1. Sorvesporachem utor Jeremiasak oxem pavlem:
2. Hea korarache kaide aikun ghe, Judachea lokak ani Jerusaleant ravtoleank te kolloi.
3. Tankam oxem sang: "Sorvespor, Israelacho Dev, oxem sangta: Hea Korarachea kaideank kan dinant tancher xirap poddum!
4. Tumchea purvozank Ejiptantlim, tea zolltea agtteantlim, Hanvem bhair kaddlim tedna, tanchê lagim Hanvem ho korar kel'lo. Hanvem tankam oxem sanglolem: Mhojea talleak kan diat, soglleô Mhojeô adnia pallat: tedna tumi zatoleat Mhoji porza ani Hanv zatolom tumcho Dev.
5. Dud ani mhonv vhanvtat toslo dês tumi atam ravtat toch dês tankam ditolom mhonn soput gheun Hanvem tumchea purvozank bhas dil'li; hea korarache kaide tumi pallxat zalear, hea Mhojea soputak Hanv pallo diunk pavtolom." ' Hanvem oso zobab dilo: 'Oxem zaum, Sorvespora!'
6. Tedna Sorvesporan mhaka sanglem: 'Judachea sogllea nogramnim ani Jerusaleachea sogllea rosteancher vochun, "he soglle kaide porgôtt kôr.
7. Kiteak tumchea purvozank Hanvem Ejiptantlim bhair kaddlim tedna, soput gheun Hanvem tankam xiddkail'lim, ani aiz porian tosoch tankam Hanv xiddkaitailam, oxem mhonnun: Mhojea talleak kan diat.
8. Punn tãnnim kan diunk na, Mhaka tãnnim chit diunkuch na. Portench zalear, apleach vadeachim tim zalim ani apleanch vaitt vondovnnianchi vatt tãnnim dhôrli. Korar samballat mhonn Hanvem tankam hukum ghal'lo ani to tãnnim samballunk na, dekhun teach korarant sthaploleô khasti Hanvem tankam laileô. " '
9. Sorvesporan mhaka sanglem: 'Judacho lôk ani Jerusaleachim nagrikam Mhojer add guddmêll kortat mhonn sarkench gomta.
10. Tanchim purvozam Mhojea utrank kan diunk kobul zalim nant, toxench him atam teach tanchea purvozanchea patkank portun gelim; him-i dusrea devank bhôztat ani tanchi seva kortat. Israelachea Ghorannean toxench Judachea Ghorannean Hanvem tanchea purvozam kodde kel'lo korar môddla.
11. Dekhun Sorvespor oxem sangta: 'Hanv atam tancher noxtt dhaddunk vetam, tantlim tim suttchinch nant; tim apnnank pav mhonn Mhaka ulo martolim, punn Hanv tanchem aikuncho na.
12. Tedna Judachim nogram ani Jerusaleachim nagrikam zanchea manak apnnem dhump laslolo tea devank ulo marunk vetolim; punn hem noxtt tancher ieta tea vellar tea devanchean tanchê pasot kãich korunk zaunchem na!
13. "Juda, jitlim tuka nogram title tuka dèv asat! Jitle Jerusaleak roste, titleô tê Ollxikek, tea tumchea Baalak, dhump laspacheô vedi tumi ubarleat.
14. "Tum, [Jeremias,] hea loka pasot Mhaka vinoum naka, tanchê khatir tankam pav mhonn magun Mhaka prarthum naka! Kiteak aplea vignak lagun apnnank pav mhonn Mhaka ulo marunk tim ietat tedna, Hanv tanchem aikuncho na."
15. [Sorvespor oxem sangta:] 'Mhoji mogachi porza Mhojea Ghorant kitem mhonn korunk ieta? Apleô noxtteô ievzonnô tãnnim xarthi pavoileat. Angovnnô keleô mhonn ani mon'zatinchim bolidanam Mhaka somorpilim mhonn, apnnam velem noxtt addaunk zata mhonn tankam dista kitem? Hench chintun tumi itli khuxali kortat kai?
16. "Bori matloli dak-vêl, ut'tom borea follamnim bhòrloli": oxem Sorvesporan tuka nanv dil'lem. Punn atam goddgoddea sarkea gorozan Tannem tika uzo lailo, ani tiche fantte soglle lasun mòddle!'
17. Ani tuka roil'lea Sorvsoktivont Sorvesporan tujer orixtt dhaddunk nirnnoi ghetla, kiteak Israelachea Ghorannean ani Judachea Ghorannean vaitt kelam: Baalak dhump lasun tãnnim Mhaka tiddoila.
18. Sorvesporan mhaka kollit kelem dekhun mhaka kollon ailem! Tunvem mhaka tanchi moslôt ugddapi kelii.
19. Marunk vhortat toslea, kosloch dubhav naslolea menddrea bhaxen hanv aslom; mhojer add mosloti kortat mhonn mhaka khoboruch nasli. [Te oxem mhonnttale:] 'Ozun ghott astananch zhadd katrun uddoum-ia, jivea mon'xanchea desantlo taka umttun kaddum-ia; oxem tachea nanvacho porian ugddas anink aschoch na!'
20. [Tedna hanvem oxem prarthonkelem:] 'Sorvsoktivont Sorvespora,Tum nitivont Mon'subidar! Tum mon'xanchim monam ani kallzam topasun kaddtai! Tôr oslea mon'xancho koso Tum sudd ghetai, tem mhaka polleum-di, kiteak mhozo jiv hanvem Tujea hatant sôddla!'
21. Anathotacho lôk mhozo jiv kaddlea xivai mhaka sôddpak na; tim mhaka sangtat: 'Sorvesporachea nanvan bhakit korum naka, na tôr ami tuzo jiv kaddtoleanv!' Tôr hea loka add
22. Sorvespor oxem sangta: 'Tankam Hanv xikxa diuncho zalam. Tanche tornnatte zhuzant morun poddtole, tancheô put-dhuvô dukollak sampddun mortoleô.
23. Anathotachea lokacher noxtt dhaddunk Hanvem ek voros tharailam, ani tem voros pavta tedna tanchê bhitorlo eklo porian vanchcho na.'
