1. Jehoiakimacho put Konia hachê pattlean Josiacho put Zedekiah raza zalo; haka Nebukadnezzaran, Babiloniechea razan, Judacho raza kel'lo.
2. Punn tannem vô tachea odhikariamnim vô desantlea lokan, jim utram Sorvespor Jeremias provadia udexim uloil'lo, tankam chit diunkuch na.
3. Zedekiah razan Jehukalak, Shelemiachea putak, ani Zefania iadnikak, Maseiachea putak, Jeremias provadia-xim ho sondêx diun pattoile: 'Amchê khatir Sorvesporak amchea Devak vinoti kôr.'
4. Jeremias ozun loka modem addkhôll nastanam bhonvtalo, kiteak taka ozun bondkhonnint ghalunk naslo.
5. Itlea mhonnosôr Ejipta thaun Faraohchi fouz bhair sorloli ani tichi khobor kanar poddona fuddem Jerusaleak veddho ghalun aslole Kaldeikar veddho kaddun gele.
6. Tedna hem Sorvesporachem utor Jeremias provadiak pavlem:
7. Sorvespor, Israelacho Dev, oxem sangta: "Judachea razan tuka Mhojê kodde budh gheunk dhaddla, tôr taka oso zobab di: Faraohchi fouz tumchea adarak ieta zait, punn ti Ejiptak, apleach desant, portun vetoli.
8. Kaldeikar hea Xaracher akromonn korunk porot ietole; tem te jikhun ghetole ani lasun uddoitole.
9. Sorvespor oxem sangta: Kaldeikar êkêch pavttin amkam sôddun vetat, oxem chintun tumkanch fottoum nakat, kiteak te sôddun vochonant.
10. Atam tumcher loddai korta tê Kaldeikaranchê ak'khê foujeche kuddkeankuddke tumi kele zalearui ani tanche fokot ghaiall zal'le soinik urle tôr, tori te novean ube zatole, ek-eklo ap-aplea tombunt, ani hem xar lasun uddoitole." '
11. Faraohchê foujechê bhirantin Kaldeikaranchi fouz Jerusaleacho veddho kaddun gel'li;
12. tedna Jeremias Jerusalea thaun Benjaminachea prantant vochunk laglo; thoim apnnak daizacho vantto poddtalo to loka hujir to apnnachê adhin korunk gelo.
13. To Benjaminachea Darvontteaxim pavlolo tedna soinikancho sordar, Irija, Shelemiacho put ani Hananiacho natu, aplê zuttier ubo aslo. Hannem Jeremias provadiak dhôrlo ani oxem taka arddun mhollem: 'Tum pollun vochun Kaldeikaranchê vatten vetai.'
14. Jeremiasan portipall kelo: 'Hi sarki fôtt! Hanv pollun vochona ani Kaldeikaranchea hatant mhaka ghalunk vochona.' Tori Irija Jeremiasachem aikona zalo, ani taka dhôrun mukheliam mukhar vhelo.
15. Mukheli Jeremiasacher tiddle; tãnnim taka mar ghalunk lailo, ani Jonathan dhormxastriachea ghorant taka bond korun dovorlo; hea ghorachi êk bondkhônn kel'li.
16. Oso Jeremias zomni pondak aslolê kothient pavlo ani thoim to zaito kall urlo.
17. Uprant, Zedekiah razan taka apounk dhaddlo, ani aplea razvaddeant kuxik vhorun tachê lagim vicharlem: 'Sorvespora koddsun koslem tori utor pavlam?' Jeremiasan portipall kelo: 'Hôi, pavlam.' Magir mhollem: 'Tuka dhôrun Babiloniechea razachea hatant ghaltole.'
18. Uprant Jeremiasan Zedekiah razak anink-ui sanglem: 'Tunvem mhaka bondkhonnint ghalunk, tujer vô tujea odhikariancher vô hea lokacher virudh kitem tori hanvem vaitt kelam?
19. "Babiloniecho raza tujer vô hea desacher kednanch akromonn korcho na!," oxem bhakit kel'lem te tuje provadi khoim pavle atam?
20. Tôr atam, mhojea dhonia, mhojea raza, mhojem aik mhonn magtam! Mhoji vinovnni manun ghe mhonn upkar magtam! Mhaka Jonathan dhormxastriachea ghorant porot dhaddum naka; thoim hanv mortolonch.
21. Tedna Zedekiah razan hukum' ghalo, ani tea pormannem Jeremiasak Rakhonndaranchea Angnnant bond dovorlo, ani Xarant undde aso-sôr, Poderanchea Rostea thaun disak êk unddo taka dilo. Oso Jeremias Rakhonndaranchea Angnnant urlo.
