1. To kall pavtôch -uloita to Sorvespor- Judachea razanchim haddam, tanchea kunvranchim haddam, iadnikanchim haddam, provadianchim haddam ani Jerusaleant ravtoleanchim haddam, tanchea somadhintlim bhair kaddtolim.
2. Ani him haddam suria, chondrima ani mollbachea sogllea noketram mukhar patllaun dovortolim kiteak tancho tãnnim môg kelo, tanchi seva keli ani tanchê pattlean vochun tanchi budh ghetli ani tanchi puza keli. Ani him haddam zoma korun urchim nant, punn sarem zal'lê bhaxen zomnir patllailolim urtolim.
3. Jea-jea ganvamnim Hanvem hea lokak dhanvddailo, tea-tea ganvamnim hê khottê pinddkentlim jivim urleant tankam jivitachê svater moronn odik borem distolem. Uloita to Sorvespor!
4. Sorvespor oxem mhonntta: "Tankam sang: konn-ui bhuim poddot zalear, to novean utthunk xokona? Konn-ui vatt chukot zalear, tachean portun ieunk zaina?
5. Kiteak mhonn ho lôk ovisvaxi zaunuch ravta? Kiteak mhonn Jerusalem aplem ovisvaxiponn sôddich na? Tim fosovnnek chikttun ravleant; tim anink portun ieunk kobul nant.
6. Hanvem tankam chit diun aikolim, punn tim sot tem uloinant. Konnuch aplê vikottaiechi khônt dhôrina, voilean oxem sangtat: 'Kitem vaitt kelam hanvem? Zoso ghoddo loddaient dhanv gheta, toxim tim sogllim ap-apli vatt dhôrtat.
7. Mollba veli bollar aplo iukt vêll zanna, toxench kovddo, xeruk ani kensar ap-aplea desant oronnacho vêll samballtat. Punn Mhoji porza Sorvesporache kaide vollkhona!" '
8. Ami zannar ani Sorvesporachi Somurt amchê lagim asa', oxem tumchean koxem mhonnum-iet? Polleiat, aplê fottkirê likhnnen lekhokamnim koxi mhonn ti khotti kelea!
9. Ponddit lojek poddleat, akantleat ani sampoddleat. Polleiat, Sorvesporachea utrak tãnnim patt kelea. Tanchê zannvaiek koslem mol atam?'
10. Hea pasot tanchea potinink Hanv dusrea dadleanchea hatant ghaltolom; tanchim xetam novea dhoniank ditolom; kiteak sogllim, lhanam toxim vhoddam, apleach faideak vavurtat; provadi ani iadnik porian soglle fottingponnacho dhondo kortat.
11. Xanti nastananch 'Xanti! Xanti!' mhonnun khoro husko nastana Mhojê porjeche ghai bandtat.
12. Aplea khottea kortubanchi tankam loz disunk zai asli. Punn na! Tankam kodinch loz disli na; tãnnim loz bhazun khelea. Hea pasot, zoxem dusrim morun poddtat, toxinch him-i poddtolim. Tankam khast lavunk ietolom tedna, tankam anv khala xevttun uddoitolom. Uloita to Sorvespor!'
13. Hanv tancho sarkoch nas kortolom uloita to Sorvespor ! Dak velik anink dakô ascheô nant, anjirachea zhaddak anink anjiram aschim nant, fokot bavlolim suklolim panam. Tankam pãiam tolla mostunk Mhaka êk porza mell'llea.
14. Ani kiteak mhonn ami ozun bosun ravtanv? Zhuzak toiar zaiat! Durgam-kottamnim bandlolea nogramnim bhitôr sorum-ia ani thoinsôr morum-ia, karonn Sorvespora amchea Devan amkam vikarem udok pieunk diun amkam morunk sôddleant, kiteak Sorvesporacher ami pap kelam.
15. Ami xantichi vatt polleun asleanv, punn kãi borem ailem na. Bholaikecho kall ietolo mhonn ravtaleanv, punn ailo fokot akant.
16. Dan pranta thaun tanchea ghoddeanchem furfurnnem aikunk ieta; tanche anddel-ghodde modan kurkurtat tedna ak'khi bhuim kolkolta; ak'kho dês and tantum asa titlem-i, dôr-ek nogor ani tantum ravtat titleank-ui girasunk te ietat.
17. Polleiat, tumchê modem Hanv vikare sorop ani furxim dhaddtolom: tancher montr cholchem na, ani tim tumkam chabtolim. Uloita to Sorvespor!
18. Sangum nozo toslê dukhint hanv buddlolo asam, bhitorlê-bhitôr kalliz mhojem virghun veta.
19. Aik, mhojê porjechê dhuvechi bob sogllea desant pois-pois aikunk ieta: 'Sionant Sorvespor atam ravona kai? Ticho Raza thoinsôr anink na kai?' Kiteak mhonn tãnnim aplea murtimnim ani mol naslolea porkea devamnim Mhaka tiddoilo?
20. Pik somplem, gim' ieun gelo, punn amchem taronn zalem na!'
21. Mhojê porjechê dhuvechea ghaian hanv-ui ghaiall zalam; hanv vilap kortam: bhirantin mhaka veddho ghala.
22. Gileadant molom' anink na kitem? Thoim voiz porian na kitem? Mhojê porjechê dhuvecho ghai kiteak pekon vochona tôr?
