1. Pashur nanvacho iadnik, Im'meracho put, Sorvesporachea Mondiracho karbhari aslo; tannem Jeremiasak hem bhakit kortana aikolo.
2. Tedna Pashuran Jeremiasak fottke marunk ani Sorvesporachea Mondirachea Benjaminachea unchlea Darvonttea lagim taka khodde ghalunk laile.
3. Dusrea disa Pashuran Jeremiasache khodde kaddunk laile; tedna Jeremiasan taka mhollem: 'Tuka Pashur mhonn nanv aslem, tem bodlun Sogllea vattamnim-Kampero oxem Sorvespor tuka nanv ghalta.
4. Tôr Sorvespor oxem sangta: "Hanv tuka ani sogllea tujea ixttam-mitrank kampereachea tabeant kortolom; te tujea dusmananchê torvarin poddtole: hem tum tujeanch khaxa dolleamnim dekhtoloi. Judachea sogllea lokakui Babiloniechea razachea tabeant kortolom, to tankam koidi korun Babiloniek vhortolo ani torvarin tancho jiv kaddtolo.
5. Tea bhair hea Xarachi soglli dovlôt, soglli zoma kel'li girestkai, Judachea razanchim sogllim bhanddaram tanchea dusmananchea tabeant kortolom; hem sogllem lutticho mhal korun te Babiloniek vhortole.
6. Ani tuka, Pashur, ani tujea ak'khea ghorabeak koidi korun Babiloniek vhortole. Thoim tum mortoloi ani thoim tuka purtole, tuka ani zankam tunvem fottkirim bhakitam kel'lim tankam-i toxench ghòddtolem. " '
7. Sorvespora, Tunvem mhaka fosoiloi, ani hanv fottovlom, Tum mhojê-vôn bollixtt dekhun Tunvem mhojer zoit vheleim. Dis-bhôr hanv kenddnniancho mhal zalam, sogllim mhojeô moskoriô kortat.
8. Hanv ulounk lagtam titlê-i pavtti, 'Zulum ani Nisontton!' oxem hanvem arddun pôrgott korchem poddta. Sorvesporachem utor dis-bhôr mhaka okman ani kenddnniô bhôgpachem karonn zalam.
9. Hanv oxem chinttalom: 'Hanv Tacho ugddas porian kaddcho na, Tachea Nanvan hanv anink ulounchoch na!' Punn tedna mhojea horddeant uzo pettla ani to mhojea haddamnim porian rigla mhonn diso. Taka domaun domaun mhaka puro zalem, punn taka domaunk mhojean zalem na.
10. Soglleanch vattamnim kampero! Tacher arôp korat! Tacher arôp korum-ia!' Oxem mhonnun sogllim mhojeô moskoriô kortat ani gunngunntat tem mhaka aikum ieta. Ixttagotin mhojê lagim bhonvtale te porian mhojem padd zatolem mhonn ravtat. [Te mhonnttat:] 'Ghoddiê taka ami chukint sampddaitoleanv. Magir taka amchean dhôrunk zatolem ani tedna tacho ami sudd gheuncho!'
11. Punn Tum, Sorvespora, eka bollvont vira sarko mhojê kuxik ubo asai; mhojer add asat te adllon poddtole ani harovtole, aplem sogllem fiskottlem mhonn lojek sampoddtole; sodankal togpachi, visrum nozo tosli tanchi loz zatoli!
12. Tum, Sorvsoktivont Sorvespora, neainitin mon'xank topasun kaddtai; monant ani kallzant kitem asa tem Tum boro vollkhotai. Mhojea dusmanancho sudd ghetai mhonn mhaka polleum-di, kiteak mhozo jiv hanvem Tujea hatant sôddla.
13. Sorvesporak gaionam korat, Sorvesporachi stuti korat, kiteak zulum' bhôgtolea hea durbollacho jiv khottea mon'xanchea tabeantlo Tannem sôddoilo.
14. Hanv zolma ailam tea disacher xirap ghaltam! Mhojê avoin mhaka zolm dilo tea disacher axirvad poddum noiê!
15. Tuka bhurgo zolmola! Tuka put zala! oxem mhonnun mhojea bapaik khobor haddli ani khuxalbhorit kelo tea mon'xacher xirap ghaltam!
16. Doia dhorinastana Sorvesporan nattak kelim tea nogram sarko ho monis zaum; sokallim zhuz pavta mhonn bhirant ghalpi arôdd ani don'param loddaiecho boball tachea kanar poddum,
17. kiteak tannem mhojê avoichea kusveantuch mhozo jiv kaddunk na; oxem kel'lem tôr, mhoji avoi mhozo fôndd zatoli asli, ani ticho kusvo sodankal gorban suzlolo urtolo aslo.
18. Kiteak mhonn hanv kusveantlo bhair sorlom? fokot koxtt ani dukh bhogunk ani lojen mhojem jivit sompounk?
