam Babilonia apunnuch poddtoli, kiteak itlea Israelachea putam-dhuvancho tinnem jiv kaddlo.
50. Tichê torvarichea ghansantlim vattavoleant tim tumi sogllim, pollun vochat, hanga anink ravum nakat! Tea poixilea desant-thaun Sorvesporacho ugddas korat, Jerusaleak tumchea monant haddat.
51. Nindechi khobor amchea kanar poddona fuddem amkam loz bhògli; Sorvesporachea Mondirachea povitr zageamnim porkim mon'xam riglim mhonn lojen amchim tonddam dhampchim poddlim.
52. Polleiat, Hanv tichea murtincho churo kortolom ani ghaiall zal'lim sogllim xekanxek desant pinrgotolim, osle dis ietat. Uloita to Sorvespor!
53. Zorui Babilonia ontralla porian voir sorot vô aplem unch kott novean bandun kaddit, torui Mhojea hukuman nas korpi ticher poddtole. Uloita to Sorvespor!
54. Babiloniê thaun boball ieta, Kaldeikaranchea desant-thaun vhôdd desvattecho avaz aikum ieta!
55. Kiteak atam khorench Sorvespor Babiloniek padd ghalta, ticho vhôdd kolkôl bond korta. Tichea lharancho avaz mha-sagorachea gorozam sarko aslo, tichê bhitôr talleancho goddgôdd gaztalo.
56. Punn atam nisontton korpi Babiloniecher dhanvun ieta, tichea soinikank koidi korun vhorta, tanche dhonu môddun ghalta. Khorench Sorvespor mhollear sudd-ghevpi Dev, To favo ti khast lainastana kednanch ravona.
57. Tichea sordarank ani tichea budhvontank, tichea senapotink, tichea odhikariank ani tichea zhuzariank Hanv soro ghaltolom; sorvkallak te nhidunuch urtole, nhidentle anink kednanch utthchenant. Uloita to Raza! Tachem Nanv Sorvsoktivont Sorvespor!
58. Sorvsoktivont Sorvespor oxem mhonntta: Dusman Xrêxtt Babiloniechim kottam môddun uddoitole, tichea unch darvontteank uzo ghaltole. Oxem porzancho vavr nirfôll zatolo, ani thokôs gheun kel'lo raxttrancho vavr ujean lason dunvôr zatolo.
59. Judacho raza Zedekiah, tachê razvôttkechea chovthea vorsa, Babiloniek vochunk bhair sorlo; tedna tannem Seraiak, Neriachea putak, Maseiachea natuak, apnna borabôr vhelo. Ho Seraia razmondiracho mukhêl karbhari aslo. Haka Jeremias provadian adnia dili ti hanga asa.
60. Babiloniecher ieunchem aslem tem sogllem noxtt Jeremiasan êkê kovller boroun dovorlolem, mhonngê Babiloniê virudh tannem hanga boroun dovorlolim sogllim bhakitam.
61. Jeremiasan Seraiak tedna mhollem: Tum Babiloniek pavtôch, him sogllim utram vhoddlean vachun dakhoinastana ravum naka.
62. Magir oxem mhonn: Sorvespora, hê svatecho bhôsm korto-loi ani oxem hanga konnuch anink ravchona zaum mon'xam zaun zonavoram ani ho ganv sodankal osadd poddlolo astolo, oxi Tunvem bhas dil'lii.
63. Magir, hi kovlli vachun zatôch, tika êk fatôr band ani Eufrat nodi modem vochun ti khorik poddta toxi thoim uddoi. Tea vellar him utram mhonn:
64. Oxem Babilonia buddtoli ani, jem noxtt Hanv ticher dhaddtolom, tantli ti anink voir sorchich na! Hanga Jeremiasachim utram somptat.
