1. Zedekiah Judachea razachê razvôttkechea nnovea vorsa, nnovea mhoineant, Babiloniecho Raza Nebukadnezaar Jerusaleacher akromonn korunk apli soglli fouz gheun ailo ani tãnnim Xarak veddho ghalo.
2. Zedekiachê razvôttkechea ikravea vorsa, chovthea mhoineant, mhoineachê nnov tarker, xarachea kottak tãnnim ek khavtem ghalem.
3. Babiloniechea razachea sogllea senapotimnim xarant provês kelo ani modlea darvonttea-xim ieun te bosle: te mhollear Nergal Sharezer, Samgar-Nebo, mukhel izddo Sar-Shekim, anink eklo Nergal-Sharezer Rab-Mag ani Babiloniechea razache her soglle odhikari.
4. Tankam polleun, Judacho raza Zedekiah ani soglle tache zhuzari ratchea kallokhacho palôv gheun razachê bagentlean, don durgam modlea darvontteantlean, pollun gele; tãnnim Jordanachea falkeachi vatt dhôrli.
5. Punn Kaldeikaranchi fouz tanchê pattlean geli, ani Jerikechea mollar tinnem Zedekiachi patt dhôrli. Tãnnim taka Hamat prantantlea Ribla nogrant Nebukadnezzar Babiloniechea raza-xim dhôrun vhelo; hanga hannem Zedekiacher formonn marlem.
6. Ribla ganvant Babiloniechea razan, Zedekiachea dolleam mukhar tachea putank jivexim marle; têch bhaxen Babiloniechea razan Judachea sogllea mukheliank jivexim marun uddoile.
7. Magir tannem Zedekiache dolle konchoun kaddle ani, pitullcheô beddiô ghalun, taka Babiloniek vhelo.
8. Kaldeikaramnim raznivasak ani lokachea khasgi ghorank uzo ghalo ani Jerusaleachim kottam môddun uddoilim.
9. Magir Nebuzaradanan, rakhonndaranchea sordaran, Xarant urlolea lokak, tachê vatten pollun gel'leank ani heram-i urloleank Babiloniek nirvaslim.
10. Punn Nebuzaradanan, rakhonndaranchea sordaran, kãinaslolea thoddea gorib-lachar mon'xank Judachea desant dovorlim ani dakam-molle ani xetam kamais korunk tankam dilim.
11. Jeremiasa vixim Nebukadnezzaran, Babiloniechea razan, Nebuzaradanak, rakhonndaranchea sordarak, oso hukum dil'lo:
12. Taka vhor, tacho boro poramôs kôr, taka kãi vaitt korum naka, punn to apunnuch magit titlem-i tachê pasot kôr.'
13. Tannem hem kam Nebuzaradan, rakhonndarancho sordar, Nebushazban mukhêl izddo, Nergal-Sharezer, mukhêl sordar ani Babiloniechea razache vhodd vhodd monis, hea soglleanchea hatant ghalem.
14. Hãnnim Jeremiasak Rakhonndaranchea Angnnantlo kaddun vhorunk monis dhaddle ani taka surokxitponnim ghara pavounk Ahikamachea puta, Shafanachea natua, Gedaliachê adhin kelo. Oso to aplea loka modem urlo.
15. Rakhonndarachea Angnnant Jeremiasak koidi kel'lo astam, hem Sorvesporachem utor taka pavlem:
16. Voch ani Ebed-Melek Ethiopiekarak oxem sang: "Sorvsoktivont Sorvespor,Israelacho Dev, oxem mhonnta: Polle, hea Xarak sukh-bhag nhoi punn nisontton haddtolom mhonn Hanvem dhomkavnniô dil'leô: tim utram atam Hanv pallunk vetam. Tea disa tujê nodre mukhar tim utram ghoddon ietolim.
17. Tea disa Hanv tuka soddoitolom -uloita to Sorvespor!- ani tuka bhirant dista tanchea hatant Hanv tuka ghalcho na.
18. Hôi, Hanv tuka khorench soddoitolom: Torvarin tum morchonaim; tunvem Mhojer visvas dovorloi dekhun, tuzo jiv rakhunk pavtoloi. Uloita to Sorvespor! " '
