1. Benjaminachea mon'xamnô, Jerusaleantlim pollun vochat! Tekoant tuturi vazoiat! Beth-ha-Kerema voir khunna koxi uzo korat! Kiteak Ut'torê koddsun orixtt denvun ieta, khorench mottem noxtt!
2. Sundôr ani nazuk ti zaun-ui, Sionachê dhuvechem Hanv nisontton kortolom!'
3. Sordar ap-apli fouz gheun ticher add fuddem sortat. Tichê sobhonvtim tãnnim aple tombu tannleat, dôr-eklo ap-aplo zago sôdun toiari korta.
4. Tichê virudh povitr zhuz korunk toiar zaiat! Utthat! Don'param ami akromonn korum-ia! Amchem kotta! Dis sompot ieta, tinsanechi savlli vaddot veta.
5. Utthat! Ratchea vellar ami akromonn korum-ia! Tanchea razvaddeancho nas korum-ia!
6. Kiteak Sorvsoktivont Sorvespor oxem mhonntta: 'Zhaddam katrun uddoiat, Jerusalea bhonvtim adde bandat: hea xaracher xikxechi xirôntt poddunk veta, kiteak tichê bhitôr fokot zulum raj cholta.
7. Êk baim aplem udok tajem dovorta, toxem ti apli vikottai taji dovorta. Tachê bhitôr fokot zulum ani nisontton gaztat; thoim Mhojea dolleam mukhar sodanch ghave ani mar-far.
8. Jerusalea, hê xiddkavnnek chit di; na zalear, Hanv tujê sorxilo koddsorun vetolom, ani tum ek oronnem zai-xem kortolom, êko sadd poddlolo ganv.'
9. Sorvsoktivont Sorvespor oxem mhonntta: 'Dak-velicheô urloleô dakô sôdun kaddtat toxem, Israelachem urlam titlem-i sôdun punzaiat. Dakô kaddpi korta toxem, novean tuzo hat khandiancher bhonvddai!'
10. Mhaka tãnnim aikunchê khatir, konna lagim mhonn uloum hanv ani konnak mhonn xiddkavnni dium? Polle, tanchea kananchi sunôt zaunk na, tankam aikunk iena. Polle, Sorvesporachem utor mhollear tankam kenddnniancho mhal.
11. Hea khatir hanv Sorvesporachea krodhan bhòrlam ani to damun dovrun hanv thoklam, ani to mhojean sanvron dovrunk zaina. Tôr rosteam veleam bhurgeancher toxench tornnatteanchea zomeancher to ôt, kiteak ghovbailank toxench zannteam-mhatareank koidi korun vhortole.
12. Tanchim ghoram-daram, toxench xetam-mollam ani tancheô bailô dusreanchea tabeant poddtolim. Hôi, hea ganvant ravtoleancher Hanv Mhozo hat patllaitolom uloita to Sorvespor.
13. Kiteak sogllim, lhanam toxim vhoddam, apleach faideak vavurtat; provadi ani iadnik porian, fottingponnacho dhondo kortat.
14. Xanti nastananch 'Xanti! Xanti!' mhonnun khoro husko nastana Mhoje porjeche ghai bandtat.
15. Aplea khottea kortubanchi tankam loz disunk zai asli. Punn na! Tankam kodinch loz disli na; tãnnim loz bhazun khelea. Hea pasot, zoxim dusrim morun poddtat, toxinch him-i poddtolim. Tankam khast lavunk ietolim tedna, tankam anv khala xevttun uddoitolom. Uloita to Sorvespor!'
16. Sorvespor oxem mhonntta: 'Rosteanchea nakeancher ubim ravat ani polleiat: adleô vattô konn teô vicharun kaddat; khoinchi vatt bori asli? Tê vatten cholat ani oxem korun tumkam somadhan melltolem. Punn tãnnim mhollem: "Ami tê vatten cholchim nanv."
17. Tumchê khatir pahredar dovrun Hanvem mhollem: Tuturecho avaz aikat. Punn tãnnim portipall kelo: "Ami aikunchinch nanv."
18. Hea pasot, raxttramnô, aikat; zomlolea loka, tanchem kitem zatolem tem polleiat.
19. Aik prithvê! Polle, hea lokacher Hanv orixtt dhaddtolom: tanchea kolponancho porinam ho, kiteak tãnnim Mhojem utor aikolem na, Mhojê Somurtik tãnnim patt vôll'li.
20. Sheba thaun dhump ani poixilea desa thaun pormollit sambar Mhojê-xim haddun koslo faido? Tumche hom' Mhaka manovnant, tumcheô boliô Mhaka avoddnant.
21. Hea pasot Sorvespor oxem mhonntta: 'Hi porza adllun poddchê khatir tichê vatter Hanv addkholli ghaltolom; bapui ani put vangdda adllun poddtole, xezari ani ixtt morun vetole.'
22. Sorvespor oxem mhonntta: 'Polle,Ut'torê thaun êk porza ieta, prithvechea ximam thaun ek vorixtt raxttr utthun ieta;
23. bann ani bhale gheun te ietat; to lôk krur, tankam doia-maia na; doria bhaxen te gôroz ghaltat, ghoddeancher bosun te ietat; êkuch zhuzari zal'lê porim, Sionachê dhuvê, te tujer loddai korunk ietat.'
24. Tanchi khobor aikun amche hat gollon gele, amcher akant aila, ani ballont ostoriê porim ami vollvolle bhôgtanv.
25. Zhuzachea moidanar vochum nakat, rosteancher bhonvum nakat, kiteak dusmanachi torvar thoim asa, sogllê kodden bhirant poddlea.
26. Mhojê porjechê dhuvê, sakafottem ghalun bhonv, gobrant loll, ekleach putak roddtat toxi rodd, koddu dukam gholloun vilap kôr. Kiteak amchê voir êk nas korpi ovchit ietolo.
27. Mhojê porjechi vagnnuk vollkhun gheunk ani ti kosak lavunk Hanvem tuka Mhojê porjecho porikxôk nemla.
28. Tim sogllim attponaslolim fitur mon'xam, sogllim boglanttam ghalit bhonvtat, sogllim pitullê ani lokhondda sarkim nibor, sogllinch bhroxttachar korpi.
29. Bhato funkun funkta, xixem ujeant zollon veta. Koddhoita tacho vavr nirfôll, kiteak mhêll kuxin soron sorona.
30. "Upkarona toslem rupem!" oxem tankam nanv poddlam, kiteak Sorvesporan tankam sôddun dileant!'
