1. Sorvesporachem utor mhaka oxem pavlem:
2. Voch ani Jerusaleachea kanar vhoddlean oxem sadoi: 'Sorvespor oxem mhonntta: "Tujea tornneaponnar tunvem dakhoil'lea tujea visvaxi mogacho mhaka ugddas ieta; amchea lognachea poilea disamnim kitlo tunvem Mhozo môg keloi, hacho Mhaka ugddas ieta. Oronneantlean, padd aslolê zomnintlean tum Mhojê pattlean ietalii, hem-i Mhojea monant ieta.
3. Israel-porza Sorvesporak sonvskarloli asli: Tachea pikachem prothom' foll ti; Taka girastat titlim-i guneanvkar zalim, hea follachem khaun dhadoxi zaleant titleank-ui guneanv asa, ani tea soglleancher noxtt ietolem. Uloita to Sorvespor." '
4. Jakobachea Ghorannea, ani Israelachea Ghoranneachea sogllea kullamnô, Sorvesporachem utor aikat.
5. Sorvespor oxem mhonntta: 'Mhojê thaun koddsorun vochunk koslo mhonn guneanv Mhozo tumchea purvozank mell'llo tôr? Polkeponna pattlean tim gelim ani polkinch tim urlim.
6. "Ejiptantlim amkam bhair kaddun haddlim to Sorvespor khoim asa atam? Tannem amkam oronneantlean, sukea ani khoddpi ganvantlean vhelim. dukollachea ani mornnachea ganvantlean, konnuch ie-vochona ani konnuch ravona toslea ganvantlean Tannem amkam vhelim"- oxem tãnnim mhonnunk na zait?
7. Pikall desant tachim follam khaunk ani tacheô boreô-boreô vostu bhôgunk Hanvem tuka haddli. Punn thoim bhitôr sorona fuddem tunvem Mhozo dês bhoxttailoi ani Mhojem daiz êk kanttallo korun soddleim.
8. "Sorvespor khoim asa?" oxem iadnikamnim kodinch vicharunk na, Somurtichea xastriamnim Mhaka vollkhunk na. Gonvlli-i Mhojer kolpole. Provadi Baalachea nanvan sondêx diunk lagle ani mol naslolea vostum pattlean gele.
9. Hea pasot Hanv tumchê kodde novean vad kortolom, tumchea bhurgeam kodde vad choloitolom. Uloita to Sorvespor.
10. Kit'tim' zunveachea kinariancher vochun polleiat, Kedarak konnak tori pattoiat ani zotnaien chovkoxi korat. Oslem kitem adim ghòddlam zait?
11. Khoinchea tori raxttran aplea devank sôddun dusrea devank dhôrleat zait? khorem mhollear te dèvuch nhoi! Punn Mhojê porjen aplea Mhoimechea Devak sôddun, mol-nasloli vôst venchun kaddlea!
12. Hem polleun, tum mollba, thottakun ojap za; thortorun kamp, akantun jiv sôdd! Uloita toSorvespor.
13. Mhojê porjen don vaittam kelim: Hanv jivea udkachi Zhôr zaun-ui, tãnnim Mhaka sôddun dilo; tãnnim bhuimaram marlim, futtkim ani udok dhôrunk upkaronant toslim bhuimaram.'
14. Kitem mhonnchem? Israel gulam' kai? vô gulamponnant to zolmola kai? To xikarek koso sampoddlo tôr?
15. Xinvamnim tacher gorôz ghaleat, vhoddlean gorôz ghaleat; tacho dês tãnnim padd ghala; tachea nogranchem tãnnim ghorttann kelam; thoim atam konn ravona.
16. Tea bhair; Memfis ani Tapanes hea ganvantlea lokan tumche khodd'dde tasun uddoile!
17. Sorvespora tujea Devan tuka nitt vatten choloun haddlea astam, Taka sôddun, hem sogllem noxtt tunvem Tujer haddunk naim?
18. Atam Ejiptak portun vochun koslo faido tuka? Nil Nodichem udok pieunk? Vô Assiriek vochun koslo mhonn tuka faido? Eufrates Nodichem udok pieunk?
19. Tujich vikottai tuka xikxa ditoli, tujem ovisvaxiponn tuka dhomki ditolem. Atam chintun polle: Sorvespora tujea Devak sôddun divop ani Mhoji bhokti tujea kallzantli bhair ghalop mhollear kedem vhoddlem vaitt ani kitlem mhonn koddu! Uloita to Sorvespor, Sorv soktivont Dev!'
