1. Teach vorsa, Zedekiah Judachea razachê razvôttkechê survatek, chovthea vorsachea panchvea mhoineant, Hanania Azurcho put, Gibeon nograntlo provadi, Sorvesporachea Mondirant iadnikam ani sogllê porjê hujir Jeremiasa kodde oso uloilo:
2. Sorvsoktivont Sorvespor, Israelacho Dev, oxem sangta: "Babiloniechea razachem zum' Hanvem môddlam.
3. Sarkim don vorsam bhòrtat mhollear, Nebukadnezzaran, Babiloniechea razan, hea zageavelim Babiloniek vhel'lim tim Sorvesporachea Mondirachim aidonam Hanv portun haddtolom.
4. Ani tosoch Judachea raza Jekoniak, Jehoiakimachea putak, ani Babiloniek Juda thaun nirvaxi kel'lea soglleank Hanv portun haddtolom, kiteak Babiloniechea razachem zum' Hanv môddunk vetam. Uloita to Sorvespor. " '
5. Sorvesporachea Mondirant iadnikam ani sogllê porjê hujir Jeremias provadian Hanania provadiak zobab kelo.
6. Jeremias provadian mhollem: Oxench zaum! Sorvespor oxench korum! Tunvem bhakit korun sanglãi titlem-i To sakar korum ani Sorvesporachea Mondirachim aidonam ani sogllea nirvaxiank Babiloniê thaun hea zagear portun haddum!
7. Toripunn tujea ani sogllê porjechea kanar atam sadounk vetam tem utor aik:
8. Magam thaun tujê ani mhojê adim provadi ieun gele; tãnnim sobar raxttrank ani vhodd-vhodd rajeank zhuz, dukôll ani pidda-xidda ietolim mhonn bhakit kel'lem;
9. punn zo provadi xanti ietoli mhonn bhakit korta, tachem utor sakar zait tedna mat, Sorvesporan taka khorench pattoila mhonn vollkhun gheum-ieta.
10. Tedna Hanania provadian Jeremiasachê manir aslem tem zunvachem addbarem kaddlem ani tache kuddke kele.
11. Uprant sogllê porjê hujir Hananian mhollem: 'Sorvespor oxem sangta: "Sarkim don vorsam bhòrtanch hêch bhaxen Nebukadnezzar Babiloniechea razachem zum' Hanv môddtolom, ani sogllea raxttranchê mani velem Hanv tem kaddun uddoitolom." ' Uprant Jeremias provadi koddsorlo.
12. Hanania provadian Jeremiasachêm ani voilem zunvachem addbarem kaddun uddoilea uprant hem Sorvesporachem utor Jeremiasak pavlem:
13. Hanania-xim voch ani taka oxem sang: "Sorvespor oxem sangta: Tunvem lankddachim zunvachim addbarim moddleãi; tanchê svater Hanv atam lokhonddachim zunvachim addbarim kortolom!
14. Kiteak Sorvsoktivont Sorvespor, Israelacho Dev, oxem sangta: Nebukadnezzar Babiloniechea razachim gulamam korunk hea sogllea raxttranchea manincher Hanv atam lokhonddachem zunvachem addbarem ghaltam. (Tim tanchim gulamam zatolim; Hanvem ran'vott mon'zati porian tachê chakrek taka dileat.) " '
15. Jeremias provadian Hanania provadiak sanglem: 'Hanania, chit diun aik: Sorvesporan tuka pattounk na; tuka lagun hi porza lobaddiecher patieun asa.
16. Mhonnttôch Sorvespor oxem mhonnta: "He prithvêvelo Hanv tuka bhair dhaddunk vetam: heach vorsa tum mortoloi (kiteak tunvem Sorvesporacher uprasunk lokak xikoileim.)" '
17. Teach vorsa, satvea mhoineant, Hanania provadi melo.
