1. Sorvesporachem utor Jeremiasak ailem tem hem:
2. Sorvesporachea Ghorachea darvonttea-xim ubo rav ani ho sondêx porgôtt kôr. Oxem sang:: "Hea darvontteamnim Sorvesporak bhôzunk ietolea Judachea sogllea lokamnô, Sorvesporachea utrak kan diat:
3. Sorv-soktivont Sorvespor, Israelacho Dev, oxem mhonntta: Tumchi chal ani tumchim kortubam nitt korat; ani Hanv tumkam hea zagear ravunk ditolom.
4. Sorvesporachem mondir, Sorvesporachem Mondir, Sorvesporachem Mondir; oslea fottkirea utrancher visvas dovrum nakat.
5. Tumcher vaitt iena zaunk, tumchi chal ani tumchim kortubam sarkinch bôdlat, ekameka thaim neainitin cholat,
6. porkeank, onathank ani vidvank piddapidd dium nakat, hea desant niropradhi rogot varoinakat, dusrea devam pattlean vochum nakat. Oxem korxat zalear,
7. Hanv tumkam hea zagear, magam tumchea purvozank sodankal ravpak Hanvem dil'lea desant, ravunk ditolom.
8. Polleiat, tumkam kiteakuch upkaronant toslea fottkirea utrancher tumi patietat!
9. Êkê vatten, tumi choriô kortat, jivexim martat, pordvar kortat, lottik govai ditat, Baalak dhump lastat, ani tumi vollkhonant tea dusrea devam pattlean vetat;
10. ani, dusrê vatten, Mhojem Nanv aslolea Mondirant ieun ani Mhojê mukhar ubim ravun oxem mhonnttat: Atam amkam suttka mell'lli!
11. Him sogllim khotteponnam korunk mat tumkam suttka mell'lli mum? Mhojem Nanv aslolem hem Mondir tumkam choranchi dhôl kitem? Hanv sogllem polletam mhonn zanno zaiat. Uloita to Sorvespor!
12. Shiloant aslolea Mhojea zagear vochat; thoim purvim eka Mondirak Mhojem Nanv Hanvem dil'lem. Mhojê Israel-porjechea khotteponnak lagun Hanvem taka kitem kelam tem polleiat.
13. Ani atam tumi oslim kortubam kelim dekhun uloita to Sorvespor ani itlea nettan, dis uzvaddtanch suru korun ani thar ghenastana, Hanv tumchê kodde uloit astam tumi Mhojem aikolem na dekhun, ani Hanv tumkam ulo marit astam tumi Mhaka zap dili na dekhun,
14. oxem sangtam: hea Mondirak Mhojem Nanv dil'lem asa ani tacher tumcho visvas asa; tori Hanvem Shiloak kelem toxem hea Mondirak Hanv kortolom; têch porim tumkam-i ani tumchea purvozank dil'lea hea zageak Hanv kortolom.
15. Ani zoxem Efraimachê ak'khê sonstik, tumchea sogllea bhavam-bhoinnink, Hanvem dhanvddailim, toxinch tumkam-i Hanv Mhojê mukhailim dhanvddaitolom."
16. Ani tum hê porjê khatir magnnim korinaka, tanchê khatir Mhaka vinoinaka vô prarthon korinaka, kiteak Hanv tuka aikochoch na.
17. Judachea nogramnim ani Jerusaleachea rosteancher tim kitem kortat tem tuka dixtti poddona?
18. Bhurgim zollôv ektthaim kortat, bapui uzo pettoitat, ani Sorginchê Ranniek bhakriô korunk bailô pitt môlltat; ani mhaka okman korun dusrea devank pivonn orpitat.
19. Mhaka tim okman kortat mhonn dista tumkam? Uloita to Sorvespor. Apnnankuch tim okman kortat ani loz haddtat mhonn sangchem nhoi?
20. Dekhun Sorvespor Dev oxem mhonntta: "Mhozo rag ani Mhozo krôdh hea zagear mon'xancher ani mon'zatincher, mollachea zhaddancher ani zomnichea follancher petttolo; to zollot ravtolo ani palovcho na."
21. Sorvsoktivont Sorvespor, Israelacho Dev, oxem mhonntta: "Tumche hom' ani iodn ektthaim korat ani tanchem mas khaiat.
22. Kiteak Ejiptantlim Hanvem tumchea purvozank bhair kaddlim tea disa, homam vixim ani iodnam vixim Hanvem tankam kãi sanglemna, kosloch kaido ghalo na.
23. Êkuch tankam adnia dil'li ti hi: Mhojea utrak pallo diat, ani Hanv tumcho Dev zatolom ani tumi Mhoji porza. Hanvem tumkam dakhoilea ti soglli vatt nitt dhôrat ani tumchem sogllem borem zatolem.
24. Punn tãnnim Mhojem aikunk na, Mhojea utrak kan diunk na. Apleach ievzonneam pormannem tim chol'lim, apleach vadeachim zaun aplea khottea vondovnnianchi vatt tãnnim dhôrli, tanchi gôt odik bori zaunchê svater odik paxtt zali.
25. Tumchim purvozam Ejiptantlim bhair sorlim tea disa thaun tem aiz porian, thar ghenastana Hanvem tumchê-xim sogllea Mhojea sevokam provadiank dhaddleat.
26. Punn tãnnim Mhojem aikunk na, Mhojea utrak kan diunk na; apli man tãnnim tann keli, aplea purvozam poros tim paxtt zalim.
27. Mhonnttôch hem sogllem sang tankam, tim tujem aikunchim nant; tankam tum ulo martoloi, punn tim tuka zap diunchim nant."
28. Dekhun tankam oxem sang: "Hi porza Sorvespora aplea Devachem utor pallina, ani Tachi xiddkavnni manun ghena. Visvaxiponn mhollear nanch! Hem utor legun tanchea tonddantlem bhair sorun gelem.
29. "Angoil'le tuje lamb kens katôr ani te bhair uddoi! Padd dongranchê tonkxer vochun vilap kôr, kiteak Sorvesporan Aplo krôdh favo zal'lê pinddkek patt kelea ani sôddun dilea! "
30. Hôi, Judachea putam-dhuvamnim Mhojê nodrê mukhar vaitt tem kelam- uloita to Sorvespor. Mhojem Nanv aslolea Mondirant, tem bhoxttaunchê khatir, tãnnim kanttallacheô vostu dovorleô,
31. ani aplea putam-dhuvancho ujean hôm' korchê khatir Tofetant, Ben-Hinnomachea Vollant, unch sthanam tãnnim bandlim; oxem korunk Hanvem kodinch adnia dili na, nhoi mhonn Mhojea monant oslim chintnam upzunkuch na.
32. Dekhun polleiat- uloita to Sorvespor- tea zageak Tofet vô Ben-Hinnomacho Vôll anink mhonnchim nant tosle dis ietat, punn Jivim marpacho Vôll, hea nanvan taka vollkhotolim. Khoinsoruch anink svat na zaun,Tofetant moddim uddoitolim;
33. ani varea velim suknnim ani zomnivelim savzam hea lokachim moddim khatolim; ani tankam ambddunk konn ascho na.
34. Sontosache ani khuxalkaieche ul'las, toxench hoklê-novreachea lognachim sontosachim gitam, Judachea nogramnim ani Jerusaleachea rosteamnim aikunk ieunchim nant, kiteak ak'kho dês zatolo ek oronnem.'