20. Magam san tunvem tujem zum môddleim ani tuje bandpas tôddlei; ani tunvem mholleim: "Hanv seva korcho na!" Hôi, khoinchea-i unch dongrar ani khoinchea-i hirvea zhadda ponda êk vesva zal'lê porim tum nhidloi.
21. Hanvem tuka êk vinchun kaddloli, borê zatichi, tambddi dak-vêl koxi roil'li; koxi mhonn tum bigòddlolê zatichi ran'vôtt dak-vêl zaunk pavlii?
22. Khar ani zaito sabu lavun-ui tum nhaxi zalear, tujea guneanvachem khot Mhojê mukhar ozun astolem. Uloita to Sorvespor Dev.
23. "Hanv bhoxttonk na, Baalam pattlean dhavonk na!" oxem mhonnonk tuka kalliz koxem zait? Gollantlê tujê vagnnukecher nodor mar, tunvem kitem kelam tem zanno za.
24. Oronneant gholl'llolem, kamnen varem hungpi ranvôtt gaddum ;tem tavar ietôch konn taka domavun dhôrit? Tachea tea mhoineant, taka sôddche tras nastana, dadlea gaddvank tem aitem melltolem.
25. Polle! Tujeô vhannô bextteô zhoroun zhoroum naka, tuzo tallo tanen suko zaunk dium naka! Punn tunvem mholleim: "Na! Tujem aikun faido na. Hanv porkea devanchea mogant poddleam, ani tanchea pattlean hanv vetolinch!"
26. Apnnak dhôrlea uprant chorak loz dista, toxench Israelachea Ghoranneak loz distoli; tankam soglleank, tanchea razank ani kunvrank, tanchea iadnikank ani provadiank.
27. Him sogllim eka lankddachea kuddkeak mhonnttat: "Tum mhozo bapui!" ani eka fatrak: "Tunvem mhaka zolm dilai!" Tãnnim Mhaka patt vôll'lea, aplem tondd Mhaka dakhounk na. Tori sonkoxttanchea somoiar tim mhonnttat: "Utth ani amchem taronn kôr!"
28. Tumkanch tumi kel'le te dèv khoim asat atam? Tumchea sonkoxttanchea somoiar te dèv utthum ani tumkam pavum! Juda, jitlim tuka nogram asat title tuka dèv!
29. Mhojê kodde kiteak mhonn vad kortat tumi? Tumi sogllim Mhojer kolpoleant. Uloita to Sorvespor!
30. Tujea bhurgeank Hanvem khast laili ti funkott geli, kiteak tim nitt margan chol'lim nant; girasunk ietolea xinva bhaxen tumcheach torvarimnim tumchea provadiank girasle.
31. Atanchê pinddkechea bhurgeamnô, Sorvesporachem utor aikat: Israelak Hanv ek oronnem zalam zait? vô êk kallokhacho dês zalam kai? "Amkam zai toxem ami bhonvtanv,Tujê-xim hea fuddem anink ami ieunchim nanv!" oxem ho ji porza kiteak mhonntta zait?
32. Ek ankvar cheddum aplem bhangar ani xringar visrot? Êk hokol apli nhesônn visrot? Tori hixôb korunk zaina title dis Mhoji porza Mhaka visorli.'
33. Tujea mogiank sôdunk vochunk kitli mhonn tum huxar! Itlench nhoi, vaitt sobhavachea bailank porian tujeô noxtteô vattô tunvem xikoileai.
34. Niropradhi goribanchea rogtan tujim vostram koxim khotovleant polle; tujem ghor fôddun bhitôr sortana tunvem kãi tankam dhôrlenaim. Tori itlem kel'lem astam,
35. tum mhonnttai: "hanv niropradhi. Tacho rag mhojê thaun pois vochum." Polle, "hanvem pap korunkuch na!" oxem mhonnttai dekhun, Hanv tujer khastichem formonn martolom.
36. Tuji vatt kitlê sompeponnim tum bodôltai! Zoxem Assirien tuka lojek ghali, toxem Ejipt-ui tuka lojek ghaltolo.
37. Tujeach mathear hat dovrun to-i ganv tunvem sôddcho poddtolo, kiteak tum patietai tankam Sorvesporan nakarleant ani tanchea adaran tuka kãi borem zaunk pavchem na.'
