1. (a)Zedekia razan Pashurak, Malkiachea putak, Jefaniah iadnika borabôr Jeremiasak oxem sangunk dhaddlo:
2. Upkar korun amchê khatir Sorvespora lagim uloi, kiteak Nebukadnezzar, Babiloniecho raza, amcher zhuz korunk aila. Ghoddiê Sorvespor, Tannem adim kelam toxem, amchê khatir ani ek Aplem ojap kortolo ani taka portun vochunk boll kortolo.
3. (b)Tedna Jeremiasak Sorvesporachem utor pavlem.'
4. Jeremiasan tankam sanglem: 'Zedekiak ho zobab gheun vochat: "Sorvespor, Israelacho Dev oxem sangta: Babiloniechea razan ani Kaldeikaranchê foujen tumkam atam veddho ghal'lo asa, ani tum tujim zhuzachim hatiaram gheun tancher zhuz kortai; punn him sogllim tujim hatiaram Xarachea durgam bhailim portun haddun Xara modench Hanv tanchi ras kortolom.
5. Ani Hanv Mhozo hat ani bollixtt bavllo vistartolom ani zolltea ragan ani vhodda krodhan Hanvuch tujer loddai manddtolom.
6. Hea Xarant ravtolea soglleank, mon'xank toxem mon'zatink, Hanv borich khast laitolom: bhoikôr zorimorik sampddun tim sogllim mortolim.
7. Hea uprant- uloita to Sorvespor!- Zedekiak, Judachea razak, tachea subedarank, lokak ani hea Xarant ravtoleank, zorimorintlim, torvarintlim, bhukentlim moronastana vanchun urlim tankam, Hanv Nebukadnezzar Babiloniechea razachea tabeant, tanchea dusmananchea tabeant, ani tancho jiv kaddlea xivai tankam sôddche nant tanchea tabeant ghaltolom; to doia dhôrinastana, nixtturaien, churchure korinastana tankam torvarin jivexim martolo."
8. Tea bhair lokak tunvem oxem sangunk zai: "Sorvespor oxem mhonntta: Polleiat, tumchea fuddeant jivitachi vatt ani mornnachi vatt dovortam: tumich vinchun kaddat.
9. Hea Xarant konnui ravtit tôr, tim torvarin, bhuken ani zorimorin mortolim; punn jim konn Xar sôddun vochtit ani Xarak veddho ghaltolea Kaldeikaranchê adhin apnnankuch kortit, tim jivim urtolim; aplem jivit tori samballtolim.
10. Kiteak mhollear hea Xarak sukh-vikas nhoi punn tacher orixtt dhaddunk Hanvem nirnnoi ghetla. Tem Xar Babiloniechea razachê svadhin poddtolem, ani to tacho sarko bhosm korun uddoitolo. Uloita to Sorvespor!" '
11. Judachea raiall Ghoranneak.
12. Davidachea Ghorannea, Sorvesporachea utrak kan di! Sorvespor oxem mhonntta: Dôr sokallim neainitin mon'subi korat, onit bhôgtoleank zulum' kortoleanchea hatantlim sôddat; na zalear, tumchea khottea kortubankl lagun, Mhozo krôdh ujea vori perovtolo, to zolltolo ani konnacheanuch to palounk zauncho na.
13. Tum, [Jerusalea,] sopatt zomnir tokli voir kaddtolea khoddpa vori, falkea voir unch bosleai. Tum mhonnttai: Konn mhonn amcher akromonn korunk fuddem sortolo? Tôr tuka Hanvuch khast laitolom. Uloita to Sorvespor! Ani tumi mhonnttat: Amchea kottam-durgam bhitôr rigunk konnak chhati asot?
14. Tôr tumchea kortubank favo tosli xikxa Hanvuch tumkam laitolom, ani tumchê bhonvtonnchea ranank uzo laitolom ani to uzo sogllench lasun uddoitolo. Uloita to Sorvespor!'
